ഇന്ത്യ അഫ്ഗാനിസ്ഥാന്‍ ട്വന്റി 20 പരമ്പരയിലെ രണ്ടാം മത്സരം ഇന്ന്. ഇന്‍ഡോറില്‍ വൈകുന്നേരം ഏഴ് മണിക്കാണ് കളി തുടങ്ങുക. മത്സരം ജയിച്ചാല്‍ ടീം ഇന്ത്യക്ക് പരമ്പര സ്വന്തമാകും. റണ്‍മെഷീന്‍ വിരാട് കോലിയുടെ തിരിച്ചുവരവിനൊപ്പം മലയാളി ക്രിക്കറ്റര്‍ സഞ്ജു സാംസണ്‍ പ്ലേയിംഗ് ഇലവനില്‍ ഇടംപിടിക്കുമോ എന്ന ആകാംക്ഷയിലാണ് ആരാധകര്‍. കോലി തിരിച്ചെത്തുന്നതോടെ ഇന്ത്യയുടെ പ്ലേയിംഗ് ഇലവനില്‍ മാറ്റമുറപ്പായിരിക്കും.


ലോകകപ്പിന് മുന്‍പുള്ള അവസാന ട്വന്റി 20 പരമ്പര സ്വന്തമാക്കാനാണ് ടീം ഇന്ത്യ ഇന്നിറങ്ങുന്നത്. മൊഹാലിയിലെ ആദ്യ ടി20യില്‍ തോറ്റ അഫ്ഗാനിസ്ഥാന് പരമ്പരയില്‍ പ്രതീക്ഷ നിലനിര്‍ത്താനായി ഇന്‍ഡോറില്‍ ജയം അനിവാര്യമാണ്.

പഞ്ചാബ് ക്രിക്കറ്റ് അസോസിയേഷന്‍ സ്‌റ്റേഡിയത്തില്‍ 158 റണ്‍സെടുത്ത അഫ്ഗാനിസ്ഥാനെതിരെ ആറ് വിക്കറ്റിനായിരുന്നു ഇന്ത്യയുടെ ജയം. പതിനാല് മാസത്തെ ഇടവേളയ്ക്ക് ശേഷം വിരാട് കോലി ട്വന്റി 20 ടീമിലേക്ക് ഇന്ന് തിരിച്ചെത്തും. ഇതുകൊണ്ടുതന്നെ ഇന്ത്യന്‍ നിരയില്‍ മാറ്റമുറപ്പാണ്. ജിതേഷ് ശര്‍മ്മയ്ക്ക് പകരം സഞ്ജു സാംസണ്‍ ടീമിലെത്തുമോയെന്നാണ് മലയാളി ക്രിക്കറ്റ് പ്രേമികളുടെ ആകാംക്ഷ. യുവതാരങ്ങളായ റിങ്കു സിംഗ്, തിലക് വര്‍മ്മ, ശിവം ദുബെ, രവി ബിഷ്‌ണോയ് തുടങ്ങിയവരുടെ ലക്ഷ്യം മികച്ച പ്രകടനത്തിലൂടെ ലോകകപ്പ് ടീമില്‍ സ്ഥാനം ഉറപ്പിക്കുകയാണ് .