നാട്ടിലിറങ്ങുന്ന കാട്ടാനകളൊക്കെ ഇനി ചട്ടമ്പിത്തരമൊക്കെ പൂട്ടി പെട്ടിയില് വച്ചോളണം; ചട്ടങ്ങള് പഠിച്ച് കുങ്കി ആനകള് എത്തിപ്പോയ്...!
മുതുമലയില് , കേരളത്തില് നിന്നുള്ള താപ്പാനകളുടെ കുങ്കി പരിശീലനം സമാപിച്ചു. വിനായക ചതുര്ഥി ആഘോഷത്തിനിടെ ഇന്നലെ പൂജകളോടെയാണ് ആനകള്ക്ക് യാത്രയയപ്പ് നല്കിയത്!
മുത്തങ്ങ വന്യജീവി സങ്കേതത്തില് നിന്നുള്ള സൂര്യ, കോടനാട് ക്യാംപിലെ നീലകണ്ഠന്, കോന്നിയില് നിന്നുള്ള സുരേന്ദ്രന് എന്നീ ആനകള്ക്കാണ് മുതുമല കടുവാ സങ്കേതത്തിലെ തെപ്പക്കാട് ആന വളര്ത്തല് ക്യാംപില് വിദഗ്ധ പരിശീലനം നല്കിയത്. ആനകളെ മുതുമലയിലെത്തിച്ചത് ജൂണ് 14-നാണ്.
നാട്ടിലിറങ്ങുന്ന കാട്ടാനകളെ കാട്ടിലേക്ക് തുരത്തുക, അപകടത്തില്പ്പെട്ട കാട്ടാനകള്ക്ക് ചികില്സ നല്കുക, മയക്കുവെടിയേല്ക്കുന്ന കാട്ടാനകളെ ക്യാംപിലെത്തിക്കുക, വനത്തില് പട്രോളിങ്ങ് നടത്തുക തുടങ്ങിയവയിലാണ് പരിശീലനം നല്കിയത്.
കാലാവധിക്ക് മുന്പ് തന്നെ മൂന്ന് ആനകളും ഇതില് മികവു കാണിച്ചതായി പരിശീലകര് പറഞ്ഞു. കാട്ടാനകളെ തുരത്തുന്നതില് മൂന്ന് ആനകള്ക്കും നൂറില് നൂറു മാര്ക്കാണു ലഭിച്ചത്.
യാത്രയയപ്പില് തമിഴ്നാട് ഫോറസ്റ്റ് പ്രിന്സിപ്പല് ചീഫ് കണ്സര്വേറ്റര് രഘുനാഥ്, കേരള പിസിസിഎഫ് പി.കെ. കേശവന്, പാലക്കാട് വൈല്ഡ് ലൈഫ് വാര്ഡന് അജയ്കുമാര്, വയനാട് വന്യജീവിസങ്കേതം വൈല്ഡ് ലൈഫ് വാര്ഡന് എന്.ടി. സാജന് എന്നിവര് പങ്കെടുത്തു.
https://www.facebook.com/Malayalivartha