കഴിഞ്ഞ ദിവസം പുറത്തിറങ്ങിയ ഫ്രീഡം അറ്റ് മിഡ്നെറ്റ് എന്ന ഹ്രസ്വചിത്രം -പ്രേക്ഷകശ്രദ്ധ നേടി മുന്നേറുകയാണ്. ചിത്രത്തിനെ കുറിച്ച് പ്രതികരണങ്ങൾ വ്യക്തമാക്കി നിരവധിപേരാണ് രംഗത്ത് എത്തിയത്. ഇപ്പോഴിതാ സിനിമയെക്കുറിച്ച് കുറിപ്പ് പങ്കുവച്ച് രംഗത്ത് എത്തിയിരിക്കുകയാണ് ജോമോൾ ജോസഫ്.

ഫേസ്ബുക്ക് കുറിപ്പ് ഇങ്ങനെ;

ഫ്രീഡം അറ്റ് മിഡ്നെറ്റ് അഥവാ തലയിൽ മുണ്ടിട്ട് നടപ്പിലാക്കുന്ന പുരോഗമനം.
ഫ്രീഡം അറ്റ് മിഡ്നൈറ്റ് കണ്ടു. പലരും പറഞ്ഞതിൽ നിന്നും വിഭിന്നമായ ഒരു ആംഗിൾ ഞാനതിൽ കണ്ടു. ആ ഷോട്ട് ഫിലിം സദാചാര കുലസത്രീ വേർഷനെന്ന് അംഗീകരിച്ചുകൊണ്ട് തന്നെ പറയട്ടെ...  പുരോഗമന വാദികളായ, കപടസദാചാര വാദങ്ങളെ പൊളിച്ചെഴുതണം എന്ന് വാദിക്കുന്ന കുറെ സുഹൃത്തുക്കൾ എനിക്കുണ്ട്. മിക്കവരും വിവാഹിതരും കുടുംബജീവിതം നയിക്കുന്നവരുമാണ്. എന്നാൽ അവരിൽ പലരുംതന്നെ ലൈംഗീക സ്വാതന്ത്ര്യം എന്ന വാദത്തിൽ ഉറച്ചുനിൽക്കുന്നവരും, ഭാര്യയല്ലാതെ മറ്റുപലരുമായും ലൈംഗീക ബന്ധവും റിലേഷൻഷിപ്പുകളും ഒക്കെ കൊണ്ടുപോകുന്നവരോ, ദീർഘകാലമായി മറ്റൊരാളുമായി ഡേറ്റിങ്ങിൽ കഴിയുന്നവരും ഒക്കെയാണ്.
ഇവിടെ ഉയരുന്ന ചില ചോദ്യങ്ങളുണ്ട്.

എന്തുകൊണ്ട് തനിക്ക് ഭാര്യയല്ലാതെ മറ്റൊരു ലൈംഗീക പങ്കാളികൂടെയുണ്ട് എന്നകാര്യം ഭാര്യയിൽ നിന്നും സമൂഹത്തിൽ നിന്നും അവർ മറച്ചുവെക്കുന്നു? ഭർത്താവെന്ന പ്രിവിലേജ് കൽപ്പിച്ചുനൽകുന്ന അധികാരങ്ങളുടെ ഭാഗമായി ലൈംഗീക സ്വാതന്ത്ര്യം അടക്കം പല സ്വാതന്ത്ര്യങ്ങളും പുരുഷൻമാർ മാത്രം കയ്യടക്കുകയും, അത്തരം പുരുഷൻമാർ പോലും സ്വന്തം ഭാര്യയെ സാമൂഹ്യ സദാചാര തിട്ടൂരങ്ങൾക്ക് വിധേയമായി തളച്ചിടുകയും ചെയ്യുന്നു?മിനിമം തന്റെ ഇടപെടലുകളെ കുറിച്ച് പോലും സ്വന്തം ഭാര്യയോട് തുറന്നുപറയാൻ മുതിരാതെ, താനിങ്ങനെയാണ് എന്നത് സ്വന്തം ഭാര്യയെ ബോധിപ്പിക്കാതെ കബളിപ്പിക്കാനും അവർ തയ്യാറാകുന്നു?

