സാധാരണയായി ആരാധകരില്‍ നിന്നും തീവ്രമായ പ്രശ്‌നം ഉണ്ടാകാറുള്ളത് ക്രിക്കറ്റ് താരങ്ങള്‍ക്കും സിനിമാ താരങ്ങള്‍ക്കുമാണ്. ഈ ആരാധന ചിലപ്പോള്‍ പരിധികള്‍ കടന്ന് പോകാറുമുണ്ട്. എന്നാല്‍, ഈ രണ്ടു ഗണത്തിലുംപെടാത്ത ഒരാള്‍ ആരാധകശല്യം കൊണ്ട് ബുദ്ധിമുട്ടുകയാണ്. മധ്യപ്രദേശിലെ ഒരു ഐപിഎസ് ഉദ്യോഗസ്ഥനാണ് ഈ പ്രശ്‌നം അനുഭവിക്കുന്നത്.

മധ്യപ്രദേശിലെ പോലീസ് സൂപ്രണ്ട് സച്ചിന്‍ അതുല്‍ക്കറാണ് കഥാപാത്രം. സമൂഹമാധ്യമങ്ങള്‍ വഴി പ്രചരിക്കുന്ന സച്ചിന്‍ അതുല്‍ക്കര്‍ ഐപിഎസിന്റെ ചിത്രങ്ങള്‍ കണ്ട് ആരാധനമൂത്ത ഒരു പെണ്‍കുട്ടിയാണ് പോലീസിനെ വട്ടം ചുറ്റിക്കുന്നത്. മൂന്ന് ദിവസം മുമ്പാണ് 27-കാരിയായ പെണ്‍കുട്ടി തന്റെ സ്വപ്ന നായകനെത്തേടി പഞ്ചാബില്‍ നിന്നും ഉജ്ജയിനിയിലെത്തിയത്. തുടര്‍ന്ന് ഈ പെണ്‍കുട്ടി എസ്പിയെ കാണുന്നതിന് ഓഫീസിലും അദ്ദേഹം പരിപാടിയില്‍ പങ്കെടുക്കുന്ന സ്ഥലങ്ങളിലും എത്തി. ആ പെണ്‍കുട്ടി ഒന്നിനും വഴങ്ങാത്ത ഒരാളാണെന്ന് വനിതാ പോലീസ് സ്‌റ്റേഷന്‍ ചാര്‍ജ്ജുള്ള രേഖ വര്‍മ്മ മാധ്യമങ്ങളോട് പറഞ്ഞു.

കുട്ടിയുടെ മാതാപിതാക്കളെ വിവരം അറിയിച്ചിട്ടുണ്ടെന്നും എന്നാല്‍ തിരികെ വീട്ടിലേക്ക് മടങ്ങാന്‍ താത്പര്യപ്പെടുന്നില്ലെന്ന നിലപാടിലാണ് പെണ്‍കുട്ടിയെന്നും അതുലിനെ കണ്ടശേഷം മാത്രമേ തിരികെ പോകുകുകയുള്ളൂ എന്ന നിലപാടിലാണ് യുവതി എന്ന് വര്‍മ്മ പറഞ്ഞു. മനശാസ്ത്രത്തില്‍ ബിരുദാനന്ദരബിരുദ വിദ്യാര്‍ത്ഥിനിയാണ് ഇവര്‍ എന്നും പോലീസ് വ്യക്തമാക്കി.

ഇവര്‍ക്ക് പലതരത്തിലുള്ള കൗണ്‍സിലിങ്ങും നല്‍കിയെങ്കിലും നിരാശയായിരുന്നു ഫലം. തുടര്‍ന്ന് പോലീസ് പഞ്ചാബിലേക്കുള്ള ട്രെയിനില്‍ കയറ്റി വിടുന്നതിനായി നഗ്ഡ സ്‌റ്റേഷനില്‍ എത്തിച്ചുവെങ്കിലും ട്രെയിനില്‍ നിന്നും ചാടി ആത്മഹത്യ ചെയ്യുമെന്ന് ഭീഷണിപ്പെടുത്തി. ഇപ്പോള്‍ കൗണ്‍സിലര്‍ മാരുടെ സഹായത്തോടെ അവര്‍ ചോദിക്കുന്ന ഭക്ഷണം നല്‍കി വരികയാണ്. രണ്ട് ദിവസത്തിനുള്ളില്‍ ഇവരെ കൊണ്ടുപോകുന്നതിനായി മാതാപിതാക്കള്‍ എത്തുമെന്ന് പോലീസ് ഉദ്യോഗസ്ഥ പറഞ്ഞു.

സാഗര്‍ ജില്ലയില്‍ അദ്ദേഹം എസ്പി ആയിരുന്ന സമയത്ത് ഓട്ടോഗ്രാഫ് കിട്ടിയാല്‍ മാത്രമെ ഭക്ഷണം കഴിക്കു എന്ന് ഒരു പെണ്‍കുട്ടി വാശി പിടിച്ച സംഭവവും ഉണ്ടായിരുന്നു. ഭഗല്‍പൂര്‍ എന്ന ചെറുഗ്രാമത്തില്‍ നിന്നും പഠിച്ചു വന്ന സച്ചിന്‍ 2007 ഐപിഎസ് ബാച്ചുകാരനാണ്. സമൂഹമാധ്യമത്തില്‍ പല താരങ്ങളെയും വെല്ലുന്ന വിധത്തിലാണ് ആരാധകരുള്ളത്. സച്ചിന്റെ ഫോട്ടോകള്‍ക്ക് ലഭിക്കുന്ന ലൈക്കും കമന്റും കണ്ടാല്‍ മനസിലാകും അദ്ദേഹത്തിന്റെ ജനപ്രീതി. ദിവസവും 70 മിനിട്ട് സമയത്തോളം സച്ചിന്‍ ജിമ്മില്‍ സമയം ചെലവഴിക്കും. 34-കാരനായ സച്ചിന്‍ വിവാഹിതനല്ല.