ട്വന്റി20 വനിതാ ലോകകപ്പ് ഫൈനലില്‍ ദക്ഷിണാഫ്രിക്കയെ തകര്‍ത്ത് ന്യൂസീലന്‍ഡിന് കന്നിക്കിരീടം. 32 റണ്‍സിനായിരുന്നു ന്യൂസിലന്‍ഡിന്റെ വിജയം. ആദ്യം ബാറ്റ് ചെയ്ത ന്യൂസീലന്‍ഡ് 20 ഓവറില്‍ അഞ്ച് വിക്കറ്റിന് 158 റണ്‍സ് നേടുകയായിരുന്നു. തുടര്‍ന്ന് ബാറ്റ് ചെയ്ത ദക്ഷിണാഫ്രിക്കയ്ക്ക് 20 ഓവറില്‍ ഒന്‍പതിന് 126 റണ്‍സ് എടുക്കാനേ കഴിഞ്ഞുള്ളൂ.

38 പന്തില്‍ 43 റണ്‍സെടുത്ത അമേലിയ കെറാണ് കിവീസിന്റെ ടോപ് സ്‌കോറര്‍. ടോസ് നഷ്ടപ്പെട്ട് ബാറ്റിങ്ങിനിറങ്ങിയ ന്യൂസീലന്‍ഡിന്റെ തുടക്കം അത്ര മികച്ചതായിരുന്നില്ല. ജോര്‍ജിയ പ്ലിമ്മര്‍ (9) തുടക്കത്തില്‍ മടങ്ങി.

പിന്നീടെത്തിയ അമേലിയ കെറും സുസി ബെറ്റ്‌സും (32) ചേര്‍ന്ന് 37 റണ്‍സ് കൂട്ടിച്ചേര്‍ത്തു. ബേറ്റ്‌സ് എട്ടാം ഓവറില്‍ മടങ്ങി. ക്യാപ്റ്റന്‍ സോഫി ഡിവൈനിന് (6) തിളങ്ങാനായില്ല. തുടര്‍ന്ന് എത്തിയ ബ്രൂക്ക് ഹാലി ഡേയുമായി ചേര്‍ന്ന് കേര്‍ മികച്ച ടോട്ടലിലേക്ക് ന്യൂസിലന്‍ഡിനെ എത്തിക്കുകയായിരുന്നു. 57 റണ്‍സാണ് ഇരുവരും ചേര്‍ന്ന് കൂട്ടിച്ചേര്‍ത്തത്. മാഡി ഗ്രീന്‍ (12), ഇസബെല്ല ഗേസ് (3) പുറത്താവാതെ നിന്നു. മറുപടി ബാറ്റിങ്ങില്‍ മികച്ച തുടക്കം ലഭിച്ചിട്ടും അതു മുതലെടുക്കാന്‍ ദക്ഷിണാഫ്രിക്കയ്ക്കു സാധിച്ചില്ല. ഓപ്പണര്‍മാരായ ക്യാപ്റ്റന്‍ ലോറ വോല്‍വാഡും (27 പന്തില്‍ 33), തസ്മിന്‍ ബ്രിറ്റ്‌സും (18 പന്തില്‍ 17) നല്ല തുടക്കമാണ് ദക്ഷിണാഫ്രിക്കയ്ക്കു നല്‍കിയത്.

ഓപ്പണിങ് വിക്കറ്റില്‍ 51 റണ്‍സാണ് കൂട്ടിച്ചേര്‍ത്തത്. എന്നാല്‍ ഇരുവരും പുറത്തായതോടെ ദക്ഷിണാഫ്രിക്ക തകര്‍ന്നടിയുകയായിരുന്നു. മധ്യനിര ബാറ്റര്‍മാരില്‍ ക്ലോ ട്രിയോണും (16 പന്തില്‍ 14), ആനറി ഡെര്‍ക്‌സനും (ഒന്‍പതു പന്തില്‍ 10) രണ്ടക്കം കടന്നു.