ദക്ഷിണാഫ്രിക്കക്കെതിരായ ടി20 പരമ്പര സ്വന്തമാക്കി വെസ്റ്റ് ഇന്‍ഡീസ്. ടെസ്റ്റ് പരമ്പര കൈവിട്ട വിന്‍ഡീസിനു ടി20 പരമ്പര ആശ്വാസമായി. തുടരെ രണ്ട് മത്സരങ്ങള്‍ ജയിച്ചാണ് മൂന്ന് മത്സരങ്ങളടങ്ങിയ പരമ്പരയില്‍ 2-0ത്തിനു വിന്‍ഡീസ് മുന്നിലെത്തിയത്.

രണ്ടാം പോരാട്ടം 30 റണ്‍സിനാണ് വെസ്റ്റ് ഇന്‍ഡീസ് വിജയം നേടിയത്. ആദ്യം ബാറ്റ് ചെയ്ത വിന്‍ഡീസ് നിശ്ചിത ഓവറില്‍ ആറ് വിക്കറ്റ് നഷ്ടത്തില്‍ 179 റണ്‍സെടുക്കുകയും ചെയ്തു. വിജയം തേടിയിറങ്ങിയ ദക്ഷിണാഫ്രിക്ക 19.4 ഓവറില്‍ 149 റണ്‍സിനു എല്ലാവരും പുറത്തായി.
നാടകീയ വിജയമാണ് വിന്‍ഡീസ് സ്വന്തമാക്കിയത്.

ജയത്തിലേക്ക് നീങ്ങുകയായിരുന്ന പ്രോട്ടീസ് 5 വിക്കറ്റ് നഷ്ടത്തില്‍ 134 റണ്‍സെന്ന നിലയില്‍ നില്‍ക്കെയാണ് അപ്രതീക്ഷിതമായി തകര്‍ന്നടിഞ്ഞത്. ശേഷിക്കുന്ന അഞ്ച് വിക്കറ്റുകള്‍ വെറും 15 റണ്‍സില്‍ വീണു. 4 ഓവറില്‍ 15 റണ്‍സ് വഴങ്ങി മൂന്ന് വിക്കറ്റെടുത്ത റൊമാരിയോ ഷെഫേര്‍ഡിന്റെ ബൗളിങാണ് കളി പ്രോട്ടീസിന്റെ കൈയില്‍ നിന്നു തട്ടിയത്. ഷമര്‍ ജോസഫും മൂന്ന് വിക്കറ്റുകള്‍ വീഴ്ത്തി. അകീല്‍ ഹുസൈന്‍ രണ്ട് വിക്കറ്റെടുത്തു. മാത്യു ഫോഡ്, ഗുഡാകേഷ് മോട്ടി എന്നിവര്‍ ഓരോ വിക്കറ്റെടുത്തു.

ദക്ഷിണാഫ്രിക്കന്‍ നിരയില്‍ റീസ ഹെന്റിക്സാണ് ടോപ് സ്‌കോറര്‍. താരം 18 പന്തില്‍ രണ്ട് സിക്സും ആറ് ഫോറും സഹിതം 44 റണ്‍സെടുത്തു. ട്രിസ്റ്റന്‍ സറ്റബ്സ് (28), റ്യാന്‍ റിക്കെല്‍ട്ടന്‍ (20) എന്നിവരും തിളങ്ങി.

നേരത്തെ ആദ്യം ബാറ്റ് ചെയ്ത വിന്‍ഡീസിനായി ഓപ്പര്‍ ഷായ് ഹോപ്പ് 22 പന്തില്‍ 41 റണ്‍സെടുത്ത് ടോപ് സ്‌കോററായി. താരം രണ്ട് ഫോറും നാല് സിക്സും സഹിതമാണ് താരം തിളങ്ങിയത്.