ഡസന്‍ കണക്കിന് മെത്തകള്‍ കാറ്റില്‍ പറപറക്കുന്നതിന്റെ ദൃശ്യങ്ങള്‍!
ഡസന്‍ കണക്കിന് മെത്തകള്‍ വായുവിലൂടെ ഒഴുകി പറക്കുന്നു. ബോളീവുഡ് ചിത്രത്തിലെ സ്വപ്‌നരംഗമാണെന്ന് കരുതിയെങ്കില്‍ തെറ്റി. കൊളറാഡോയില്‍ ഡെന്‍വറില്‍ ഓപ്പണ്‍ എയര്‍ സിനിമാപ്രദര്‍ശനത്തിനായി ഒരുക്കിയ കിടക്കകളാണ് ശക്തമായ കാറ്റത്ത് പറപറന്നത്. മെത്തകള്‍ പറക്കുന്നതിന്റെ രസകരമായ വീഡിയോ ഇന്റര്‍നെറ്റില്‍ വൈറലായിക്കഴിഞ്ഞു.
ഡെന്‍വര്‍ സ്വദേശി റോബ് മെയന്‍സ് പകര്‍ത്തി ദ ഗ്രേറ്റ് മാട്രസ് മൈഗ്രേഷന്‍ 2019 എന്ന തലക്കെട്ടോടെ യുട്യൂബില്‍ ഷെയര്‍ ചെയ്ത വീഡിയോ രണ്ട് ലക്ഷത്തിലധികം പേര് കണ്ടു കഴിഞ്ഞു. രസകരമായ കമന്റുകളും വീഡിയോയ്ക്ക് ലഭിച്ചു. പറന്നു പോകുന്ന മെത്തകള്‍ പിടിക്കാനോടുന്ന ആള്‍ക്കാരേയും വീഡിയോയില്‍ കാണാം. മെത്തകള്‍ പറന്ന് സ്വിമ്മിങ് പൂളിലേക്ക് വീഴുന്നുമുണ്ട്.
വീഡിയോയുടെ പേര് പ്രശസ്തമായ പുസ്തകത്തിന്റെ പേരിന് സമാനമാണെന്നാണ് ഒരാളുടെ കമന്റ്. വീഡിയോ ശരിക്കും രസകരമാണെന്ന് അഭിപ്രായപ്പെട്ടവരും നിരവധി.
വ്യാഴാഴ്ച മുതല്‍ ഞായറാഴ്ച വരെ നടത്താനിരുന്ന ഓപ്പണ്‍ എയര്‍ സിനിമാ പ്രദര്‍ശനത്തിനാണ് ഇത്രയും മെത്തകള്‍ ഇവിടെ എത്തിച്ചിരുന്നത്. വേനല്ക്കാലത്ത് തുറന്ന പാര്ക്കുകളില്‍ ഇത്തരം സിനിമാപ്രദര്‍ശനങ്ങള്‍ ഇവിടെ സാധാരണമാണ്. സംഭവസമയത്ത് അവിടെയുണ്ടായിരുന്ന ആളുകള്‍ തെല്ലൊന്നമ്പരന്നെങ്കിലും രസകരമായ സംഗതിയായി മാറിയതില്‍ സന്തോഷമുണ്ടെന്ന് സംഘാടകര്‍ പറഞ്ഞു.
https://www.facebook.com/Malayalivartha
