കിഴക്കന്‍ ഓസ്‌ട്രേലിയായിലെ ഗോള്‍ഡ് കോസ്റ്റ് സ്വദേശിയായ ഗ്രെഗ് ഹോസ്‌ക്കിങ്ങിന്റെ വീടിനു സമീപത്തുള്ള മരത്തില്‍ വച്ച് കാര്‍പെറ്റ് പൈതണ്‍ ഇനത്തില്‍പെട്ട പെരുമ്പാമ്പ്, സഞ്ചി മൃഗമായ പോസത്തെ വിഴുങ്ങുന്നതിന്റെ ദൃശ്യങ്ങള്‍ വൈറലാകുന്നു.

ഈ പ്രദേശത്ത് സ്ഥിരമായി കാണപ്പെടുന്ന പാമ്പാണ് ഇതെന്ന് ഗ്രെഗ് പറഞ്ഞു. പ്രദേശവാസികള്‍ മോണ്ടി എന്നാണ് ഈ പെരുമ്പാമ്പിനെ വിളിക്കുന്നതത്രേ.

വീടിനു പിന്നിലെ മരത്തില്‍ കിളികള്‍ ഭയന്ന് നിലവിളിക്കുന്നത് കേട്ട് ഗ്രെഗ് അവിടെക്കു ചെല്ലുമ്പോള്‍ പോസത്തിന്റെ തലയില്‍ കടിച്ചു പിടിച്ച് മോണ്ടി മരത്തിന്റെ ചില്ലയില്‍ തൂങ്ങി കിടക്കുന്നതാണ് കാണുന്നത്.

തുടര്‍ന്ന് മുകളിലേക്ക് ഉയര്‍ത്തിയ പോസത്തെ മോണ്ടി വിഴുങ്ങുകയും ചെയ്തു. ഏകദേശം നാല്‍പ്പത്തിയഞ്ച് മിനിട്ടു നേരത്തെ പരിശ്രമത്തിനു ശേഷമാണ് മോണ്ടിക്ക് ഇരയെ വിഴുങ്ങാനായത്.

ഗ്രെഗാണ് ഈ ദൃശ്യങ്ങള്‍ സോഷ്യല്‍ മീഡിയായില്‍ പങ്കുവെച്ചത്. സംഭവം വൈറലായി മാറിയിരിക്കുകയാണ്.