മലയാളികളായ സ്വവര്‍ഗാനുരാഗികള്‍ അമേരിക്കയില്‍ വിവാഹിതരായി. ഡേറ്റിങ് സൈറ്റിലൂടെ പരിചയപ്പെട്ട യുവാക്കളാണ് വേര്‍ പിരിയാന്‍ കഴിയില്ലെന്ന് മനസിലാക്കി വിവാഹം കഴിക്കാന്‍ തീരുമാനിച്ചത്. വീട്ടുകാരുടെ സമ്മതത്തോടെയിരുന്നു ഇവരുടെ വിവാഹം.
ജനുവരി 18നായിരുന്നു കാര്‍ത്തികിന്റെയും സന്ദീപിന്റെയും വിവാഹം. 2012 സെപ്റ്റംബറിലാണ് ഡേറ്റിങ് സൈറ്റില്‍ ഇരുവരും കണ്ടുമുട്ടിയത്. ആദ്യം വല്ലപ്പോഴും മാത്രം അയച്ചിരുന്ന സന്ദേശങ്ങള്‍ പിന്നീട് നിരന്തരമായി. ഒടുവില്‍ സന്ദേശങ്ങളുടെ പ്രവാഹം തന്നെയായി. 2012 നവംബറിലാണ് രണ്ടുപേരും ആദ്യമായി കണ്ടത്. പിന്നീട് പലപ്പോഴും ഇരുവരും ഒന്നിച്ചു കഴിഞ്ഞു.
മാസങ്ങള്‍ ഏറെക്കഴിഞ്ഞ് 2013 മേയിലാണ് ഇരുവരും വീടുകളില്‍ കാര്യം അവതരിപ്പിച്ചത്. ചില്ലറ എതിര്‍പ്പുകള്‍ ഉണ്ടായെങ്കിലും വിവാഹത്തിന് വീട്ടുകാര്‍ സമ്മതിച്ചു. സാധാരണ കല്യാണം പോലെ തന്നെയായിരുന്നു ഇവരുടെ വിവാഹവും. കഴിഞ്ഞ വര്‍ഷം ഫെബ്രുവരിയിലായിരുന്നു ഇരുവരുടെയും വിവാഹനിശ്ചയം. അന്നു കുറച്ച് ബന്ധുക്കള്‍ മാത്രമേ പങ്കെടുത്തുള്ളു. വിവാഹ നിശ്ചയം കഴിഞ്ഞ് ഒരു വര്‍ഷം കഴിഞ്ഞായിരുന്നു വിവാഹം.
വിവാഹത്തിനുള്ള വസ്ത്രങ്ങള്‍ തെരഞ്ഞെടുക്കുലും ലോകമെമ്പാടുമുള്ള ബന്ധുക്കളെ ക്ഷണിക്കലും വിവാഹത്തിനുള്ള ആചാരരീതികള്‍ തീരുമാനിക്കലും എല്ലാം ഇരുവരും ചേര്‍ന്നായിരുന്നു. ഒടുവില്‍ ബന്ധുക്കളുടെയും സൃഹൃത്തുക്കളുടെയും അനുഗ്രഹാശിസുകളോടെ ഇരുവരും ദാമ്പത്യ ജീവിതം ആരംഭിച്ചു.
കുടുംബത്തില്‍ സവിശേഷമായ വിവാഹം നടക്കുന്നതറിഞ്ഞ് ലോകത്തിന്റെ വിവിധ ഭാഗങ്ങളിലുള്ള ബന്ധുക്കള്‍ ചടങ്ങിനായി ഒത്തുകൂടിയിരുന്നു. ജനുവരി 18നാണു വിവാഹം നടന്നതെങ്കിലും ഇപ്പോഴാണ് പുറംലോകമറിയുന്നത്. കേരളത്തിലെ സ്വവര്‍ഗാനുരാഗികളുടെ ഓണ്‍ലൈന്‍ ഗ്രൂപ്പായ ക്വീറലയാണ് കഴിഞ്ഞ ദിവസം ഇവരുടെ വിവാഹചിത്രങ്ങള്‍ പുറത്തുവിട്ടത്. വിവാഹത്തിന്റെ വീഡിയോ യൂട്യൂബില്‍ പോസ്റ്റ് ചെയ്തിട്ടുമുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha