തുടര്‍ച്ചയായി 10 മത്സരങ്ങളില്‍ വിജയഭേരി മുഴക്കിവന്ന ഇന്ത്യ ഫൈനലില്‍ ഓസ്‌ട്രേലിയയോട് അടിയറവ് പറഞ്ഞു. ആദ്യം ബാറ്റ് ചെയ്ത് 240 റണ്‍സിന് ആള്‍ ഓട്ടായ ഇന്ത്യക്കെതിരെ 43 ഓവറില്‍ നാല് വിക്കറ്റ് നഷ്ടത്തില്‍ 241 റണ്‍സ് നേടിയാണ് ഓസീസ് ആറാം കിരീടമുയര്‍ത്തിയത്. 120 ബാളില്‍ 137 റണ്‍സ് നേടിയ ട്രാവിസ് ഹെഡിന്റെ ഇന്നിംഗ്‌സാണ് ഓസ്‌ട്രേലിയയ്ക്ക് വിജയം സമ്മാനിച്ചത്. മാര്‍നസ് ലെബുഷെയ്‌നിന്റ (58) പ്രകടനവും നിര്‍ണായകമായി. ഓസ്‌ട്രേലിയയെ വിജയവഴിയില്‍ എത്തിച്ചശേഷമാണ് ട്രാവിസ് ഹെഡ് പുറത്തായത്.

ട്രാവിസിനെ കൂടാതെ ഡേവിഡ് വാര്‍ണര്‍, മിച്ചല്‍ മാര്‍ഷ്, സ്റ്റീവ് സ്മിത്ത് എന്നിവരാണ് പുറത്തായ ബാറ്റര്‍മാര്‍. മറുപടി ബാറ്റിംഗിനിറങ്ങിയ ഓസ്‌ട്രേലിയ ബുമ്രയുടെ ആദ്യ ഓവറില്‍ തന്നെ തങ്ങളുടെ ലക്ഷ്യം വ്യക്തമാക്കിയിരുന്നു. 15 റണ്‍സാണ് ഈ ഓവറില്‍ നേടിയത്. എന്നാല്‍ രണ്ടാം ഓവറിലെ ആദ്യപന്തില്‍ തന്നെ ഷമി വാര്‍ണറെ മടക്കി ഇന്ത്യക്ക് ആദ്യ ബ്രേക്ക് നല്‍കി. പിന്നാലെ മിച്ചല്‍ മാര്‍ഷിനെ മടക്കി ബുമ്രയും പ്രതീക്ഷ നല്‍കി. ഇതോടെ ഓസീസ് 41ന് രണ്ട് വിക്കറ്റ് എന്ന നിലയിലായി. പിന്നാലെ സ്റ്റീവ് സ്മിത്തും പുറത്തായതോടെ ഗാലറികളില്‍ ആവേശം ഉയര്‍ന്നു. എന്നാല്‍ ട്രാവിസ് ഹെഡ് ഇന്ത്യന്‍ പ്രതീക്ഷകളെ തല്ലിക്കെടുത്തുകയായിരുന്നു.

ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ ഇന്ത്യ 50 ഓവറില്‍ 240 റണ്‍സിന് ഓള്‍ ഔട്ടായിരുന്നു. . അര്‍ദ്ധ സെഞ്ച്വറി നേടിയ കെ.എല്‍. രാഹുലും (66) വിരാട് കോഹ്ലിയും (54) 47 റണ്‍സെടുത്ത ക്യാപ്ടന്‍ രോഹിത് ശര്‍മ്മയുമാണ് ഇന്ത്യക്ക് ഭേദപ്പെട്ട സ്‌കോര്‍ സമ്മാനിച്ചത്. ഓസീസ് ബൗളര്‍മാരുടെ ബൗളിംഗിന് മുന്നില്‍ ഇന്ത്യന്‍ ബാറ്റര്‍മാര്‍ക്ക് താളം കണ്ടെത്താനായില്ല. ഓസീസിസനായി മിച്ചല്‍ സ്റ്റാര്‍ക്ക് മൂന്നൂം ജോഷ് ഹേസല്‍വുഡും പാറ്റ് കമ്മിന്‍സും രണ്ട് വിക്കറ്റ് വീതവും വീഴ്ത്തി.ടോസ് നഷ്ടപ്പെട്ട് ബാറ്റിംഗിനിറങ്ങിയ ഇന്ത്യക്ക് രോഹിത് ശര്‍മ്മയും ശുഭ്മാന്‍ ഗില്ലും മികച്ച തുടക്കമാണ് നല്‍കിയത്. കളിയുടെ തുടക്കത്തില്‍ മികച്ച രീതിയില്‍ റണ്‍സ് കണ്ടെത്താന്‍ കഴിഞ്ഞെങ്കിലും അടുത്തടുത്തായി വിക്കറ്റുകള്‍ വീണത് ഇന്ത്യയ്ക്ക് തിരിച്ചടിയായി. ഓപ്പണിംഗ് വിക്കറ്റില്‍ ഇരുവരും ചേര്‍ന്ന് 4.2 ഓവറില്‍ 30 റണ്‍സടിച്ചു.

ആദ്യ പത്തോവറില്‍ 80 റണ്‍സടിച്ച ഇന്ത്യക്ക് പിന്നീടുള്ള 20 ഓവറില്‍ 3.63 റണ്‍സ് വച്ചേ സ്‌കോര്‍ ചെയ്യാനായുള്ളു. 86 പന്തില്‍ അര്‍ധസെഞ്ചുറി തികച്ച രാഹുലിനൊപ്പം പിടിച്ചു നില്‍ക്കാന്‍ നോക്കിയ ജഡേജയെ(9) ഹേസല്‍വുഡ് വിക്കറ്റ് കീപ്പറുടെ കൈകളിലെത്തിച്ചതോടെ ഇന്ത്യ 178-5ലേക്ക് വീണു.പിന്നീട് എത്തിയ സൂര്യകുമാര്‍ യാദവും കെ എല്‍ രാഹുലും ചേര്‍ന്ന് ഇന്ത്യയെ 200 കടത്തിയെങ്കിലും 42-ാം ഓവറില്‍ രാഹുലിനെ(66) സ്റ്റാര്‍ക്ക് മടക്കി പിന്നീടെത്തിയ ഷമി(6) പിടിച്ചു നില്‍ക്കാന്‍ നോക്കിയെങ്കിലും സ്റ്റാര്‍ക്കിന് മുന്നില്‍ വീണു. ഒമ്പതാമനായി ക്രീസിലെത്തിയ ജസ്പ്രീത് ബുമ്രയെ(1) ആദം സാംപ വിക്കറ്റിന് മുന്നില്‍ കുടുക്കി.സ്ലോ പിച്ചില്‍ സൂര്യകുമാര്‍ യാദവിനും(18) കാര്യമായി ഒന്നും ചെയ്യാനായില്ല.