കലിഫോര്‍ണിയയിലെ ലേക്ക് താവോസ് കരടികളേറെയുള്ള സ്ഥലമാണ്. ഇപ്പോള്‍ അവിടെ ശൈത്യകാലമായതോടെ ഹിമയുറക്കത്തിനായുള്ള സ്ഥലം തേടിയുള്ള ഓട്ടത്തിലാണ് കരടികള്‍. ഇങ്ങനെ സുരക്ഷിതമായ താവളം തേടി ജനവാസകേന്ദ്രത്തിലെത്തിയ ഒരു കരടിയുടെ ദൃശ്യങ്ങള്‍ ഇപ്പോള്‍ സമൂഹമാധ്യമങ്ങളില്‍ നിറഞ്ഞോടുകയാണ്.

ഇവിടെ ഏറെയും തടികൊണ്ടു നിര്‍മിച്ച വീടുകളാണ് ഉള്ളത്. ഈ വീടുകളുടെ അടിയിലായി കോണ്‍ക്രീറ്റ് അറകളുമുണ്ട്. ഇതിലേക്കിറങ്ങാനുള്ള ചെറിയ വാതില്‍ അടയ്ക്കാന്‍ വീട്ടുകാര്‍ മറന്ന ദിവസങ്ങളിലെന്നോ ഒരു കൂറ്റന്‍ കരടി അത് സ്വന്തം താവളമാക്കി. പതിവില്ലാതെ വീടിനടിയില്‍ നിന്നും അസാധാരണമായ ശബ്ദങ്ങള്‍ കേട്ടപ്പോഴാണ് വീട്ടുകാര്‍ പരിശോധിച്ചത്. ഉള്ളില്‍ കൂറ്റന്‍ കരടിയാണുള്ളതെന്നറിഞ്ഞപ്പോള്‍ വീട്ടുകാരുടെ ശ്വാസം നിലച്ചതുപോലെയായി.

അവര്‍ ഉടന്‍ തന്നെ ബെയര്‍ ലീഗിലെ രക്ഷാപ്രവര്‍ത്തകരെ വിവരമറിയിച്ചു. ആദ്യ ദിവസം കരടിയെ ഇറക്കി വിടാനായി തട്ടിയും മുട്ടിയും വലിയ ശബ്ദമുണ്ടാക്കിയെങ്കിലും കരടി ഇറങ്ങിയില്ല. പിറ്റേദിവസം രാവിലെ കരടികിടന്ന സ്ഥലത്തു നിന്നും ശബ്ദമൊന്നും കേള്‍ക്കാതായപ്പോള്‍ അത് പുറത്തിറങ്ങിയെന്ന ധാരണയില്‍ വീട്ടുടമ കരടിയുള്ളിലേക്കിറങ്ങിയ ചെറിയ വിടവ് അടച്ചു.

എന്നാല്‍ വീണ്ടും ഇവിടെ നിന്ന് ശബ്ദം കേട്ടുതുടങ്ങിയതോടെ കരടി പുറത്തു പോയിട്ടില്ലെന്ന് വീട്ടുകാര്‍ മനസ്സിലാക്കി. പിറ്റേന്നു തന്നെ അടച്ചു വച്ച വിടവ് ഇവര്‍ തുറന്നതിനു ശേഷം മാറി നിന്ന് നിരീക്ഷിച്ചു. ചെറിയ വിടവിലൂടെ ആയാസപ്പെട്ടു പുറത്തു കടന്ന കൂറ്റന്‍ കരടി പുറത്തെത്തിയ ശേഷം റോഡിലേക്ക് ഓടിമറയുകയും ചെയ്തു.

പതിവായി ഈ പ്രദേശത്ത് കരടികളിറങ്ങാറുണ്ട്. ഹോട്ടലുകളുടെയും മറ്റും സമീപത്ത് മാലിന്യം നിക്ഷേപിക്കുന്ന പാത്രങ്ങളില്‍ നിന്നും ആഹാരം തേടിയാണ് ഈ കരടികളെത്തുന്നത്. പതിവായി കാണാറുള്ള കരടിയാണിതെന്ന് വീട്ടുടമയും വ്യക്തമാക്കി.