മഞ്ഞില് വിറങ്ങലിച്ച് കിടന്ന, ഉപേക്ഷിക്കപ്പെട്ട പൂച്ചക്കുഞ്ഞുങ്ങളെ സംരക്ഷിച്ചത് ഒരു തെരുവു നായ!
കാനഡയിലെ ഒന്റാറിയോയിലുള്ള ഒരു ഗ്രാമത്തിലെ മഞ്ഞില് ഒരു നായ ചലിക്കാതെ കിടക്കുന്നതു കണ്ട് ആളുകള് ഒന്ന് അമ്പരന്നു.പിന്നീടാണ് ആ കിടപ്പിന് പിന്നിലെ സ്നേഹം വ്യക്തമായത്. വഴിയരികില് ഉപേക്ഷിച്ച പൂച്ചക്കുട്ടികളെ തന്റെ ശരീരത്തിന്റെ ചൂടു നല്കി സംരക്ഷിക്കുക ആയിരുന്നു ഈ തെരുവുനായ.
കടുത്ത മഞ്ഞുവീഴ്ചയാണ് ഇപ്പോള് കാനഡയില്. ആ മഞ്ഞോട് ചേര്ന്ന് കിടക്കുന്ന നിലയിലാണ് തെരുവുനായയെ കണ്ടെത്തിയത്. മൈനസ് മൂന്ന് ഡിഗ്രി തണുപ്പിലാണ് പൂച്ചക്കുഞ്ഞുങ്ങളെ തന്റെ ശരീരത്തിന്റെ ചൂടു നല്കി നായ സംരക്ഷിച്ചത്. നായയുടെ സംരക്ഷണം ലഭിച്ചില്ലായിരുന്നുവെങ്കില് പൂച്ചക്കുട്ടികള് മഞ്ഞുവീഴ്ചയെ അതിജീവിക്കില്ലായിരുന്നുവെന്നും മൃഗസംരക്ഷണ പ്രവര്ത്തകര് വ്യക്തമാക്കി.
വഴിയാത്രക്കാരിയായ മിറിയം ആംസ്ട്രോങ് ആണ് നായയുടെ ദുരവസ്ഥ കണ്ട് സഹായിക്കാനായി ആദ്യമെത്തിയത്. എന്നാല് നായയുടെ അടുത്തെത്തിയപ്പോഴാണ് നായയുടെ ചൂടുപറ്റിക്കിടക്കുന്ന അഞ്ച് കറുത്ത പൂച്ചക്കുട്ടികളെ അവര് കണ്ടത്.
ഏകദേശം രണ്ട് വയസ്സോളം പ്രായമുള്ള നായയ്ക്ക് സെറനിറ്റി എന്ന പേരാണ് സംരക്ഷണപ്രവര്ത്തകര് നല്കിയിരിക്കുന്നത്. പെറ്റ്സ് ആന്ഡ് വൈല്ഡ്ലൈഫിന്റെ ഔദ്യോഗിക പേജിലാണ് സെറനിറ്റിയുടെയും പൂച്ചക്കുട്ടികളുടെയും ചിത്രങ്ങളും ഹൃദയസ്പര്ശിയായ അടിക്കുറിപ്പും പങ്കുവച്ചത്.
https://www.facebook.com/Malayalivartha