ഏഷ്യാ കപ്പില്‍ ആവേശമേറിയ പോരാട്ടത്തിനാണ് ഇന്ത്യ സാക്ഷ്യം വഹിച്ചത്. അനായാസം ജയിച്ചു കയറാം എന്ന് കരുതിയ മത്സരത്തില്‍ ഇന്ത്യയെ സമനിലയില്‍ തളച്ച്‌ അഫ്ഗാനിസ്ഥാന്‍. അവസാന ഓവര്‍ വരെ നീണ്ട ആവേശം പോരാട്ടമാണ് സമനിലയില്‍ കലാശിച്ചത്. ടോസ് നേടി ബാറ്റിങ് തിരഞ്ഞെടുത്ത അഫ്ഗാനിസ്ഥാന്‍ നിശ്ചിത 50 ഓവറില്‍ എട്ടു വിക്കറ്റ് നഷ്ടത്തില്‍ 252 റണ്‍സ് എടുത്തപ്പോള്‍, ഇന്ത്യ 49.5 ഓവറില്‍ ഇതേ സ്‌കോറില്‍ എല്ലാവരും പുറത്തായി.

കളി ആരംഭിക്കുമ്ബോള്‍ ടോസ് നേടിയ അഫ്ഗാനിസ്ഥാന്‍ ബാറ്റിങ് തിരഞ്ഞെടുക്കുകയായിരുന്നു. തുടര്‍ന്ന് 50 ഓവറില്‍ എട്ടു വിക്കറ്റ് നഷ്ടത്തില്‍ 252 റണ്‍സെടുക്കുകയായിരുന്നു അവര്‍. മുഹമ്മദ് ഷെഹ്സാദ് സെഞ്ച്വറി നേടുകയും ചെയ്തു (124). രണ്ടാം ഇന്നിംഗ്‌സില്‍ 49 ഓവറുകള്‍ കഴിഞ്ഞപ്പോള്‍ ഇന്ത്യയ്ക്ക് 9 വിക്കറ്റുകള്‍ നഷ്ടമായിരുന്നു. തുടര്‍ന്ന് രണ്ട് പന്ത് ബാക്കി നില്‍ക്കെ ഇന്ത്യയ്ക്ക് ജയിക്കാന്‍ ഒരു റണ്‍ വേണമായിരുന്നു. അഞ്ചാമത്തെ പന്തില്‍ രവീന്ദ്ര ജഡേജയെ അഫ്ഗാനിസ്ഥാന്റെ റാഷിദ് ഖാന്‍ പുറത്താക്കുകയായിരുന്നു.

നേരത്തേ ഫൈനല്‍ മല്‍സരം ലക്ഷ്യമിട്ട ഇന്ത്യ അടിമുടി മാറ്റത്തോടെയാണ് കളത്തിലിറങ്ങിയത്. രോഹിത് ശര്‍മയ്ക്ക് പകരം ധോണി ഇന്നലെ നായകവേഷം കെട്ടിയപ്പോള്‍ ധവാനെയും ഭുവനേശ്വര്‍ കുമാറിനെയും ജസ്പ്രീത് ബൂംറയെയും പുറത്തിരുത്തി മനീഷ് പാണ്ഡെയെയും കെഎല്‍ രാഹുലിനെയും ദീപക് ചാഹറിനെയും സിദ്ധാര്‍ഥ് കൗളിനെയും ഖലീല്‍ അഹമദിനെയും ഇറക്കി കളി മെനഞ്ഞു. നായകവേഷത്തില്‍ ധോണിയുടെ 200ാം മല്‍സരമായിരുന്നു ഇത്. കാപ്റ്റന്‍ സ്ഥാനമൊഴിഞ്ഞ് രണ്ടുവര്‍ഷത്തിനു ശേഷമാണ് ധോണി വീണ്ടും ഇന്ത്യന്‍ നായകനാവുന്നത്.കൂടാതെ ഇന്ത്യയെ നയിക്കുന്ന ഏറ്റവും പ്രായം കൂടിയ നായകനെന്ന നേട്ടവും ധോണി സ്വന്തം പേരിലാക്കി.