ന്യൂസിലന്‍ഡ് സ്വദേശിയായ സ്റ്റീവ് മോറോ ഇപ്പോള്‍ ഒരു പൂ ചോദിച്ചപ്പോള്‍ പൂക്കാലം കിട്ടിയെന്നു പറയുന്ന അവസ്ഥയിലാണ്. കുറച്ചു കോഴിയെ വാങ്ങണമെന്ന ആഗ്രഹം സ്റ്റീവിനു തോന്നിയിട്ട് കുറച്ചുനാളായി. അവസാനം ട്രേഡ്മി എന്ന സൈറ്റില്‍ നിന്ന് കോഴിയെ വാങ്ങാന്‍ സ്റ്റീവ് തീരുമാനിക്കുന്നിടത്താണ് സംഭവങ്ങളുടെ തുടക്കം.

ലേലത്തില്‍ പക്ഷികളെ വില്‍ക്കുന്ന സൈറ്റാണിത്. 1000 കോഴികളെ വില്‍ക്കാനുണ്ടെന്ന് സൈറ്റിലെ പരസ്യം പെട്ടെന്ന് നോക്കിയപ്പോള്‍ സ്റ്റീവിന്റെ കണ്ണില്‍ അത്രയും ഏണ്ണം പെട്ടില്ല. അതുകൊണ്ട് ലേലത്തില്‍ 10.50 ന്യൂസിലന്‍ഡ് ഡോളറാണ് (ഏകദേശം 500 രൂപ) സ്റ്റീവ് രേഖപ്പെടുത്തിയത്. ഞായറാഴ്ച രാവിലെ സൈറ്റ് നോക്കിയപ്പോഴാണ് സ്റ്റീവ് ശരിക്കും ഞെട്ടിയത്.

ലേലം ലഭിച്ചിരിക്കുന്നത് തനിക്കാണ് അതും 1000 കോഴികളെ വെറും 1.50 ഡോളറിന്. 10.50 എന്നത് അബദ്ധത്തില്‍ 1.50 രേഖപ്പെടുത്തിയതാണ് കുറഞ്ഞ തുകയ്ക്ക് ലേലം ലഭിക്കാന്‍ കാരണം. ഏതായാലും ലേലത്തില്‍ ലഭിച്ച 1000 കോഴിയെ എന്തുചെയ്യണമെന്ന് ആലോചനയിലാണ് സ്റ്റീവ്. ഇപ്പോള്‍ പുതിയൊരു പേരും വീണു സ്റ്റീവിന് -ചിക്കന്‍ മാന്‍