ചെന്നൈ റെയില്വേ സ്റ്റേഷനില് ചിന്നപൊന്നുവിന്റെ സന്നദ്ധസേവനം!
ചെന്നൈ പാര്ക്ക് ടൗണ് റെയില്വേ സ്റ്റേഷനില് വച്ച് നിയമലംഘനപ്രവര്ത്തനങ്ങള് നടത്തിയാല് 'ചിന്നപൊന്നു' നിങ്ങളുടെ പിന്നാലെ പാഞ്ഞെത്തും. നിങ്ങള് കാണിച്ചത് കുരുത്തക്കേടാണെന്ന് അപ്പോള് തന്നെ മനസ്സിലാക്കിക്കൊള്ളണം. നേരേ മര്യാദയ്ക്ക് പോകുന്നവരെ ചിന്നപൊന്നു മൈന്ഡ് ചെയ്യുകപോലുമില്ലല്ലോ? നിയമലംഘകരേയും സുരക്ഷാവീഴ്ചവരുത്തുന്നവരെയും വരുതിയില് നിര്ത്തുന്നത് 'ചിന്നപൊന്നു' എന്ന പെണ്നായ ആണ്.
ഈ നായയെ രണ്ടു വര്ഷം മുന്പ് ആരോ റെയില്വേ സ്റ്റേഷനില് ഉപേക്ഷിച്ചതാണ്. റെയില്വേ സ്റ്റേഷനില് വരുന്നവര് അവള്ക്ക് ഭക്ഷണം നല്കി. അതിന്റെ നന്ദിയും അവള് കാണിച്ചു. രാത്രിയും പകലുമില്ലാതെ പ്ലാറ്റ്ഫോമില് പട്രോളിംഗ് നടത്തുകയാണ് ചിന്നപൊന്നു.
അനധികൃതമായി ട്രാക്ക് മുറിച്ചു കടക്കുന്നവര്ക്കും ട്രെയിന്റെ വാതില്പ്പടിയില് നിന്ന് യാത്ര ചെയ്യുന്നവര്ക്കും അവള് കുരച്ച് മുന്നറിപ്പ് നല്കും. ഓടിക്കൊണ്ടിരിക്കുന്ന ട്രെയിനു പിന്നാലെ ചെന്ന് നിയമലംഘകരെ കാര്യങ്ങള് ഓര്മ്മിപ്പിക്കും. റെയില്വേ പ്രൊട്ടക്ഷന് ഫോഴ്സ് (ആര്.പി.എഫ്) സേനയിലെ അംഗമാണ് ചിന്നപൊന്നുവെന്നാണ് യാത്രക്കാര് പറയുന്നതുപോലും.
എന്നാല് യാത്രക്കാര്ക്ക് അവള് ഒരു ശല്യവും ഇതുവരെ പ്ലാറ്റ്ഫോമില് ഉണ്ടാക്കിയിട്ടില്ല. തന്റെ ഉത്തരവാദിത്തം നിറവേറ്റിക്കഴിഞ്ഞാല് അടുത്ത നിയമലംഘകരെ കാത്ത് അവള് പ്ലാറ്റ്ഫോമില് വിശ്രമിക്കും.
റെയില്വേ മന്ത്രാലയത്തിന്റെ ട്വിറ്റര് പേജിലാണ് ചിന്നപൊന്നുവിന്റെ സേവനത്തെ പ്രകീര്ത്തിച്ചിരിക്കുന്നത്.
https://www.facebook.com/Malayalivartha
