വെറ്റിലപ്പാറയിലെ മുത്തു, ഇണങ്ങിയ മലയണ്ണാന്!
അങ്കമാലിയില് പ്ലാന്റേഷന് കോര്പറേഷന്റെ വെറ്റിലപ്പാറ ടി എസ് ആര് ഫാക്ടറിക്കു സമീപം പ്ലാന്റേഷന് കോര്പറേഷന് ക്വാര്ട്ടേഴ്സില് താമസിച്ചിരുന്ന തൊഴിലാളി പുതുശേരി വിനുവിന്റെയൊപ്പം വനമേഖലയില് ചെന്നാല് മുത്തുവുമായി സെല്ഫിയെടുക്കാം. മലയണ്ണാനാണ് മുത്തു.
വനത്തില് കാണുന്ന മലയണ്ണാന് മനുഷ്യ ശബ്ദം കേട്ടാല് ഓടിയകലുന്ന കാഴ്ചകള്ക്കിടയ്ക്കാണ് മുത്തു കൗതുകമാകുന്നത്. വെറ്റിലപ്പാറ ടി എസ് ആര് ഫാക്ടറിക്കു സമീപം പ്ലാന്റേഷന് കോര്പറേഷന് ക്വാര്ട്ടേഴ്സില് താമസിച്ചിരുന്ന കാലത്ത് വിനുവിന്റെ മകന് ആഗ്നലിന് മരത്തിന്റെ മുകളില് നിന്നു വീണു കിട്ടിയതാണ് ഈ മലയണ്ണാനെ. മുത്തുവെന്നു പേരിട്ടത് ആഗ്നലാണ്.
3 വര്ഷം മുന്പു മുത്തുവും വളര്ത്തിയ വീട്ടുകാരും തമ്മില് തുടങ്ങിയ ഇഴ മുറിയാത്ത സൗഹൃദത്തിന്റെ നേര്ക്കാഴ്ച ആരിലും കൗതുകമുണര്ത്തും. കുഞ്ഞുനാളില് അവനെ പരിപാലിച്ചിരുന്ന കുടുംബം മറ്റൊരിടത്തേക്കു മാറിത്താമസിച്ചെങ്കിലും വീട്ടുകാരില് ആരെങ്കിലും മുത്തു താമസിക്കുന്ന വനമേഖലയില് ചെന്നു നീട്ടി വിളിച്ചാല് ഏതെങ്കിലും മരത്തിന്റെ ഓലയിലൂടെ ഇറങ്ങി അരികിലേക്കു മുത്തു ഓടിയെത്തും.
വീട്ടിനുള്ളില് ബാസ്കറ്റില് തുണി വിരിച്ച് തണുപ്പില് നിന്നു സംരക്ഷിച്ചു. വിനുവിന്റെയും ഭാര്യ ഷൈനിയുടെയും മക്കളായ അമല്, ആഗ്നല് എന്നിവരോടൊപ്പം ലാളനയേറ്റു സ്വതന്ത്രനായാണ് മുത്തുവും വളര്ന്നത്.4 മാസത്തോളം വീടിന്റെ അകത്ത് വളര്ന്നു. പിന്നെ പതുക്കെ വീട്ടുമുറ്റത്തും സമീപമുള്ള മരങ്ങളിലേക്കും മുത്തുവിന്റെ യാത്ര നീണ്ടു. അയല്പക്കത്തുള്ളവരുടെയും കണ്ണിലുണ്ണിയായി.
പ്രളയത്തെ തുടര്ന്നു പ്ലാന്റേഷന് ക്വാര്ട്ടേഴ്സില് താമസിച്ചിരുന്ന കുടുംബം പുതംകുറ്റിയില് വീടുവച്ചു മാറിയതോടെ മുത്തു വനത്തിലേക്ക് കുടിയേറി. എന്നാല് ഏതാനും നാളുകള്ക്കു ശേഷം അവന് തിരിച്ചെത്തി.
മുത്തു അവനെ വളര്ത്തിയ വീട്ടുടമസ്ഥനോടു കാണിക്കുന്ന സ്നേഹം അനുഭവിച്ചറിയണമെങ്കില് വിനുവിന്റെ വീട്ടുകാരേയും കൂട്ടി പോകണം. എന്നാലേ മുത്തുവുമൊത്തുള്ള സെല്ഫിയും തരപ്പെടുകയുള്ളു!
https://www.facebook.com/Malayalivartha