കിരീടമുറപ്പിക്കാനൊരുങ്ങി കേരളം..... ആതിഥേയരായ കേരളവും കരുത്തരായ പശ്ചിമ ബംഗാളും തമ്മിലുള്ള സന്തോഷ് ട്രോഫി ഫൈനല്‍ ഇന്ന് രാത്രി എട്ടുമുതല്‍ മഞ്ചേരി പയ്യനാട് സ്റ്റേഡിയത്തില്‍ നടക്കും.


ഏഴാം കിരീടമുറപ്പിക്കാനാണ് കേരളം ജിജോ ജോസഫിന്റെ നേതൃത്വത്തില്‍ മൈതാനത്തിറങ്ങുന്നത്. ബംഗാളിനാകട്ടെ 33ാം കിരീടത്തിനായുള്ള പോരാട്ടവും. കേരളവും ബംഗാളും തമ്മിലുള്ള നാലാം ഫൈനലാണിത്. 1989,1994 വര്‍ഷങ്ങളില്‍ ബംഗാള്‍ കേരളത്തെ തോല്‍പ്പിച്ച് ജേതാക്കളായി.

2018ല്‍ കൊല്‍ക്കത്തയില്‍ വച്ചാണ് ആദ്യമായി കേരളം ബംഗാളിനെതിരെ കിരീടം നേടിയത്.ഗ്രൂപ്പ് റൗണ്ടില്‍ മൂന്ന് ജയവും ഒരു സമനിലയുമായി സെമിയിലെത്തിയ കേരളം അവിടെ കര്‍ണാടകയെ പരാജയപ്പെടുത്തിയാണ് ഫൈനല്‍ ടിക്കറ്റെടുത്തത്.


ഗ്രൂപ്പ് റൗണ്ടില്‍ കേരളം ബംഗാളിനെ തോല്‍പ്പിച്ചിരുന്നു.ഗ്രൂപ്പ് ബിയില്‍ ഒരു തോല്‍വിയും മൂന്ന് ജയവുമായി രണ്ടാം സ്ഥാനക്കാരായി സെമിയിലെത്തിയ ബംഗാള്‍ മണിപ്പൂരിനെ പരാജയപ്പെടുത്തി ഫൈനലുറപ്പിച്ചു.

അതേസമയം ആക്രമിച്ച് കളിക്കുകയാണ് കേരളത്തിന്റെ ശൈലിയെന്നും അതില്‍ മാറ്റമുണ്ടാകില്ലെന്നും കീരീടമാണ് ലക്ഷ്യം,അതുകൊണ്ട് ഫൈനല്‍ ഒരു ഡൂ ഓര്‍ ഡൈ മത്സരമായിരിക്കും. അര്‍ജ്ജുന്‍ ജയരാജ്, അജയ് അലക്‌സ്, ജെസിന്‍ എന്നിവര്‍ക്ക് ചെറിയ പരിക്കുണ്ട്. എന്നാല്‍ ഇത് പരാതി പറഞ്ഞ് നില്‍ക്കേണ്ട സമയമല്ല. കര്‍ണാടകയ്ക്ക് എതിരെ വരുത്തിയ പിഴവുകള്‍ നികത്തി മുന്നോട്ട് പോകും. ആരാധകര്‍ക്ക് മികച്ച പ്രകടനം തന്നെ കാഴ്ചവെക്കുമെന്നും കേരളാ പരിശീലകന്‍, ബിനോ ജോര്‍ജ്ജ് പറയുന്നു.