കോടതി ഇടപെട്ടു മുസ്ലിം യുവതിയേയും ഹിന്ദു യുവാവിനെയും ഒരുമിപ്പിച്ചു
കോടതി ഇടപെടല് മൂലം മുസ്ലിം യുവതിയേയും ഹിന്ദു യുവാവിനെയും ഒരുമിപ്പിച്ചു. കോടതി ഇടപെട്ടതിനാലാണ് മുസ്ലിം യുവതിക്ക് ഹിന്ദു യുവാവിനൊപ്പം ജീവിക്കാന് സാഹചര്യമൊരുങ്ങിയത്. തന്നെ വിവാഹം കഴിച്ച മുസ്ലിം യുവതിയെ മാതാപിതാക്കള് മറ്റൊരു വിവാഹത്തിന് പ്രേരിപ്പിക്കുന്നുവെന്ന യുവാവിന്റെ പരാതിയെ തുടര്ന്നാണ് കോടതി കര്ശന ഉത്തരവ് പുറപ്പെടുവിച്ചത്. ഹിന്ദു യുവാവിനൊപ്പം ജീവിക്കാന് മുസ്ലിം യുവതിയെ അനുവദിച്ച കോടതി ഇനിയുള്ള ഇവരുടെ ജീവിതത്തില് മാതാപിതാക്കള് അനാവശ്യ ഇടപെടലുകള് നടത്തരുതെന്ന് യുവതിയുടെ കുടുംബത്തിന് കര്ശന താക്കീതും നല്കിയിട്ടുണ്ട്.
കഴിഞ്ഞ ഡിസംബറിലാണ് കേസ് കോടതിയുടെ പരിഗണനയില് ആദ്യമായി എത്തുന്നത്. സ്വമേധയാ ഹിന്ദു യുവാവായ ആകാശിനൊപ്പം ഇറങ്ങിപ്പോകുകയായിരുന്നു താന് എന്ന് പതിനെട്ടുകാരിയായ യുവതി കോടതിയില് ബോധിപ്പിച്ചു. തുടര്ന്ന് ആകാശുമായി വിവാഹം നടത്തിയ ശേഷം യുവതി മടങ്ങിയെത്തുകയായിരുന്നു. അടുത്ത മൂന്നു വര്ഷത്തേക്ക് വിവാഹജീവിതം നയിക്കാന് താത്പര്യമില്ലെന്നും യുവതി കോടതിയില് വ്യക്തമാക്കിയിരുന്നു. തുടര്ന്ന് മാതാപിതാക്കള്ക്കൊപ്പം ജീവിക്കാന് യുവതിയെ അനുവദിച്ചുകൊണ്ട് കോടതി ഉത്തരവിടുകയായിരുന്നു. എന്നാല് മാതാപിതാക്കള്ക്കൊപ്പം ജീവിക്കുന്ന കാലയളവില് പെണ്കുട്ടിയെ മറ്റൊരു വിവാഹത്തിന് യാതൊരു കാരണവശാലും പ്രേരിപ്പിക്കരുതെന്നും കോടതി നിര്ദ്ദേശം നല്കിയിരുന്നു.
എന്നാല് മറ്റൊരു വിവാഹത്തിന് മാതാപിതാക്കള് പെണ്കുട്ടിയുടെമേല് സമ്മര്ദം ചെലുത്തുന്നുണ്ടെന്ന് കാണിച്ച് ആകാശ് ജനുവരിയില് വീണ്ടും കോടതിയെ സമീപിക്കുകയായിരുന്നു. തന്റെ ഭാര്യയെ മാതാപിതാക്കള് ഉത്തര്പ്രദേശിലെ മീററ്റിലെത്തിച്ച് മറ്റൊരു വിവാഹം കഴിപ്പിക്കാന് ശ്രമിക്കുകയാണെന്നായിരുന്നു ആകാശിന്റെ ആരോപണം. തുടര്ന്ന് കോടതിയുടെ നിര്ദേശ പ്രകാരം ഹാജരായ യുവതിയോട് ആരുടെ കൂടെ ജീവിക്കാനാണ് ഇഷ്ടമെന്ന് ആരായുകയും തനിക്ക് ആകാശിനൊപ്പം പോകാനാണ് ഇഷ്ടമെന്ന് യുവതി തുറന്നു പറയുകയും ചെയ്തു.
പെണ്കുട്ടിയുടെ ഇഷ്ടപ്രകാരം ഭര്ത്താവിനൊപ്പം പോകാന് കോടതി അനുവദിക്കുകയും ചെയ്തു. പെണ്കുട്ടിക്ക് പ്രായപൂര്ത്തിയായ സാഹചര്യത്തില് സ്വയം തീരുമാനമെടുക്കാനുള്ള അവകാശമുണ്ടെന്നും മേലില് ഇവരുടെ ജീവിതത്തില് മാതാപിതാക്കള് അനാവശ്യ ഇടപെടലുകള് നടത്തരുതെന്നും കോടതി നിര്ദേശിച്ചു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha