ഓസ്‌ട്രേലിയയ്‌ക്കെതിരായ ആദ്യ ട്വന്റി20 മല്‍സരത്തില്‍ ഇന്ത്യയ്ക്ക് 174 റണ്‍സ് വിജയലക്ഷ്യം. ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ ഓസ്‌ട്രേലിയ നാലു വിക്കറ്റ് നഷ്ടത്തില്‍ 159 റണ്‍സെടുത്തു. മഴ കളിതടസപ്പെടുത്തിയപ്പോള്‍ ഡക്‌വര്‍ത്ത് ലൂയിസ് നിയമപ്രകാരം ഇന്ത്യയുടെ വിജയലക്ഷ്യം 17 ഓവറില്‍ 174 ആയി പുനര്‍നിര്‍ണയിക്കുകയായിരുന്നു. 24 പന്തില്‍ നാലു പടുകൂറ്റന്‍ സിക്‌സുകളുടെ അകമ്പടിയോടെ 46 റണ്‍സെടുത്ത ഗ്ലെന്‍ മാക്‌സ്‌വെലാണ് ഓസീസിന്റെ ടോപ് സ്‌കോറര്‍. നാലാം വിക്കറ്റില്‍ മാര്‍ക്കസ് സ്‌റ്റോയ്‌നിസിനൊപ്പം മാക്‌സ്‌വെല്‍ കൂട്ടിച്ചേര്‍ത്തത് 78 റണ്‍സാണ്.

മാക്‌സ്‌വെലിനു പുറമെ ഓപ്പണര്‍മാരായ ഡാര്‍സി ഷോര്‍ട്ട് (ഏഴ്), ആരോണ്‍ ഫിഞ്ച് (27), ക്രിസ് ലിന്‍ (37) എന്നിവരാണ് ഓസീസ് നിരയില്‍ പുറത്തായത്. ഇന്ത്യയ്ക്കായി കുല്‍ദീപ് യാദവ് രണ്ടും ജസ്പ്രീത് ബുമ്ര, ഖലീല്‍ അഹമ്മദ് എന്നിവര്‍ ഓരോ വിക്കറ്റും വീഴ്ത്തി. ഇന്ത്യന്‍ താരം ക്രുനാല്‍ പാണ്ഡ്യ നാല് ഓവറില്‍ 55 റണ്‍സ് വഴങ്ങിയപ്പോള്‍, ഖലീല്‍ അഹമ്മദ് മൂന്ന് ഓവറില്‍ 42 റണ്‍സ് വഴങ്ങി. ഫീല്‍ഡിങ്ങിലും അടിതെറ്റിയ ഇന്ത്യന്‍ നിരയില്‍ ക്യാപ്റ്റന്‍ വിരാട് കോഹ്‌ലി, ഖലീല്‍ അഹമ്മദ് എന്നിവര്‍ ഓരോ ക്യാച്ചും കൈവിട്ടു.

മഴ പെയ്യാന്‍ തുടങ്ങുമ്പോള്‍ 16.1 ഓവറില്‍ മൂന്നിന് 153 റണ്‍സ് എന്ന നിലയിലായിരുന്നു ഓസ്‌ട്രേലിയ. എന്നാല്‍, മഴ നീണ്ടതോടെ മല്‍സരം 17 ഓവറാക്കി ചുരുക്കാന്‍ അംപയര്‍മാര്‍ തീരുമാനിച്ചതോടെ പിന്നീട് ഓസീസിനു നേരിടേണ്ടി വന്നത് അഞ്ചു പന്തുകള്‍ മാത്രം. മഴയ്ക്കു ശേഷമുള്ള ആദ്യ പന്തില്‍ മാക്‌സ്‌വെല്ലിനെ പുറത്താക്കിയ ബുമ്ര ഓസീസ് ബാറ്റിങ്ങിനെ നിയന്ത്രിച്ചു നിര്‍ത്തി. മഴയ്ക്കു ശേഷമുള്ള അഞ്ചു പന്തുകളില്‍ ബുമ്ര വിട്ടുകൊടുത്തത് അഞ്ചു റണ്‍സ് മാത്രം. സ്‌റ്റോയ്‌നിസ് 19 പന്തില്‍ 33 റണ്‍സോടെയും മക്‌ഡെര്‍മോട്ട് മൂന്നു പന്തില്‍ രണ്ടു റണ്‍സോടെയും പുറത്താകാതെ നിന്നു.

നേരത്തെ, ടോസ് നേടിയ ഇന്ത്യന്‍ ക്യാപ്റ്റന്‍ വിരാട് കോഹ്‌ലി ബോളിങ് തിരഞ്ഞെടുക്കുകയായിരുന്നു. ഡാര്‍സി ഷോര്‍ട്ട് - ആരോണ്‍ ഫിഞ്ച് സഖ്യം ഭേദപ്പെട്ട തുടക്കം സമ്മാനിച്ചെങ്കിലും സ്‌കോര്‍ 24-ല്‍ നില്‍ക്കെ ആദ്യ ബോളിങ് മാറ്റമായെത്തിയ ഖലീല്‍ അഹമ്മദ് ഷോര്‍ട്ടിനെ പുറത്താക്കി. 12 പന്തില്‍ ഒരു ബൗണ്ടറിയോടെ ഏഴു റണ്‍സെടുത്ത ഷോര്‍ട്ടിനെ കുല്‍ദീപ് യാദവ് ക്യാച്ചെടുത്താണ് മടക്കിയത്. ഇതിനിടെ വ്യക്തിഗത സ്‌കോര്‍ ഏഴില്‍ നില്‍ക്കെ ആരോണ്‍ ഫിഞ്ചിനെ ബുമ്രയുടെ പന്തില്‍ ഇന്ത്യന്‍ നായകന്‍ വിരാട് കോഹ്‌ലി വിട്ടുകളഞ്ഞു.

എന്നാല്‍, ജീവന്‍ കിട്ടിയത് മുതലാക്കി അധികം മുന്നേറാന്‍ ഫിഞ്ചിനായില്ല. സ്‌കോര്‍ 64-ല്‍ നില്‍ക്കെ കുല്‍ദീപ് യാദവിന്റെ പന്തില്‍ ഖലീല്‍ അഹമ്മദിനു ക്യാച്ച് സമ്മാനിച്ച് ഫിഞ്ച് മടങ്ങി. 24 പന്തില്‍ മൂന്നു ബൗണ്ടറി സഹിതം 27 റണ്‍സായിരുന്നു ഫിഞ്ചിന്റെ സമ്പാദ്യം. മറുവശത്ത് തകര്‍ത്തടിച്ച് മുന്നേറിയ ക്രിസ് ലിന്നിനെയും കുല്‍ദീപ് സ്വന്തം ബോളിങ്ങില്‍ ക്യാച്ചെടുത്തു മടക്കിയതോടെ മൂന്നിന് 75 റണ്‍സ് എന്ന നിലയിലായി ഓസീസ്. 20 പന്തില്‍ ഒരേയൊരു ബൗണ്ടറിയും നാലു പടുകൂറ്റന്‍ സിക്‌സും സഹിതം 37 റണ്‍സെടുത്താണ് ലിന്‍ മടങ്ങിയത്. ഇതിനുശേഷമായിരുന്നു ഇന്ത്യന്‍ ബോളര്‍മാരെ തലങ്ങും വിലങ്ങും പ്രഹരിച്ച മാക്‌സ്‌വെല്‍-സ്‌റ്റോയ്‌നിസ് കൂട്ടുകെട്ട് പിറന്നത്.