ലോകകപ്പിലെ തുടര്‍ച്ചയായ ഒമ്പതാം വിജയം സ്വന്തമാക്കി ഇന്ത്യ. ബംഗളുരു ചിന്നസ്വാമി സ്റ്റേഡിയത്തില്‍ നെതര്‍ലാന്‍ഡ്‌സിനെ 160 റണ്‍സിനാണ് ഇന്ത്യ തോല്‍പ്പിച്ചത്. ആദ്യം ബാറ്റ് ചെയ്ത് 410/4 എന്ന കൂറ്റന്‍ സ്‌കോര്‍ ഉയര്‍ത്തിയ ഇന്ത്യയ്ക്കെതിരെ നെതര്‍ലാന്‍ഡ്‌സ് 47.5 ഓവറില്‍ 250ന് ആള്‍ഔട്ടാവുകയായിരുന്നു. ബാറ്റര്‍മാര്‍ രണ്ട് സെഞ്ച്വറികളും മൂന്ന് അര്‍ദ്ധ സെഞ്ച്വറികളും നേടിയപ്പോള്‍ ഈ ലോകകപ്പിലെ തങ്ങളുടെ ഏറ്റവും ഉയര്‍ന്ന ടോട്ടലും ടീം ഇന്ത്യ സ്വന്തമാക്കി. ടോസ് നേടി ബാറ്റിംഗിനിറങ്ങിയ ഇന്ത്യ രോഹിത് ശര്‍മ്മ (61),ശുഭ്മാന്‍ ഗില്‍ (51) എന്നിവരുടെ അര്‍ദ്ധസെഞ്ച്വറികളിലൂടെയാണ് തുടങ്ങിയത്. ഫസ്റ്റ് ഡൗണായി ഇറങ്ങിയ വിരാട് കൊഹ്ലിയും (51) അര്‍ദ്ധസെഞ്ച്വറി നേടിയപ്പോള്‍ നാലാം വിക്കറ്റില്‍ 208 റണ്‍സിന്റെ കൂട്ടുകെട്ട് പടുത്തുയര്‍ത്തിയ ശ്രേയസ് അയ്യരുടെയും (128 നോട്ടൗട്ട്) കെ.എല്‍ രാഹുലിന്റെയും (102) സെഞ്ച്വറികളാണ് ഇന്ത്യന്‍ ഇന്നിംഗ്‌സിന് കുതിപ്പ് നല്‍കിയത്.

ശുഭ്മാന്‍ ഗില്ലിന്റെ മികച്ച ഷോട്ടുകളുമായാണ് ചിന്നസ്വാമിയില്‍ ഇന്ത്യ ദീപാവലി വെടിക്കെട്ട് തുടങ്ങിയത്. മൂന്ന് ഫോറുകളും നാലുസിക്‌സുകളും പായിച്ച ഗില്‍ നേരിട്ട 30ാമത്തെ പന്തില്‍ അര്‍ദ്ധസെഞ്ച്വറിയിലെത്തിയെങ്കിലും അടുത്ത പന്തില്‍ പുറത്തായി. പകരമെത്തിയ വിരാടിനെ കൂട്ടുനിറുത്തി രോഹിത് അര്‍ദ്ധസെഞ്ച്വറി തികച്ചു. തുടര്‍ന്ന് വമ്പനടിക്ക് ശ്രമിച്ചപ്പോള്‍18ാം ഓവറില്‍ മടങ്ങേണ്ടിവന്നു.തുടര്‍ന്ന് ക്രീസിലേക്കിറങ്ങിയ ശ്രേയസ് തുടക്കം മുതല്‍ പന്ത് മിഡില്‍ ചെയ്തു കളിച്ചു. ശ്രേയസുമായി 71റണ്‍സിന്റെ കൂട്ടുകെട്ട് സൃഷ്ടിച്ച വിരാടിനും അര്‍ദ്ധസെഞ്ച്വറി കഴിഞ്ഞയുടനെ മടങ്ങേണ്ടിവന്നു. 29ാം ഓവറില്‍ വാന്‍ഡര്‍ മെര്‍വാണ് വിരാടിനെ ബൗള്‍ഡാക്കിയത്.

