ഇന്ത്യയ്‌ക്കെതിരായ ടെസ്റ്റില്‍ ന്യൂസീലന്‍ഡിന് 356 റണ്‍സ് ഒന്നാം ഇന്നിങ്‌സ് ലീഡ്. ആദ്യ ഇന്നിങ്‌സില്‍ 402 റണ്‍സിന് ന്യൂസീലന്‍ഡ് ഓള്‍ ഔട്ടായി. സെഞ്ചറി നേടിയ ഇന്ത്യന്‍ വംശജനായ രചിന്‍ രവീന്ദ്ര (157 പന്തില്‍ 134), അര്‍ധസെഞ്ചറി നേടിയ ഡെവോണ്‍ കോണ്‍വേ (105 പന്തില്‍ 91), ടിം സൗത്തി (73 പന്തില്‍ 65) എന്നിവരുടെ ബാറ്റിങ്ങാണ് കിവീസിന് മികച്ച ലീഡ് സമ്മാനിച്ചത്.

ഹോം ടെസ്റ്റില്‍ 12 വര്‍ഷത്തിനുശഷമാണ് ഇന്ത്യ ഒന്നാം ഇന്നിങ്‌സില്‍ 200 റണ്‍സിലധികം ലീഡ് വഴങ്ങുന്നത്. 2012ല്‍ കൊല്‍ക്കത്ത ഈഡന്‍ ഗാര്‍ഡന്‍സില്‍ നടന്ന ടെസ്റ്റില്‍ ഇംഗ്ലണ്ടിനെതിരെ ഇന്ത്യ 207 റണ്‍സ് ലീഡ് വഴങ്ങിയിരുന്നു.


ഒന്നാം ഇന്നിങ്‌സില്‍ 3ന് 180 എന്ന നിലയില്‍ മൂന്നാം ദിനം കളി പുനഃരാരംഭിച്ച ന്യൂസീലന്‍ഡിന് ആദ്യ സെഷനിലെ 15 ഓവറിനുള്ളില്‍ നാല് വിക്കറ്റ് നഷ്ടമായിരുന്നു.

എട്ടാം വിക്കറ്റില്‍ ഒന്നിച്ച രചിന്‍ടിം സൗത്തി സഖ്യമാണ് ന്യൂസീലന്‍ഡിനെ പിന്നീട് മുന്നോട്ടു നയിച്ചത്.