സുപ്രിം കോടതി ചീഫ് ജസ്റ്റിസില്‍ നിന്നും രാജ്യസഭാ അംഗത്വം നേടിയാണ് രാഷ്ട്രീയത്തില്‍ പ്രവേശിച്ചതു മുതല്‍ എന്നും വിവാദത്തിലാണ് മുന്‍ ചീഫ് ജസ്റ്റിസ് രഞ്ജന്‍ ഗൊഗോയ്. ഇപ്പോള്‍ അദ്ദേഹത്തിന്റെ പേര് ഉയര്‍ന്ന് കേള്‍ക്കുന്നത് അസാമിലെ ബി.ജെ.പിയുടെ അടുത്ത മുഖ്യമന്ത്രി സ്ഥാനാര്‍ഥിയായിട്ടാണ്. എന്നാല്‍ ഇതിനെ വെറും ഊഹാപോഹങ്ങളെന്ന് പറഞ്ഞ് നിഷേധിക്കുകയാണ് രഞ്ജന്‍ ഗൊഗോയ്. അടുത്ത വര്‍ഷം നടക്കാന്‍ പോകുന്ന അസം നിയമസഭാ തിരഞ്ഞെടുപ്പില്‍ ഗൊഗോയ് മുഖ്യമന്ത്രി സ്ഥാനാര്‍ഥി ആയേക്കുമെന്ന് പറഞ്ഞത് കോണ്‍ഗ്രസ് നേതാവും മുന്‍ അസം മുഖ്യമന്ത്രിയുമായ തരുണ്‍ ഗൊഗോയ് ആണ്. ഇതോടെയാണ് ഇക്കാര്യത്തില്‍ ചര്‍ച്ചയും വിവാദവും കത്തി പടര്‍ന്നത്.

എന്നാല്‍ താനൊരു രാഷ്ട്രീയക്കാരനല്ല. അത്തരമൊരു ആഗ്രഹമോ ഉദ്ദേശമോ ഇല്ല. വാഗ്ദാനങ്ങളുമായി ആരും തന്നെ സമീപിച്ചിട്ടില്ലെന്നും രഞ്ജന്‍ ഗൊഗോയ് പ്രതികരിച്ചു. രാഷ്ട്രീയപാര്‍ട്ടിയുടെ ഭാഗമായി തിരഞ്ഞെടുക്കപ്പെടുന്ന ആളും രാജ്യസഭയിലേക്ക് നാമനിര്‍ദേശം ചെയ്യപ്പെട്ട ആളും തമ്മിലുള്ള വ്യത്യാസം ജനങ്ങള്‍ മനസിലാക്കാത്തത് ദൗര്‍ഭാഗ്യകരമാണെന്നും അദ്ദേഹം പറഞ്ഞു. രാജ്യസഭയിലേക്കുള്ള നാമനിര്‍ദ്ദേശം സ്വീകരിച്ചത് ബോധപൂര്‍വമാണെന്നും അതിലുടെ സ്വതന്ത്രമായി വിഷയങ്ങളില്‍ തന്റെ അഭിപ്രായം രേഖപ്പെടുത്താന്‍ സാധിക്കും. അങ്ങനെയുള്ളപ്പോള്‍ എങ്ങനെയാണ് താനൊരു രാഷ്ട്രീയക്കാരനായി മാറുന്നതെന്നും അദ്ദേഹം ചോദിച്ചു.

