കളിച്ചും ചിരിച്ചും കളിക്കൂട്ടുകാരെപ്പോലെ മോഡിയും ഒബാമയും
യുഎസ് പ്രസിഡന്റ് ബരാക് ഒബാമയും ഇന്ത്യന്‍ പ്രധാനമന്ത്രി നരേന്ദ്രമോഡിയും ലോക മാധ്യമങ്ങളില്‍ നിറയുന്നു. ലോകത്തെ പ്രബലരായ രണ്ട് ഭരണാധികാരികള്‍ തമ്മിലുള്ള ഒത്തു കൂടല്‍ മറ്റ് ലോക രാഷ്ട്രങ്ങള്‍ വളരെ കൗതുകത്തോടെയും ആകാംക്ഷയോടയുമാണ് നോക്കിക്കാണുന്നത്.
ഇരുവരും തമ്മിലുള്ള സൗഹൃദം വാര്‍ത്തകളില്‍ നിറയുന്നു. ഒരു വര്‍ഷം മുന്‍പു വരെ യുഎസില്‍ വിലക്കപ്പെട്ട മോഡി ഇന്ന് അമേരിക്കയുടെ വലിയ കൂട്ടുകാരനാണ്. അതു കൊണ്ട് തന്നെയാണ് പ്രോട്ടോകോള്‍ ലംഘിച്ചു പോലും തന്റെ പ്രിയ സുഹൃത്തിനെ സ്വീകരിക്കാന്‍ മോഡി വിമാനത്താവളത്തില്‍ എത്തിയത്. ഇതില്‍ മനം നിറഞ്ഞ ഒബാമ തന്റെ സന്തോഷം മറച്ചുവച്ചില്ല.
നമസ്‌തേ, ഈ വിശിഷ്ടമായ ആതിഥ്യത്തിന് ഞങ്ങളുടെ നന്ദി. ഇന്ത്യന്‍ ശൈലിയില്‍ കൈകള്‍ കൂപ്പിക്കൊണ്ട് ഒബാമ മോഡിയോട് നന്ദി പറഞ്ഞു. ഇന്ത്യയോടുള്ള സ്‌നേഹവും ആദരവും പ്രതിഫലിക്കുന്നതായി ഒബാമയുടെ ഓരോ വാക്കും നോക്കും. മേരാ പ്യാര്‍ ഭരാ നമസ്‌കാര്‍ (എന്റെ സ്‌നേഹം നിറഞ്ഞ നമസ്‌കാരം) എന്നു ഹിന്ദിയില്‍ത്തന്നെ പറഞ്ഞും അദ്ദേഹം ഇന്ത്യയെ കയ്യിലെടുത്തു. ഇടപെടലുകളില്‍ മോഡിയും ഒബാമയും തമ്മിലുള്ള അസാധാരണ അടുപ്പവും ഏറെ ശ്രദ്ധേയമായി. മോഡി ഒന്നിലേറെ തവണ ബറാക് എന്ന് അഭിസംബോധന ചെയ്തതും ഒബാമ തിരിച്ച് മോഡി എന്നു വിളിച്ചതും ഇതിനു തെളിവായി. ഒബാമയുമായി താന്‍ നല്ല സൗഹൃദത്തിലാണെന്നു മോഡി തുറന്നുപറയുകയും ചെയ്തു.
അനായാസമായി ഫോണിലൂടെ സംസാരിക്കാന്‍ തക്ക ബന്ധമായി. ഇടയ്ക്ക് ഞങ്ങള്‍ തമാശ പങ്കിടും. ബറാക്കും ഞാനും തമ്മിലുള്ള ഈ രസതന്ത്രം വാഷിങ്ടണും ന്യൂഡല്‍ഹിയും തമ്മിലുള്ളതു മാത്രമല്ല, അമേരിക്കക്കാരും ഇന്ത്യക്കാരും തമ്മിലുള്ളതുകൂടിയാണ്.
ഹൈദരാബാദ് ഹൗസിലെ പുല്‍ത്തകിടിയില്‍ മോഡിക്കൊപ്പം നടക്കാനിറങ്ങിയതും കൗതുകമായി. ഉച്ചയൂണിനു ശേഷമായിരുന്നു പുല്‍ത്തകിടിയിലെ ഉല്ലാസനടത്തം. തുടര്‍ന്ന്, ശബ്ദകോലാഹലങ്ങളൊന്നുമില്ലാത്ത ശാന്തസുന്ദരമായ തണലില്‍ പത്തുമിനിറ്റ് വിശ്രമിക്കാനിരുന്നു. ഒബാമയ്ക്കു കുടിക്കാന്‍ ചായ പകര്‍ന്നുനല്‍കി മോഡി നല്ലൊരു ആതിഥേയനായി. പുല്‍ത്തകിടി നടത്തത്തിനിടെ ഉറക്കത്തെപ്പറ്റിയാണു മോഡിയോടു ചോദിച്ചതെന്ന് ഒബാമ പിന്നീടു വെളിപ്പെടുത്തി. തനിക്കു കിട്ടുന്നതിനേക്കാള്‍ വളരെ കുറച്ചു സമയമേ മോഡി ഉറങ്ങുന്നുള്ളൂവെന്നു മനസ്സിലാക്കിയെന്നും പറഞ്ഞു. പ്രധാനമന്ത്രിയായി ഇത്ര നാളല്ലേ ആയുള്ളൂ. അതുകൊണ്ടാകാം. ആറു വര്‍ഷം കഴിയട്ടെ സ്ഥിതി മെച്ചപ്പെടും. ഒബാമയുടെ തമാശ കേട്ട് സദസില്‍ ചിരിപൊട്ടി. ഇങ്ങനെ പോകുന്നു ഈ കളിക്കൂട്ടുകാരുടെ വിശേഷങ്ങള്‍.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