തുടര്‍ന്നാണ് കെ.എല്‍ രാഹുല്‍ ക്രീസിലെത്തിയത്. അവസാന ഓവര്‍വരെ കളത്തിലുണ്ടായിരുന്ന ഇരുവരും ചേര്‍ന്ന് 208 റണ്‍സാണ് നാലാം വിക്കറ്റില്‍ കൂട്ടിച്ചേര്‍ത്തത്. 42ാം ഓവറില്‍ ഇന്ത്യ 300 കടന്നു. പിന്നാലെ ശ്രേയസ് തന്റെ കരിയറിലെ ആദ്യ ലോകകപ്പ് സെഞ്ച്വറിയിലെത്തുകയും ചെയ്തു. അവസാന ഓവറിലാണ് ഇന്ത്യ 400 കടന്നതും രാഹുല്‍ സെഞ്ച്വറിയിലെത്തിയതും. 49.5ാം ഓവറിലാണ് രാഹുല്‍ പുറത്തായത്.

മറുപടിക്കിറങ്ങിയ നെതര്‍ലാന്‍ഡ്‌സിന് രണ്ടാം ഓവറില്‍ത്തന്നെ ഓപ്പണര്‍ വെസ്ലി ബറേസിയെ(4) നഷ്ടമായി. സിറാജിന്റെ പന്തില്‍ ബറേസിയെ കെ.എല്‍ രാഹുലാണ് പുറത്താക്കിയത്.തുടര്‍ന്ന് മാക്‌സ് ഒ ഡൗഡും (30), അക്കര്‍മാനും (35), ഏന്‍ഗല്‍ബ്രെച്ചും(45) പൊരുതിനോക്കിയെങ്കിലും കൃത്യമായ ഇടവേളകളില്‍ വിക്കറ്റുകള്‍ വീഴ്ത്തി ഇന്ത്യ മത്സരം കയ്യടക്കി. 13ാം ഓവറില്‍ കുല്‍ദീപ് അക്കര്‍മാനെ എല്‍.ബിയില്‍ കുരുക്കിയപ്പോള്‍ 16ാം ഓവറില്‍ ജഡേജ ഒ ഡൗഡിനെ ബൗള്‍ഡാക്കുകയായിരുന്നു. ഇതോടെ നെതര്‍ലാന്‍ഡ്‌സ് 72/3 എന്ന നിലയിലായി. ക്യാപ്ടന്‍ സ്‌കോട്ട് എഡ്വാര്‍ഡ്‌സും (17) ഏന്‍ഗല്‍ബ്രെച്ചും ചെറുത്തുനില്‍പ്പിന് ശ്രമിച്ചപ്പോള്‍ രോഹിത് സ്ഥിരം ബൗളര്‍മാര്‍ക്ക് പകരം വിരാടിനെയും ഗില്ലിനെയും സൂര്യകുമാറിനെയും പന്തേല്‍പ്പിച്ചു. 25ാം ഓവറില്‍ വിരാട് എഡ്വാര്‍ഡ്‌സിനെ കീപ്പര്‍ രാഹുലിന്റെ കയ്യിലെത്തിച്ചു. 32ാം ഓവറില്‍ ബുംറ ബസ് ഡി ലീഡിനെയും (12) പുറത്താക്കി.38ാം ഓവറില്‍ സിറാജാണ് ഏന്‍ഗല്‍ബ്രെച്ചിന്റെ പോരാട്ടം അവസാനിപ്പിച്ചത്. രോഹിത് ശര്‍മ്മയാണ് അവസാന വിക്കറ്റ് വീഴ്ത്തിയത്.