ഓഗസ്റ്റ് 22 നാണ് തരുണ്‍ ഗൊഗോയ് ആരോപണം ഉന്നയിച്ചത്. മുഖ്യമന്ത്രി സ്ഥാനത്തേക്കുള്ള ബിജെപിയുടെ സ്ഥാനാര്‍ഥി പട്ടികയില്‍ രഞ്ജന്‍ ഗൊഗോയുടെ പേരുണ്ടെന്നാണ് എനിക്ക് ചില കേന്ദ്രങ്ങളില്‍ നിന്ന് അറിയാന്‍ കഴിഞ്ഞത്. അസം മുഖ്യമന്ത്രി സ്ഥാനാര്‍ഥിയായി അദ്ദേഹത്തെയാണ് ബിജെപി മുന്‍നിര്‍ത്താനൊരുങ്ങുന്നതെന്ന് ഞാന്‍ സംശയിക്കുന്നു', തരുണ്‍ ഗൊഗോയ് മാധ്യമങ്ങളോട് പറഞ്ഞു. മുന്‍ ചീഫ് ജസ്റ്റിസിന് രാജ്യസഭയിലേക്ക് പോകാനാകുമെങ്കില്‍ അദ്ദേഹം ബിജെപിയുടെ മുഖ്യമന്ത്രി സ്ഥാനാര്‍ഥിയാവാനും തയ്യാറാകുമെന്നും തരുണ്‍ ഗൊഗോയ് പരിഹസിച്ചു. എല്ലാം രാഷ്ട്രീയമാണ്. അയോധ്യ രാം മന്ദിര്‍ കേസിലെ ഗൊഗോയുടെ വിധി പ്രഖ്യാപനത്തില്‍ ബിജെപി സന്തുഷ്ടരായിരുന്നു. അങ്ങനെ പടിപടിയായി പതിയെ രാജ്യസഭാ സ്ഥാനാര്‍ഥിത്വവും സ്വീകരിച്ച് അദ്ദേഹം രാഷ്ട്രീയത്തിലേക്ക് രംഗപ്രവേശനം ചെയ്യുകയായിരുന്നു. എന്തുകൊണ്ടാണ് അദ്ദേഹം രാജ്യസഭാ സ്ഥാനാര്‍ഥിത്വം നിഷേധിക്കാതിരുന്നത്. മനുഷ്യാവകാശ സംഘടനയുടെ ചെയര്‍മാനാവാന്‍ അദ്ദേഹത്തിന് എളുപ്പം കഴിയുമായിരുന്നല്ലോ. അദ്ദേഹത്തിന് രാഷ്ട്രീയ മോഹങ്ങളുണ്ടായിരുന്നു. അതുകൊണ്ടാണ് അദ്ദേഹം നാമനിര്‍ദേശം സ്വീകരിച്ചതെന്നും തരുണ്‍ ഗൊഗോയ് ആരോപിച്ചു.

ഈ വര്‍ഷം മാര്‍ച്ച് 19 നാണ് മുന്‍ സുപ്രീം കോടതി ചീഫ് ജസ്റ്റിസ് രഞ്ജന്‍ ഗൊഗോയ് രാജ്യസഭാംഗമായി സത്യപ്രതിജ്ഞ ചെയ്തത്. അതിനെതിരെ പ്രതിപക്ഷ പാര്‍ട്ടികള്‍ വന്‍ പ്രതിഷേധമാണ് നടത്തിയത്. ബി.ജെ.പി സര്‍ക്കാരിന് അനുകൂലമായി വിധി പ്രഖ്യാപനം നടത്തിയതിനുള്ള നന്ദിയായിട്ടാണ് രഞ്ജന്‍ ഗൊഗോയ്ക്ക് രാജ്യസഭാ സീറ്റ് കിട്ടിയതെന്നാണ് പ്രതിപക്ഷ പാര്‍ട്ടികളും പ്രധാന ആരോപണം. ഭരണഘടനയുടെ അടിസ്ഥാന ഘടനയ്‌ക്കെതിരായ ഏറ്റവും ഗുരുതരവും മാപ്പര്‍ഹിക്കാത്തതുമായ ആക്രമണങ്ങളില്‍ ഒന്നാണിതെന്നാണ് അന്ന് കോണ്‍ഗ്രസ് പ്രതികരിച്ചത്.

