ഫുട്‌ബോള്‍ താരം ക്രിസ്റ്റ്യാനോ റൊണാള്‍ഡോയുടെ പങ്കാളി ജോര്‍ജിന റോഡ്രിഗസ് ഇരട്ടക്കുഞ്ഞുങ്ങള്‍ക്ക് ജന്മം നല്‍കിയെങ്കിലും അതില്‍ ആണ്‍കുട്ടി മരിച്ചു. ഇന്‍സ്റ്റഗ്രാമിലൂടെ ക്രിസ്റ്റ്യാനോ തന്നെയാണ് വിവരം പുറത്തു വിട്ടത്. പെണ്‍കുഞ്ഞ് ആരോഗ്യത്തോടെയിരിക്കുന്നതായും ക്രിസ്റ്റ്യാനോ അറിയിച്ചു.

ഞങ്ങളുടെ ഇരട്ടക്കുട്ടികളില്‍ അണ്‍കുട്ടി മരണമടഞ്ഞതായി വിഷമത്തോടെ അറിയിക്കുന്നു. പെണ്‍കുഞ്ഞ് ഞങ്ങളോടൊപ്പമുണ്ടെന്നതാണ് ഈ വിഷമഘട്ടത്തിലെ ഏക ആശ്വാസം. ഞങ്ങളുടെ പെണ്‍കുട്ടിയുടെ ജനനമാണ് ഈ നിമിഷത്തില്‍ ഞങ്ങള്‍ക്ക് ജീവിക്കാനുള്ള ശക്തി നല്‍കുന്നത്. ഡോക്ടര്‍മാരോടും നഴ്‌സുമാരോടും അവരുടെ സേവനത്തിനും കരുതലിനും നന്ദി അറിയിക്കുന്നു.

ഈ നഷ്ടത്തില്‍ ഞങ്ങള്‍ എല്ലാവരും തകര്‍ന്നിരിക്കുകയാണ്. ഈ പ്രയാസമേറിയ സമയത്ത് സ്വീകാര്യതയാണ് ഞങ്ങള്‍ ആവശ്യപ്പെടുന്നത്. പ്രിയപ്പെട്ട മകനെ നീ ഞങ്ങളുടെ മാലാഖയായിരുന്നു. ഞങ്ങള്‍ എപ്പോഴും നിന്നോടൊപ്പമുണ്ട് ക്രിസ്റ്റ്യാനോ ട്വീറ്റ് ചെയ്തു. ഇരട്ട കുഞ്ഞുങ്ങളുടെ മാതാപിതാക്കളാകാന്‍ പോകുന്നുവെന്ന് സ്ഥിരീകരിച്ച് റൊണാള്‍ഡോയും ജോര്‍ജീനയും സോഷ്യല്‍ മീഡിയയില്‍ നേരത്തെ രംഗത്തെത്തിയിരുന്നു. റൊണാള്‍ഡോ മറ്റ് നാല് കുട്ടികളുടെ പിതാവാണ്, ക്രിസ്റ്റ്യാനോ ജൂനിയര്‍, മാറ്റിയോ, പെണ്‍മക്കളായ ഇവാ, അലാന എന്നിവരാണ് മക്കള്‍.

ഈ സീസണിന് മുന്നോടിയായി മാഞ്ചസ്റ്റര്‍ യുണൈറ്റഡിലേക്ക് മടങ്ങിയ റൊണാള്‍ഡോ പ്രീമിയര്‍ ലീഗില്‍ 15 ഗോളുകള്‍ നേടിയിട്ടുണ്ട്. വാരാന്ത്യത്തില്‍ നോര്‍വിച്ച് സിറ്റിയെ തോല്‍പ്പിക്കാന്‍ യുണൈറ്റഡിനെ സഹായിച്ചപ്പോള്‍ 37കാരന്‍ തന്റെ കരിയറിലെ 60ാം ഹാട്രിക് നേടിയിരുന്നു. ചൊവ്വാഴ്ച രാത്രി നടക്കുന്ന ലീഗ് മത്സരത്തില്‍ മാഞ്ചസ്റ്റര്‍ യുണൈറ്റഡ് ലിവര്‍പൂളിനെ നേരിടും.

അതേസമയം, കുഞ്ഞ് മരണപ്പെട്ടതിന് പിന്നാലെ അനുശോചനം രേഖപ്പെടുത്തി മാഞ്ചസ്റ്റര്‍ .യുണൈറ്റഡ് രംഗത്തെത്തി. ഞങ്ങളുടെ പ്രിയപ്പെട്ട ക്രിസ്റ്റ്യാനോ റൊണാള്‍ഡോയുടെയും അദ്ദേഹത്തിന്റെ പങ്കാളിയുടെയും കുട്ടികളില്‍ ഒരാളുടെ മരണത്തില്‍ പ്രസിഡന്റും ഡയറക്ടര്‍ ബോര്‍ഡും അഗാധമായി ഖേദിക്കുന്നെന്ന് സോഷ്യല്‍ മീഡിയയില്‍ ടീം കുറിച്ചു. പിന്നാലെ റയല്‍ മാഡ്രിഡും അനുശോചനം രേഖപ്പെടുത്തി രംഗത്തെത്തി.