വിശ്വാസം അതല്ലേ എല്ലാം... അതിനാല്‍ വിശ്വാസം കളഞ്ഞു കുളിക്കാന്‍ കല്യാണ്‍ തയ്യാറായില്ല. തുടര്‍ന്ന് വിവാദ പരസ്യം പിന്‍വലിച്ചു. 
ഐശ്വര്യാ റായ് മോഡലായി പ്രത്യക്ഷപ്പെടുന്ന ഏറ്റവും പുതിയ പരസ്യചിത്രം, വംശീയ അധിക്ഷേപമാണെന്ന ആരോപണം ഉയര്‍ന്നതിനെ തുടര്‍ന്നാണ് കല്യാണ്‍ ജുവലേഴ്‌സ് പിന്‍വലിച്ചത്.
രാജകുമാരിയുടെ വേഷത്തില്‍ ഇരിക്കുന്ന ഐശ്വര്യക്ക് പിന്നില്‍ കറുത്ത് മെലിഞ്ഞ ബാലന്‍ കുട പിടിക്കുന്നതാണ് ചിത്രത്തില്‍ കാട്ടിയിരിക്കുന്നത്. ചിത്രത്തില്‍ വംശീയ അധിക്ഷേപം കലര്‍ന്നിട്ടുണ്ട് എന്നാരോപിച്ച്, ജ്വല്ലറിയുടെ ബ്രാന്റ് അംബാസഡര്‍ കൂടിയായ ഐശ്വര്യാറായിക്ക് ഒരു പറ്റം സാമൂഹ്യപ്രവര്‍ത്തകര്‍ കത്തും അയച്ചിരുന്നു. എന്നാല്‍ ഫോട്ടോ സെഷനില്‍, താന്‍ തനിച്ചിരിക്കുന്ന ഫോട്ടോയാണ് എടുത്തതെന്നാണ് താരം ഇവര്‍ക്കു നല്‍കിയ മറുപടി. ഷൂട്ടിംഗ് സമയത്തെ യഥാര്‍ഥ ഫോട്ടോയും ഇവര്‍ പുറത്തുവിട്ടു.
ഇതേ തുടര്‍ന്നാണ് പരസ്യം പ്രസിദ്ധീകരിച്ചതില്‍ ഖേദം പ്രകടിപ്പിച്ച് ജുവലറിക്കാര്‍ അവരുടെ ഫേസ്ബുക്ക് പേജില്‍ പോസ്റ്റ് ഇട്ടത്. രാജകീയ സൗന്ദര്യത്തെ പ്രതിഫലിപ്പിക്കുക എന്നതായിരുന്നു പരസ്യത്തിന്റെ ആശയമെന്നും ഇത് ഏതെങ്കിലും വ്യക്തിയെയോ സ്ഥാപനത്തെയോ മുറിവേല്‍പിച്ചു എങ്കില്‍ അഗാധമായ ഖേദം പ്രകടിപ്പിക്കുന്നുവെന്നും പോസ്റ്റിലൂടെ അവര്‍ വ്യക്തമാക്കി. തങ്ങളുടെ എല്ലാ പ്രചാരണ പരിപാടികളില്‍ നിന്നും ഈ ചിത്രം പിന്‍വലിച്ചുവരികയാണെന്നും അവര്‍ അറിയിച്ചിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha