ഫൊട്ടോഗ്രഫര്‍ ക്യാമറ എടുത്തപ്പോള്‍ തോക്കാണെന്നു കരുതി ഭയപ്പെട്ട് ഇരുകൈകളും ഉയര്‍ത്തി കീഴടങ്ങുന്ന ഒരു കൊച്ചു സിറിയന്‍ ബാലികയുടെ ചിത്രം അടുത്തിടെ വൈറലായിരുന്നു

എന്നാല്‍ ഇതാ ബ്രസീലില്‍ നിന്നുമുള്ള മറ്റൊരു കൗതുകകരമായ കീഴടങ്ങലിന്റെ ചിത്രം! തെക്കന്‍ ബ്രസീലിലെ വാര്‍ഗെം ഗ്രാന്‍ഡേ എന്ന സ്ഥലത്തെ ഒരു വീടു കേന്ദ്രീകരിച്ച് മയക്കുമരുന്നു വില്‍പ്പന നടക്കുന്നുണ്ടെന്ന് പോലീസിന് അറിവ് കിട്ടി. ഒരു സംഘം പോലീസുകാര്‍ വീടുവളഞ്ഞു. അവരുടെ മുന്നിലേക്ക് അവിടത്തെ വളര്‍ത്തുനായ കുരച്ചുചാടുകയാണുണ്ടായത്. ആ പട്ടിയേക്കൊണ്ട് തങ്ങള്‍ക്ക് കാര്യമായ ജോലിതടസ്സം ഉണ്ടാകുമല്ലോ എന്നുറപ്പിച്ചു നില്‍ക്കയായിരുന്നു പോലീസുകാര്‍. എന്നാല്‍ പോലീസ് വീടുവളഞ്ഞെന്നറിഞ്ഞതോടെ മയക്കുമരുന്നു സംഘത്തിലുള്ള യജമാനന്‍മാരെല്ലാം ഒരെതിര്‍പ്പുമില്ലാതെ കീഴടങ്ങാന്‍ തയ്യാറായി. പോലീസുകാര്‍ക്കുനേരെ കുരച്ചുചാടുന്ന നായയുടെ അരികിലൂടെ വന്ന് പോലീസുകാര്‍ക്കു മുമ്പില്‍ മുഖം നിലത്തമര്‍ത്തി തറയില്‍കിടന്നുകൊണ്ട് തങ്ങള്‍ കീഴടങ്ങുകയാണെന്ന് അറിയിച്ചു.

ഇതുകണ്ടുനിന്ന പട്ടിയും പിന്നെ മടിച്ചുനിന്നില്ല. കുരയൊക്കെ മതിയാക്കി ഇറങ്ങിവന്ന് യജമാനന്‍മാരോടൊപ്പം കിടന്നു. ഉറങ്ങാന്‍ കിടക്കുന്നതുപോലെ വെറുതേയങ്ങ് കിടക്കുകയായിരുന്നില്ല. ബ്രസീലിലെ മൃഗങ്ങളുടെ മനശാസ്ത്രജ്ഞനും, നായ പരിശീലകനുമായ ബാര്‍ണി റികോ-യാണ് നായയുടെ കിടപ്പിന്റെ മനശ്ശാസ്ത്രം വെളിപ്പെടുത്തിയത്. അതിന്റെ വയര്‍ഭാഗം കാണത്തക്ക രീതീയില്‍ കൈകാലുകള്‍ ഒതുക്കിവച്ച് പട്ടികള്‍ മലര്‍ന്നുകിടക്കുകയാണെങ്കില്‍ സമ്പൂര്‍ണ്ണമായി കീഴടങ്ങുകയാണെന്നും പ്രത്യാക്രമണം നടത്തുകയില്ലെന്നും  അറിയിക്കാന്‍ അവ ശ്രമിക്കുകയാണത്രേ! തന്റെ മുമ്പിലുള്ള ശത്രുവിനെ നോക്കാതെ എതിര്‍ദിശയിലേക്ക് മുഖം തിരിക്കുന്നതും കീഴടങ്ങലിന്റെ ലക്ഷണമാണത്രേ.

ഏതായാലും പട്ടിയുടെ ഈ കീഴടങ്ങല്‍ ഇപ്പോള്‍ ബ്രസീലില്‍ വൈറലാണ്. പോലീസുകാര്‍ പക്ഷേ, കീഴടങ്ങിയ യജമാനന്‍മാരെ മാത്രമേ അറസ്റ്റു ചെയ്തുകൊണ്ടു പോയുള്ളൂ!

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha