സിസ്റ്റര് ആന് മരിയയുടെ കൈകള്ക്ക് സ്റ്റിയറിംഗ് വീലും വഴങ്ങും!
സൈറണ് മുഴക്കി റോഡിലൂടെ പാഞ്ഞുപോകുന്ന ആംബുലന്സുകള് കാണുമ്പോള്, പറന്നകലാന് തുടങ്ങുന്ന അതിനുള്ളിലുള്ള, ജീവനുകളെ തക്ക സമയത്ത് ചികിത്സയും പരിചരണവും കിട്ടുന്നിടത്ത് എത്തിക്കാന്, മനസ്സാന്നിധ്യമുള്ള ഒരു പുരുഷന് ആ സ്റ്റിയറിംഗ് വീലിനു പുറകിലുണ്ടല്ലോ എന്ന് ചിന്തിച്ചാവും ഭൂരിപക്ഷം പേരും ആശ്വസിക്കുന്നത്.
ആംബുലന്സ് ഓടിക്കുന്ന ഡ്രൈവറിലാണ് ഏവരുടെയും വിശ്വാസം. പുരുഷന്മാരുടെ കുത്തകയാണ് ആംബുലന്സ് ഡ്രൈവിംഗ് എന്നാണ് പൊതുധാരണ. എന്നാല് അങ്ങനെയല്ല കാര്യങ്ങള്.
കട്ടപ്പനയില് ഒരു വനിത ആംബുലന്സ് ഡ്രൈവറുണ്ട്. കട്ടപ്പന അസീസി സ്നേഹാശ്രമത്തിലെ സിസ്റ്റര് ആന് മരിയ. ജപമാല പിടിക്കുന്ന കൈകളില് ആംബുലന്സിന്റെ വളയവും ഭദ്രമാണ്. ആന്ധ്ര ,ഊട്ടി, ഉജൈന് എന്നിവിടങ്ങളില് നഴ്സായിരുന്ന സിസ്റ്റര് ആന്മരിയ 16 വര്ഷമായി ആകാശപറവയിലാണ് ശുശ്രൂഷ ചെയ്യുന്നത് .13 വര്ഷം മുമ്പ് ഡ്രൈവിംഗ് ലൈസന്സ് കരസ്ഥമാക്കി.
ഫാദര് ഫ്രാന്സിസ് ഡൊമിനിക്കും, പ്രൊവിന്ഷ്യല് സിസ്റ്റര് അനീറ്റയും നല്കിയ പ്രോത്സാഹനമാണ് സിസ്റ്റര് ആന്മരിയ ആംബുലന്സ് ഓടിക്കാന് കാരണം. 67 വയസുള്ള സിസ്റ്ററിന് കോട്ടയം മെഡിക്കല് കോളേജില് എത്താന് കട്ടപ്പനയില് നിന്ന് രണ്ടര മണിക്കൂറില് താഴെ സമയം മതി.
പിക്കപ്പ് , മാര്ഷല് എന്നിങ്ങനെയുള്ള വലിയ വാഹനങ്ങള് എല്ലാം ഈ കൈകളില് ഭദ്രം. ഇതുവരെയും ഒരു അപകടം പോലും ഉണ്ടായിട്ടില്ല. ഓരോ യാത്രയും ഒരു ജീവന് രക്ഷിക്കാനുള്ളതാണെന്ന ഉത്തമബോധ്യത്തോടെ തന്റെദൗത്യം പൂര്ത്തിയാക്കുകയാണ് സിസ്റ്റര് ആന് മരിയ.
https://www.facebook.com/Malayalivartha
