ലൈവായി വാര്‍ത്ത അവതരിപ്പിക്കുന്നതിനിടെ വാര്‍ത്തയുമായി ഒരു ബന്ധവുമില്ലാത്ത ചില കാര്യങ്ങള്‍ ദൃശ്യങ്ങളില്‍ ഇടംപിടിക്കുന്നത് കൗതുകമുണര്‍ത്താറുണ്ട്. അത്തരമൊരു ദൃശ്യമാണ് ഇപ്പോള്‍ സമൂഹമാധ്യമങ്ങള്‍ വഴി പ്രചരിക്കുന്നതും. ഗ്രീസില്‍ പ്രവര്‍ത്തിക്കുന്ന എഎന്‍ടി വണ്‍ ടിവിയുടെ റിപ്പോര്‍ട്ടറുടെ ഒരു ദൃശ്യമാണ് പ്രചരിക്കുന്നത്.

ഒരു റിപ്പോര്‍ട്ടര്‍ അവിടെയുണ്ടായ പ്രളയത്തെ തുടര്‍ന്നുള്ള നാശനഷ്ടങ്ങളെ കുറിച്ച് ആത്മാര്‍ത്ഥമായി റിപ്പോര്‍ട്ട് ചെയ്യുകയാണ്. പെട്ടെന്നാണ് ഒരു പന്നി ദൃശ്യത്തിലേക്ക് കടന്നുവന്നത്. ദൃശ്യത്തില്‍ പെട്ടതു മാത്രമല്ല കാര്യം. അത് നേരെ റിപ്പോര്‍ട്ടറുടെ അടുത്തേയ്ക്ക് ചെല്ലുകയായിരുന്നു. പന്നി അടുത്തേക്ക് വരുന്നത് കണ്ട് നീങ്ങിനിന്നു റിപ്പോര്‍ട്ടര്‍. എന്നാല്‍ അയാള്‍ എങ്ങോട്ടാണോ മാറുന്നത്  അവിടേക്ക് പന്നിയും ചെന്നുകൊണ്ടേയിരുന്നു.

ഇയാള്‍ പന്നിയുടെ അടുത്ത് നിന്നും മാറി മാറി നിന്നുകൊണ്ട് വാര്‍ത്ത കൊടുക്കാന്‍ ശ്രമിക്കുന്നുണ്ടെങ്കിലും പന്നി ഇയാളുടെ പിന്നില്‍ നിന്നും മാറുന്നുണ്ടായിരുന്നില്ല. ഈ ദൃശ്യങ്ങളെല്ലാം ചാനലില്‍ ലൈവായി സംപ്രേക്ഷണം ചെയ്തുകൊണ്ടിരിക്കുമ്പോള്‍ അവതാരകര്‍ ഏറെ പ്രയാസപ്പെട്ടാണ് ചിരിയടക്കിയത്. ഇതിനോടകം നിരവധി ആളുകള്‍ പ്രതികരണവുമായി രംഗത്തെത്തി.