ഇംഗ്ലണ്ടിനെതിരായ ഒന്നാം ക്രിക്കറ്റ്​ ടെസ്റ്റില്‍ ഇന്ത്യക്ക്​ 95 റണ്‍സിന്‍റെ ഒന്നാം ഇന്നിങ്​സ്​ ലീഡ്​. അര്‍ധസെഞ്ച്വറി നേടിയ കെ.എല്‍. രാഹുലിന്‍റെയും (84) രവീന്ദ്ര ജദേജയുടെയും (56) മികവില്‍ ഇന്ത്യ 278 റണ്‍സെടുത്തു. ആദ്യ ദിവസം ഇന്ത്യ ഇംഗ്ലണ്ടിനെ 183 റണ്‍സിന്​ പുറത്താക്കിയിരുന്നു.

മഴ തടസപ്പെടുത്തിയ രണ്ടാം ദിനം നാലിന്​ 125 റണ്‍സെന്ന നിലയിലായിരുന്നു ഇന്ത്യ കളി അവസാനിപ്പിച്ചത്​. 57 റണ്‍സുമായി രാഹുലും ഏഴു റണ്‍സുമായി ഋഷഭ്​ പന്തുമായിരുന്നു ക്രീസില്‍.

പന്ത്​ വേഗത്തില്‍ 25 റണ്‍സ്​ സ്​കോര്‍ ബോര്‍ഡില്‍ ചേര്‍ത്തുവെങ്കിലും മൂന്നാം ദിവസം ഒലി റോബിന്‍സണിന്​ വിക്കറ്റ്​ സമ്മാനിച്ച്‌​ മടങ്ങി. ജദേജ 16ാം ടെസ്റ്റ്​ അര്‍ധശതകം തികച്ചെങ്കിലും ബൂംറ (28), ശര്‍ദുല്‍ ഠാക്കൂര്‍ (0)​, മുഹമ്മദ്​ ഷമി (28) എന്നിവരുടെ വിക്കറ്റുകള്‍ വേഗത്തില്‍ പിഴുത്​ ഇംഗ്ലണ്ട്​ ഇന്ത്യയെ കൂറ്റന്‍ ലീഡില്‍ നിന്ന്​ തടുത്തു. മുഹമ്മദ്​ സിറാജ്​ ഏഴു റണ്‍സുമായി പുറത്താകാതെ നിന്നു.

ഒലി റോബിന്‍സണ്‍ ടെസ്റ്റിലെ കന്നി അഞ്ചുവിക്കറ്റ്​ നേട്ടം സ്വന്തമാക്കി. അതേ സമയം നാലു വിക്കറ്റ്​ പിഴുത വെറ്ററന്‍ പേസര്‍ ജെയിംസ്​ ആന്‍ഡേഴ്​സണ്‍ ടെസ്റ്റിലെ ഏറ്റവും മികച്ച മൂന്നാമത്തെ വിക്കറ്റ്​ വേട്ടക്കാരനായി മാറി. രാഹുലിനെ പുറത്താക്കിയാണ്​ ജിമ്മി നാഴികക്കല്ല്​ പിന്നിട്ടത്​. ഇന്ത്യന്‍ സ്​പിന്നര്‍ അനില്‍ കുംബ്ലെയെയാണ്​ (619) മറികടന്നത്​. മുത്തയ്യ മുരളീധരനും (800) ഷെയ്​ന്‍ വോണും (708) മാത്രമാണ്​ ഇനി 39കാരന്‍റെ മുന്നിലുള്ളത്​.