എറണാകുളം ജില്ലയിലെ ആനച്ചാലില്‍ വാഹനപരിശോധനയ്ക്കിടെ, ഹെല്‍മറ്റ് ധരിക്കാതെ വന്ന വിദ്യാര്‍ഥികളെ പൊലീസ് ഉദ്യോഗസ്ഥര്‍ കൈ കാണിച്ചു നിര്‍ത്തി. കോവിഡ് കാലമായതു കൊണ്ടും വിദ്യാര്‍ഥികള്‍ ആയതിനാലും ചെറിയ പിഴ മാത്രം എഴുതി രസീത് നല്‍കി.

എന്നാല്‍ വാഹനമോടിച്ച വിദ്യാര്‍ഥി പിഴ അടയ്ക്കാനായി നോക്കിയപ്പോള്‍ പൈസ തികഞ്ഞില്ല. ബാഗും പഴ്‌സും കൂട്ടുകാരന്റെ പോക്കറ്റും തപ്പിപ്പെറുക്കിയിട്ടും ഒരു 50 രൂപ നോട്ടും ബാക്കി 20, 10, രണ്ട് 5 രൂപ നാണയങ്ങള്‍ ഇത്രയുമേ ഉണ്ടായിരുന്നുള്ളൂ. ഇത് അവര്‍ പൊലീസിനു നല്‍കി. അപ്പോഴാണ് ഇവരുടെ കൈവശം ആവശ്യത്തിന് പണമില്ലെന്ന് പൊലീസ് ഉദ്യോഗസ്ഥര്‍ക്കു മനസ്സിലായത്. വിദ്യാര്‍ഥികളുടെ നിസ്സഹായാവസ്ഥ കേട്ടതോടെ പണം തിരികെ കൊടുത്ത് ഇവരെ വിട്ടയച്ചു.

എന്നാല്‍ ഹെല്‍മറ്റ് വച്ച് ഇതേ വിദ്യാര്‍ഥികള്‍ 2 മണിക്കൂര്‍ കഴിഞ്ഞ് ആലങ്ങാട് സ്റ്റേഷനിലെത്തി. പിഴ അടയ്ക്കാന്‍ കൂട്ടുകാരോട് കടം വാങ്ങിയ 200 രൂപയും അവരുടെ കൈവശമുണ്ടായിരുന്നു. പിഴ അടയ്ക്കാന്‍ വന്നതാണെന്ന് വിദ്യാര്‍ഥികള്‍ അറിയിച്ചെങ്കിലും പൊലീസ് പണം വാങ്ങിയില്ല; പകരം, വാഹനമോടിക്കുമ്പോള്‍ കൃത്യമായ നിയമങ്ങള്‍ പാലിക്കണമെന്ന ഉപദേശം നല്‍കി അവരെ തിരിച്ചയച്ചു.

എസ്‌ഐ എം.എസ്.ഫൈസല്‍ തന്റെ പക്കലുള്ള പണമെടുത്തു പിഴത്തുകയായി മാറ്റിവച്ചിരുന്നു. എസ്‌ഐ വേണുഗോപാല്‍, സിപിഒ ജനീഷ് ചേരമ്പിള്ളി എന്നിവരും പരിശോധന സംഘത്തിലുണ്ടായിരുന്നു. പൊലീസ് സ്റ്റേഷനില്‍ വച്ച് വിദ്യാര്‍ഥികള്‍ ആത്മാര്‍ഥമായി പറഞ്ഞു; ഇനി ഞങ്ങള്‍ ഹെല്‍മറ്റില്ലാതെ വാഹനം ഓടിക്കില്ല!