ക്യാപ്റ്റന്‍ എസ് സജന നേടിയ സെഞ്ചുറിയില്‍ കേരളം സീനിയര്‍ വനിതാ ഏകദിന ക്രിക്കറ്റില്‍ ജയത്തോടെ അരങ്ങേറി. ബറോഡയെ 216 റണ്ണിന് തകര്‍ത്തു.
സ്‌കോര്‍: കേരളം 284/7, ബറോഡ 68 (21.5). ആദ്യം ബാറ്റ് ചെയ്ത കേരളത്തിനായി സജന 85 പന്തില്‍ 100 റണ്ണടിച്ചു.

16 ഫോറിന്റെ അകമ്പടിയുണ്ടായിരുന്നു. അരുന്ധതി റെഡ്ഡി 50 പന്തില്‍ 73 റണ്ണുമായി പുറത്താകാതെ പിന്തുണ നല്‍കി. സി എം സി നജ്‌ല (5), ഐ വി ദൃശ്യ (30), ജിന്‍സി ജോര്‍ജ് (25), അലീന സുരേന്ദ്രന്‍ (11), കീര്‍ത്തി ജയിംസ് (12), വി എസ് മൃദുല (8) എന്നിവര്‍ പുറത്തായി.

ബറോഡ ബാറ്റര്‍മാര്‍ക്ക് കേരള ബൗളര്‍മാര്‍ക്കെതിരെ പിടിച്ചുനില്‍ക്കാനായില്ല. പത്താംഓവറില്‍ 15 റണ്ണിന് ആറ് വിക്കറ്റ് പോയ ബറോഡ പിന്നീട് തോല്‍വിയുടെ ആഘാതം കുറയ്ക്കാനാണ് ശ്രമിച്ചത്.

തന്‍വീര്‍ ഷെയ്ഖ് പുറത്താകാതെ 29 റണ്ണുമായി പൊരുതി. കേരളത്തിനായി വിനയ സുരേന്ദ്രന്‍ 4.5 ഓവറില്‍ 23 റണ്‍ വഴങ്ങി നാല് വിക്കറ്റെടുത്തു. അരുന്ധതിക്കും മൃദുലയ്ക്കും മൂന്ന് വിക്കറ്റ്‌വീതമുണ്ട്. കേരളം ഇത്തവണ ഇ ഗ്രൂപ്പിലാണ്. ഡല്‍ഹി, ഹിമാചല്‍പ്രദേശ്, ആന്ധ്ര, നാഗാലാന്‍ഡ്, സിക്കിം എന്നിവയാണ് മറ്റ് ടീമുകള്‍. ഹിമാചലുമായാണ് അടുത്തകളി എട്ടിനാണ്.