ഇന്ത്യ-ഇംഗ്ലണ്ട് ടെസ്റ്റ് പരമ്ബരയിലെ മൂന്നാം മത്സരത്തിലും ഇംഗ്ലീഷ്​ ആരാധകരുടെ പ്രകോപിപ്പക്കലിന്​ കുറവില്ല. മത്സരത്തിനിടെ ബൗണ്ടറിയില്‍ ഫീല്‍ഡ് ചെയ്യുകയായിരുന്ന യുവ പേസ്​ ബൗളര്‍ മുഹമ്മദ്​ സിറാജിനുനേരെ ഗാലറിയില്‍നിന്ന് ഇംഗ്ലീഷ് ആരാധകര്‍ പന്ത് വലിച്ചെറിഞ്ഞിരുന്നു. ഇതിന്​ ഇംഗ്ലീഷ്​ കാണികളെ ട്രോളി സിറാജ്​ മറുപടി നല്‍കുന്നതിന്‍റെ വീഡിയോ സമൂഹ മാധ്യമങ്ങളില്‍ വൈറലാണ്​.

ആദ്യദിനത്തിലാണ്​ ഗ്രൗണ്ടില്‍ നാടകീയരംഗങ്ങള്‍ അരങ്ങേറിയത്​. ​സിറാജിനുനേരെ ഗാലറിയില്‍നിന്ന് ഇംഗ്ലിഷ് ആരാധകര്‍ പന്ത് വലിച്ചെറിയുകയായിരുന്നു. സഹതാരം ഋഷഭ് പന്ത്​ ഇക്കാര്യം നായകന്‍ കോഹ്​ലിയെ അറിയിക്കുകയും ചെയ്​തു. കാണികളുടെ പ്രവൃത്തിയില്‍ ദേഷ്യം പ്രകടിപ്പിച്ച കോഹ്​ലി അവര്‍ എറിഞ്ഞ പന്ത് പുറത്തേക്കെറിയാന്‍ സിറാജിനോട് ആവശ്യപ്പെടുകയും അമ്ബയറിനോട്​ പരാതി ഉന്നയിക്കുകയും ചെയ്​തിരുന്നു. പ്രകോപനം സൃഷ്​ടിച്ച കാണികള്‍ക്ക്​ അവര്‍ അര്‍ഹിക്കുന്ന രീതിയില്‍ മറുപടി നല്‍കുന്ന സിറാജിന്‍റെ വീഡിയോ ആണ്​ ഇപ്പോള്‍ ക്രിക്കറ്റ്​ ആരാധകര്‍ ഏറ്റെടുത്തിരിക്കുന്നത്​. ആദ്യദിവസം ബാറ്റിങ്​ തകര്‍ച്ച നേരിട്ട ഇന്ത്യയെ കളിയാക്കുന്ന ഇംഗ്ലീഷ്​ ആരാധകരോട്​ പരമ്ബരയില്‍ ഇന്ത്യ 1-0ന് മുന്നിലാണെന്ന് സിറാജ് ആംഗ്യം കാണിക്കുന്നതാണ് വീഡിയോയിലുള്ളത്​. ഞങ്ങള്‍ ഒരു മത്സരം ജയിച്ചെന്നും നിങ്ങള്‍ ഇപ്പോഴും പൂജ്യമാണെന്നുമാണ് സിറാജ് ആംഗ്യത്തിലൂടെ കാട്ടിയത്.

കഴിഞ്ഞ ആസ്​ത്രേലിയന്‍ പര്യടനത്തില്‍ സിഡ്‌നി ക്രിക്കറ്റ് സ്റ്റേഡിയത്തില്‍​െവച്ച്‌ ആസ്​ത്രേലിയന്‍ കാണികള്‍ സിറാജിനെ അധിക്ഷേപിച്ചിരുന്നു. തുടര്‍ന്ന് മത്സരം നിര്‍ത്തിവെച്ചു. പ്രശ്നക്കാരായ കാണികളെ ഗാലറിയില്‍നിന്ന് ഇറക്കിവിട്ട ശേഷമാണ്​ കളി തുടര്‍ന്നത്​. ഇംഗ്ലണ്ട്​ പര്യടനത്തില്‍ ലോര്‍ഡ്സില്‍ നടന്ന രണ്ടാം ടെസ്റ്റിനിെട ബൗണ്ടറിക്കരികെ ഫീല്‍ഡ് ചെയ്ത കെ.എല്‍. രാഹുലിനുനേരെ ഇംഗ്ലീഷ് കാണികള്‍ കോര്‍ക്കുകള്‍ വലിച്ചെറിഞ്ഞ്​ പ്രകോപനം സൃഷ്ടിച്ചതും വാര്‍ത്തയായിരുന്നു. മത്സരത്തില്‍ ടോസ് നേടി ബാറ്റിങ് തിരഞ്ഞെടുത്ത ഇന്ത്യ ഒന്നാം ഇന്നിങ്സില്‍ 78 റണ്‍സിന് ഓള്‍ഔട്ട്​ ആയിരുന്നു. മറുപടി ബാറ്റിങ്ങിന് ഇറങ്ങിയ ഇംഗ്ലണ്ട് ആദ്യ ദിനം കളിനിര്‍ത്തുമ്ബോള്‍ ഒന്നാം ഇന്നിങ്സില്‍ വിക്കറ്റ് നഷ്ടം കൂടാതെ 120 റണ്‍സെടുത്തിട്ടുണ്ട്. 10 വിക്കറ്റും കയ്യിലിരിക്കെ ഇംഗ്ലണ്ടിന് 42 റണ്‍സ് ലീഡ് ആണുള്ളത്​.