ഇതിനെയെല്ലാം പുരോഗമനം, സ്വാതന്ത്ര്യം എന്നീ പുതപ്പുകൾ കൊണ്ട് പൊതിയുമ്പോഴും, അവർ അവരുടെ ഭാര്യമാരെ ചതിക്കുകയാണ് എന്നതല്ലേ യാഥാർത്ഥ്യം? കുടുംബം നോക്കാനും മക്കളെ വളർത്താനും ഉള്ള ഉത്തരവാദിത്തങ്ങൾ മുഴുവനും ഭാര്യയുടെ തലയിൽ കെട്ടിവെച്ച്, കുടുംബത്തിന്റേതായ കെട്ടുപാടുകളിൽ നിന്നും സ്വതന്ത്രമായി സ്വാതന്ത്ര്യത്തിന്റെ ലോകത്തിലേക്ക് ഇറങ്ങിവരുന്ന ഏതൊരു ഭർത്താവിനും ഭാര്യയോട് ചോദിക്കാം നിനക്ക് എന്തിന്റെ കുറവാണ് ഞാൻ വരുത്തിയതെന്ന്. ആ ചോദിക്കുന്നവരുടെ കണ്ണുകളിൽ കാണാനാകാത്ത പല കുറവുകളും മറ്റുള്ള കണ്ണുകൾ കൊണ്ട് നോക്കുമ്പോൾ കാണാനാകും..
പങ്കാളിയായ ഭാര്യക്കും മക്കൾക്കും നിങ്ങളിൽ നിന്നും ലഭിക്കേണ്ട ക്വാളിറ്റി ടൈം, കുട്ടികൾക്ക് ഒരച്ഛനെന്ന നിലയിൽ നഷ്ടപ്പെടുന്ന ലാളനകൾ, മക്കൾക്ക് അവരോടൊപ്പം കളിക്കാനായി അവർക്ക് കിട്ടാത്ത അച്ഛൻ, തീർത്താലും തീർത്താലും തീരാത്ത വീട്ടിലെ ഉത്തരവാദിത്തങ്ങളിൽ നിങ്ങളിൽ നിന്നും ലഭിക്കേണ്ട പിന്തുണ, വീട്ടുത്തരവാദിത്തങ്ങൾ പാരസ്പര്യത്തോടെ ചെയ്തുതീർക്കുന്നതിൽ നിങ്ങൾ പരാജപ്പെടുന്നത്, ഇതിനൊക്കെയപ്പുറം യാതൊരു ഉളുപ്പുമില്ലാതെ ഭാര്യയുടെ മുഖത്ത് നോക്കി അവളോട് കളവുകൾ മാത്രം പറഞ്ഞുകൊണ്ട് ചിരിച്ചുകൊണ്ട് അവളെ ചതിക്കുന്ന ചതിയുണ്ടല്ലോ സാറമ്മാരെ, ആ ചതി തന്നെയാണ് ഇതിലെ ഏറ്റവും ഭീകരമായ ആ ബ്ലാക് മാജിക്.

ചിലർ ചില മിനിമം കാര്യങ്ങൾ ഭാര്യമാര അറിയിക്കും, എനിക്കങ്ങനെ ഒരു സുഹൃത്തുണ്ട്, കേവലം സൌഹൃദം മാത്രമേ അവളുമായുള്ളൂ, ചിലർ പറയും യാത്ര പോകാനായി നിരവധി കൂട്ടുകാരിൽ ഒരാൾ മാത്രമാണ് അവൾ.. ചിലർക്ക് ഒരേ സമയം നിരവധി പങ്കാളികൾ. ചിലർ മിക്കമാസവും യാത്രകൾ പോകും, പക്ഷെ ആ യാത്രകളിലൊന്നും ഭാര്യയെയോ മക്കളെയോ കൂടെ കൂട്ടില്ല. പകരം മറ്റു സ്ത്രീകൾ മാറി ഈ യാത്രയുടെ ഭാഗമാകുകയോ, ഇതിന് മറയായി ചില സുഹൃത്തുക്കളെ കൂടി ബുദ്ധിപരമായി യാത്രയിലേക്ക് ആഡ് ചെയ്യുകയും ചെയ്യാനും ചിലർ മടിക്കില്ല.

ഇങ്ങനെ പുട്ടിന് പീര പോലെ ചില ചില കാര്യങ്ങൾ..
ചില ചില തുമ്പും വാലുകളും..
ചില ചില അർത്ഥ സത്യങ്ങളും..
എന്നാൽ എനിക്ക് അവൾ ലൈംഗീക പങ്കാളിയും കൂടിയാണ് എന്ന് നിങ്ങൾ ഭാര്യയോട് പറയാത്ത പക്ഷം, നിങ്ങൾ നിങ്ങളുടെ ഭാര്യയെ ചതിക്കുക തന്നെയാണ് പ്രിയ്യപ്പെട്ട സുഹൃത്തുക്കളേ..
"നിങ്ങൾക്കിവിടെ എന്തിന്റെ കുറവാ, മട്ടന് മട്ടനില്ലേ, ബിരിയാണിക്ക് ബിരിയാണിയില്ലേ, പട്ടുകുപ്പായത്തിന് പട്ടുകുപ്പായമില്ലേ... " കിളിച്ചുണ്ടൻ മാമ്പഴം എന്ന സിനിമയിൽ ശ്രീനിവാസൻ പറയുന്ന ഈ ഡയലോഗാണ് ഇത്തരം പുരോഗമന സിംഹങ്ങളുടെ മെയിൻ..

വ്യക്തി സ്വാതന്ത്ര്യവും ലൈംഗീക സ്വാതന്ത്ര്യവും നേടാനായി പുറപ്പെട്ടിറങ്ങുമ്പോൾ, തലയിൽ മുണ്ടിട്ട് പോകാതിരിക്കാനുള്ള മിനിമം മര്യാദയെങ്കിലും നിങ്ങൾ കാണിക്കുക. വ്യക്തി സ്വാതന്ത്ര്യവും ലൈംഗീക സ്വാതന്ത്ര്യവും ചുരുക്കം ചിലരുടെ മാത്രം പ്രിവിലേജുകളല്ല, അവരുടെ ഭാര്യമാരും മക്കളും ഉൾപ്പെട്ട ഈ സമൂഹത്തിലെ എല്ലാ മനുഷ്യരുടേയും അവകാശം തന്നെയാണ് വ്യക്തി സ്വാതന്ത്ര്യവും ലൈംഗീക സ്വാതന്ത്ര്യവും.നോട്ട് - കുറെക്കാലം ഒരേയൊരു ഡേറ്റിങ് ഗ്രൂപ്പിൽ അംഗമായി തുടർന്നപ്പോൾ, നേരിട്ട് കണ്ടും കേട്ടും ബോധ്യം വന്ന പുരോഗമനത്തിന്റെ ഹോൾസെയിൽ ഡീലർമാരെയും, റീട്ടെയ്ലർമാരെയും കുറിച്ച് തന്നെയാണ് ഈ എഴുത്ത്.