ഇന്ത്യന്‍ പ്രീമിയര്‍ ലീഗിലേക്ക്​ ആവേശം വിതറി ടീമുകള്‍ എത്തിത്തുടങ്ങി. മുംബൈ ഇന്ത്യന്‍സ്​, ചെന്നൈ സൂപ്പര്‍കിങ്​സ്​ താരങ്ങളാണ്​ വെള്ളിയാഴ്​ച യു.എ.ഇയിലെത്തിയത്​. മറ്റ്​ ടീമുകള്‍ അടുത്ത ദിവസങ്ങളിലായി യു.എ.ഇയിലേക്കെത്തും. കോവിഡിനെ തുടര്‍ന്ന്​ ഇന്ത്യയില്‍ പാതിവഴിയില്‍ നിലച്ച ടൂര്‍ണമെന്‍റിന്റെ ബാക്കി മത്സരങ്ങള്‍ സെപ്​റ്റംബര്‍ 19 മുതലാണ്​ പുനരാരംഭിക്കുന്നത്​.

ദുബൈ, അബൂദബി, ഷാര്‍ജ എന്നിവിടങ്ങളിലാണ്​ മത്സരങ്ങള്‍. ദുബൈ ടി.എച്ച്‌​ 8 പാമിലാണ്​ ചെന്നൈ ടീം തങ്ങുന്നത്​. ചെന്നൈ നായകന്‍ എം.എസ്​. ധോണിയും ടീമിനൊപ്പം എത്തിയിട്ടുണ്ട്​. രോഹിത്​ അടക്കം വിദേശ പര്യടനങ്ങളിലും മറ്റ്​ ടൂര്‍ണ​െമന്‍റുകളിലും കളിക്കുന്ന താരങ്ങള്‍ ​വൈകി മാത്രമെ ടീമിനൊപ്പം ചേരൂ.

യു.എ.ഇയിലെ കാലാവസ്​ഥയുമായി പൊരുത്തപ്പെടുന്നതിനാണ്​ ഒരുമാസം മുന്‍പേ ടീമുകള്‍ എത്തിയത്​. യു.എ.ഇയില്‍ ഇപ്പോള്‍ കനത്ത ചൂടായതിനാല്‍ ഷെഡ്യൂളില്‍ ഉച്ച മത്സരങ്ങള്‍ പരമാവധി ഒഴിവാക്കിയിട്ടുണ്ട്​. എങ്കിലും താരങ്ങള്‍ക്ക്​ പകല്‍ സമയത്തും പരിശീലനമുണ്ടാകും. കഴിഞ്ഞ സീസണിലും ടീമുകള്‍ ഒരുമാസം മുന്‍പേ എത്തിയിരുന്നു. 31 മത്സരങ്ങളാണ്​ ബാക്കിയുള്ളത്​. 13 മത്സരം ദുബൈയിലും പത്തെണ്ണം ഷാര്‍ജയിലും എ​ട്ടെണ്ണം അബൂദബിയിലും നടക്കും. താരങ്ങള്‍ക്ക്​ കോവിഡ്​ പോസിറ്റീവായതിനെ തുടര്‍ന്ന്​ മെയ്​ നാലിനാണ്​ ഐ.പി.എല്‍ ഇന്ത്യയില്‍ നിര്‍ത്തിവെച്ചത്​.

ഇതോടെ പലതാരങ്ങളും പിന്‍മാറിയതിനാല്‍ ടൂര്‍ണമെന്‍റ്​ നിര്‍ത്തിവെക്കാന്‍ സംഘാടകര്‍ നിര്‍ബന്ധിതരാകുകയായിരുന്നു. ടൂര്‍ണമെന്‍റ്​ യു.എ.ഇയില്‍ നടത്തിയാല്‍ പ​ങ്കെടുക്കാന്‍ തയാറാണെന്ന്​ താരങ്ങള്‍ അറിയിച്ചിരുന്നു. കഴിഞ്ഞ സീസണ്‍ സുരക്ഷിതമായി നടത്തിയ ചരിത്രമുള്ള യു.എ.ഇയിലേക്ക്​ തന്നെ ഇക്കുറിയും ടൂര്‍ണമെന്‍റ്​ മാറ്റാന്‍ തീരുമാനിക്കുകയായിരുന്നു. ഒക്​ടോബര്‍ 15ന്​ ദുബൈയിലാണ്​ ഫൈനല്‍. ഐ.പി.എല്‍ കഴിഞ്ഞാല്‍ രണ്ട്​ ദിവസം കഴിഞ്ഞ് ട്വന്‍റി- 20​ ലോകകപ്പ് യു.എ.ഇയിലും ഒമാനിലുമായി നടക്കും. അതിനാല്‍, താരങ്ങളെ കാത്തിരിക്കുന്നത്​ വിശ്രമമില്ലാത്ത ദിവസങ്ങളാണ്​.