പുതിയ തലമുറ എന്നും കല്യാണവും കല്യാണ വീഡിയോയും വ്യത്യസ്തമാക്കാന്‍ പുതിയ ആശയങ്ങള്‍ തേടുന്നവരാണ്. ചേറിലും ചെളിയിലും കുളത്തിലും കടലിലും വരെയാണ് പ്രീ വെഡ്ഡിംഗ് വീഡിയോ ഷൂട്ടിംഗുകള്‍ നടത്തുന്നത്.

കല്യാണ വേദിയില്‍ സിമ്പിിള്‍ സ്റ്റെപ്പുകളും ചടുലനൃത്തവും ഗാനമേളയും വരെ ഉണ്ടാവും. കല്യാണ വേദിയില്‍ നിന്ന് വീട്ടിലേക്കുള്ള യാത്ര കാളവണ്ടിയിലും സൈക്കിളിലും ഉന്തുവണ്ടിയിലും ജെസിബിയിലുമൊക്കെയാക്കുന്നവരുമുണ്ട്. എന്നാല്‍, സോഷ്യല്‍ മീഡിയയിലെ ഇപ്പോഴത്തെ താരമായ ഒരു വധു വിവാഹത്തിനായി എത്തുന്ന രീതിയാണ് വീഡിയോയെ പ്രത്യേകതയുള്ളതാക്കിയത്.

ശവപ്പെട്ടിയിലാണ് വധു വിവാഹത്തിനായി എത്തിയത്. കറുത്ത തുണികൊണ്ട് പൊതിഞ്ഞ ശവപ്പെട്ടിയാണ് അതിഥികള്‍ക്കിടയിലേക്ക് ആദ്യം വരുന്നത്. സംഗീതത്തിനിടെ ശവപ്പെട്ടിതുറന്ന് വധു അതിഥികള്‍ക്ക് ഇടയിലേക്ക് ഇറങ്ങുകയാണ്. വിവാഹത്തില്‍ പങ്കെടുക്കാനെത്തിയ അതിഥികള്‍ കരഘോഷത്തോടെയാണ് വധുവിനെ സ്വീകരിക്കുന്നത്. വധു അതിഥികള്‍ക്കൊപ്പം ഡാന്‍സ് ചെയ്യുന്നതും വീഡിയോയില്‍ കാണാം.