ആവേശ പെരുന്നാള് മഴ... അവസാന നിമിഷം വരെ ആവേശം നിലനിന്ന സന്തോഷ് ട്രോഫി മത്സരത്തില് കേരളത്തിന് കിരീടം; ഷൂട്ടൗട്ടില് ബംഗാളിനെ അഞ്ചേ നാലിന് വീഴ്ത്തി; ഒരു ഘട്ടത്തില് തോല്വി ഉറപ്പിച്ച മത്സരത്തില് നിന്നാണ് കേരളം വിജയം തിരിച്ചു പിടിച്ചത്
മലപ്പുറത്തെ ഫുട്ബോളിനെ നെഞ്ചേറ്റിയ കാണികളെ സാക്ഷിനിര്ത്തി കേരളം ഏഴാം സന്തോഷ് ട്രോഫി കിരീടം സ്വന്തമാക്കിയപ്പോള് മാസങ്ങള്ക്ക് മുമ്പ് നഷ്ടമായ കേരള ബ്ലാസ്റ്റേഴ്സിന്റെ പരാജയമാണ് ഓര്മ്മ വരുന്നത്. അന്നും പെനാല്റ്റി ഷൂട്ടൗട്ടിലൂടെയാണ് കേരള ബ്ലാസ്റ്റേഴ് തോറ്റത്. എന്നാല് കേരളം സന്തോഷ് ട്രോഫിയില് മുത്തമിട്ടതോടെ ആ മുറിവ് മാറി.
നിശ്ചിത സമയവും അധിക സമയവും കടന്ന് പെനാല്റ്റി ഷൂട്ടൗട്ടിലേക്ക് നീണ്ട മത്സരത്തില് ബംഗാളിനെ നാലിനെതിരേ അഞ്ചു ഗോളുകള്ക്ക് തകര്ത്താണ് 15ാം ഫൈനലില് കേരളത്തിന്റെ ഏഴാം കിരീട നേട്ടം. ഇരുപത്തയ്യായിരത്തിലേറെ ആളുകളാണ് പയ്യനാട് ഫൈനല് മത്സരം കാണാനെത്തിയത്. ഷൂട്ടൗട്ടില് കേരളത്തിനായി സഞ്ജു, ബിപിന് അജയന്, ജിജോ ജോസഫ്, ജെസിന്, ഫസ്ലുറഹ്മാന് എന്നിവര് കിക്ക് വലയിലെത്തിച്ചപ്പോള് ബംഗാള് നിരയില് സജല് ബാഗെടുത്ത കിക്ക് പുറത്തേക്ക് പോയത് കളിയിലെ വിധിയെഴുത്തായി.
നിശ്ചിത സമയത്തും അധിക സമയത്തും ഇരു ടീമും ഓരോ ഗോള് വീതം നേടി സമനില പാലിച്ചതോടെയാണ് മത്സരം ഷൂട്ടൗട്ടിലേക്ക് നീണ്ടത്. ഷൂട്ടൗട്ടില് ബംഗാളിന്റെ രണ്ടാമത്തെ കിക്ക് പുറത്തേക്കു പോയി. സന്തോഷ് ട്രോഫിയില് ഇത് ഏഴാം തവണയാണു കേരളം കിരീടം നേടുന്നത്. 2018–19 ലാണ് കേരളം അവസാനമായി സന്തോഷ് ട്രോഫി കിരീടം നേടിയത്. 1992–93 നു ശേഷം ആദ്യമായാണ് കേരളത്തില് നടന്ന കലാശപ്പോരാട്ടത്തില് കേരള ടീം കപ്പ് ഉയര്ത്തുന്നതും.
ആദ്യ ഇലവനില് മാറ്റങ്ങളൊന്നും ഇല്ലാതെയാണ് കേരളം ബംഗാളിനെതിരെ ഫൈനലിന് ഇറങ്ങിയത്. ഒരു മധ്യനിരതാരത്തിന് പകരം പ്രതിരോധ താരം നബി ഹുസൈന് ഖാനെ ആദ്യ ഇലവനില് ഉള്പ്പെടുത്തി 532 ഫോര്മേഷനിലാണ് ബംഗാള് ഇറങ്ങിയത്. ഗോള് അകന്നുനിന്ന ഇരു പകുതികള്ക്കും ശേഷം അധിക സമയത്തേക്കു നീണ്ട സന്തോഷ് ട്രോഫി ഫൈനലില്, 97–ാം മിനിറ്റില് ദിലീപ് ഓര്വാന്റെ ബുള്ളറ്റ് ഹെഡറിലാണു ബംഗാള് ലീഡ് എടുത്തത് (1–0). പിന്നാലെ എക്സ്ട്രാ ടൈം അവസാനിക്കാന് മൂന്നു മിനിറ്റ് മാത്രം ശേഷിക്കെ, മറ്റൊരു ