പ്രവാസിമലയാളികള്‍ തിരഞ്ഞെടുപ്പ് ഫലം ഒന്നും രണ്ടും ദിവസം കഴിഞ്ഞു പത്രങ്ങളിലൂടെ മാത്രം അറിഞ്ഞിരുന്നൊരു കാലമുണ്ടായിരുന്നു . വൈകിയെത്തുന്ന വാര്‍ത്തകള്‍ക്കായി കാത്തിരുന്ന കാലം. കഴിഞ്ഞ മുപ്പതുവര്‍ഷത്തെ തിരഞ്ഞെടുപ്പ് വാര്‍ത്തകളുമായി പ്രവാസികള്‍ക്കു മുന്നിലെത്തിയ പത്രങ്ങളുടെ ശേഖരമുള്ള ആറ്റിങ്ങല്‍ സ്വദേശിയെ ഇനി പരിചയപ്പെടാം.

1970-ലെ കേരള നിയമസഭാ തിരഞ്ഞെടുപ്പു ഫലമറിയാന്‍ കോട്ടയത്തു മലയാള മനോരമയുടെ ഓഫീസിനു മുന്നില്‍ തടിച്ചുകൂടിയത് പതിനായിരങ്ങളാണ്. കേരളത്തില്‍ താമസിക്കുന്നവരുടെ അവസ്ഥ ഇതായിരുന്നുവെങ്കില്‍ അകലെ പ്രവാസികളായി ജീവിക്കുന്നവര്‍ തിരഞ്ഞെടുപ്പു വിവരമറിയാന്‍ ആകാംക്ഷയോടെ കാത്തിരുന്നിട്ടുള്ളത് ഒന്നും രണ്ടും മൂന്നും ദിവസങ്ങളായിരുന്നു. അത്തരം പത്രങ്ങള്‍ കൈമാറുന്ന വിവരങ്ങളായിരുന്നു പിന്നീടുള്ള രാഷ്ട്രീയ ചര്‍ച്ചകളുടെ റെഫറന്‍സ് .

ആറ്റിങ്ങല്‍ സ്വദേശി അശോക് രാജ് ആ ആകാംക്ഷയുടെ ആള്‍രൂപമാണ്. തിരഞ്ഞെടുപ്പുഫല പ്രഖ്യാപന ദിവസത്തിലെ പത്രങ്ങള്‍ സൂക്ഷിച്ചുവയ്ക്കുന്ന അശോക് രാജിന്റെ ശേഖരത്തിലുള്ളത് കഴിഞ്ഞ 30 വര്‍ഷത്തെ തിരഞ്ഞെടുപ്പുഫല പ്രഖ്യാപന ദിവസത്തിലെ പത്രങ്ങളാണ്.

മുപ്പതു വര്‍ഷമായി ദുബായിലെത്തിയിട്ട്. അബുഹെയ്‌ലിലെ മുറിയില്‍ പ്‌ളാസ്റ്റിക് കവറില്‍ പൊതിഞ്ഞു സൂക്ഷിക്കുകയാണ് പഴയ തിരഞ്ഞെടുപ്പു ദിവസത്തെ പത്രങ്ങള്‍. നാട്ടില്‍ തിരഞ്ഞെടുപ്പ് അടുക്കുമ്പോഴെല്ലാം പഴയ പത്രങ്ങളെടുത്തു മറിച്ചു നോക്കും. വിവിധകാലഘട്ടങ്ങളിലെ പത്രങ്ങളിലൂടെ കണ്ണോടിച്ചാല്‍ കേരളത്തിലെയും ഇന്ത്യയിലേയും രാഷ്ട്രീയ കാലാവസ്ഥയുടെ മാറ്റങ്ങള്‍ ഒറ്റനോട്ടത്തിലറിയാനാകുമെന്നു സാക്ഷ്യം.

ദേശീയ സംസ്ഥാനരാഷ്ട്രീയത്തിലെ രാഷ്ട്രീയ ചലനങ്ങളുടെ കൃത്യമായ അവലോകനം പത്രവായനയിലൂടെ സ്വന്തമാക്കാനാകുമെന്നാണ് അശോക് രാജിന്റെ ഉറപ്പ്. നാട്ടില്‍ സജീവ ഇടതുപക്ഷ പ്രവര്‍ത്തകനായിരുന്ന അശോക് രാജ് ഗള്‍ഫിലെത്തിയെങ്കിലും രാഷ്ട്രീയ വിദ്യാഭ്യാസവും പ്രവര്‍ത്തനവും തുടരുകയാണ്. പതിനഞ്ച്, ഇരുപത് വര്‍ഷങ്ങള്‍ക്കു മുന്‍പു ഇന്നത്തെപ്പോലെ എല്ലാ പത്രങ്ങളും ദുബായില്‍ ലഭിച്ചിരുന്നില്ല. ലഭ്യമായ പത്രങ്ങളുടെ കോപ്പികള്‍ സൂക്ഷിച്ചു വയ്ക്കുന്നത് കൗതുകത്തിലുപരി രാഷ്ട്രീയ വിജ്ഞാനത്തിനു സഹായകരമാണെന്നാണ് അശോക് വ്യക്തമാക്കുന്നത്.

രാജ്യം ഉറ്റുനോക്കുന്ന തിരഞ്ഞെടുപ്പിന്റെ ചൂടില്‍ കേരളം തിളച്ചുമറിയുമ്പോള്‍ അബു ഹെയ്‌ലിലെ വീട്ടിലിരുന്നു കൃത്യമായ രാഷ്ട്രീയ അഭിപ്രായം വ്യക്തമാക്കുകയാണ് അശോക് രാജ്.

വിരല്‍തുമ്പിലും ടിവിയിലുമൊക്കെയായി ലൈവായി വിവരങ്ങളറിയുന്ന കാലത്തും പത്രവായനയുടെ സുഖം മാറ്റിവയ്ക്കാനാകില്ലെന്ന് അശോക് രാജ് വ്യക്തമാക്കുന്നു. നാട്ടിലേക്കു മടങ്ങിയാലും രണ്ടുകാര്യങ്ങള്‍ ഉപേക്ഷിക്കില്ല. പത്രവായനയും രാഷ്ട്രീയവും.