രഞ്ജന്‍ ഗൊഗോയിയെ രാജ്യസഭാ എംപിയായി നാമനിര്‍ദ്ദേശം ചെയ്തതിനെതിരെ സുപ്രീംകോടതിയില്‍ ഹര്‍ജിയും സമര്‍പ്പിച്ചിരുന്നു. ജുഡിഷ്യല്‍ സംവിധാനത്തില്‍ നിലനില്‍ക്കുന്ന സ്വാതന്ത്ര്യത്തെയും വിശ്വാസ്യതയെ ബാധിക്കുന്ന നടപടിയാണ് ഉണ്ടായതെന്ന് ഹര്‍ജിയില്‍ പറയുന്നു.13 മാസം സുപ്രീം കോടതി ചീഫ് ജസ്റ്റിസ് ആയിരുന്ന ഗൊഗോയി കഴിഞ്ഞ നവംബറിലാണ് സ്ഥാനത്ത് നിന്ന് വിരമിച്ചത്. അയോധ്യ ഭൂമി തര്‍ക്കം,ശബരിമല യുവതി പ്രവേശനം തുടങ്ങിയ നിരവധി കേസുകളില്‍ വിധി പറഞ്ഞ ബെഞ്ചില്‍ ഗോഗോയി അംഗമായിരുന്നു. രാജ്യസഭയിലേക്ക് നാമനിര്‍ദേശം ചെയ്യപ്പെടുന്ന ആദ്യ മുന്‍ സുപ്രീം കോടതി ചീഫ് ജസ്റ്റിസായിരുന്നു ഗൊഗോയി. സുപ്രീം കോടതിയുടെ ചരിത്രത്തില്‍ തന്നെ ആദ്യമായി ലൈംഗിക ആരോപണം നേരിട്ട ചീഫ് ജസ്റ്റിസും രഞ്ജന്‍ ഗൊഗോയി ആയിരുന്നു.

2018 ല്‍ ചീഫ് ജസ്റ്റിസ് ആയിരുന്ന ദീപക് മിശ്രയുടെ നടപടികളില്‍ പ്രതിഷേധിച്ച് മുതിര്‍ന്ന ജസ്റ്റിസ് മാരായിരുന്ന രഞ്ജന്‍ ഗൊഗോയിയും മദന്‍ ബി ലോകൂറും ജെ ചെല്ലമേശ്വറും കുര്യന്‍ ജോസഫും പരസ്യമായി പത്രസമ്മേളനം വിളിച്ചിരുന്നു. സുപ്രീം കോടതിയുടെ പരമാധികാരത്തെയും നിഷ്പക്ഷതയെയും ബാധിക്കുന്ന നടപടികളാണ് ദീപക് മിശ്രയുടെ ഭാഗത്ത് നിന്നും ഉണ്ടാകുന്നതെന്നും ഇവര്‍ ആരോപിച്ചിരുന്നു. ഇത് അന്ന് ഏറെ വിവാദമായിരുന്നു. എന്നാല്‍ പിന്നീട് ചീഫ് ജസ്റ്റിസായപ്പോള്‍ അദ്ദേഹം നിലപാടുകലില്‍ നിന്നും പിന്നോട്ടു പോകുന്നതും നാം കണ്ടു.

രാജ്യത്തിന്റെ 46-ാമത് ചീഫ് ജസ്റ്റിസായിരുന്നു ഗോഗോയ്. അസം സ്വദേശിയായ ഗോഗോയ് 1954ലാണ് ജനിച്ചത്. 2001ല്‍ അദ്ദേഹം ഗുവഹത്തി ഹൈക്കോടതി ജഡ്ജിയായി നിയമിതനായി. തുടര്‍ന്ന് പഞ്ചാബ്ഹരിയാന ഹൈക്കോടതിയിലും ജഡ്ജിയായി സേവനം അനുഷ്ഠിച്ചു. 2011ല്‍ പഞ്ചാബ്-ഹരിയാന ഹൈക്കോടതി ചീഫ് ജസ്റ്റിസായി. അടുത്ത വര്‍ഷം തന്നെ അദ്ദേഹത്തെ സുപ്രീംകോടതി ജഡ്ജിയായി നിയമിച്ചു. 2019 നവംബര്‍ 17ന് വിരമിച്ചു. ചീഫ് ജസ്റ്റീസ് പദവി ഒഴിഞ്ഞ ശേഷം മറ്റ് പദവികള്‍ ഒന്നും ഏറ്റെടുക്കില്ല എന്ന് അദ്ദേഹം വ്യക്തമാക്കിയിരുന്നു. എന്നാല്‍ അദ്ദേഹം പിന്നീട് രാജ്യസഭാംഗത്വം നേടി. ഇതു പോലെ തന്നെ ഇപ്പോള്‍ നിഷേധിക്കുന്നുണ്ടെങ്കിലും പിന്നീട് അസാം മുഖ്യമന്ത്രിയായി രഞ്ജന്‍ ഗൊഗോയെ കണ്ടുകൂടായെന്നില്ല.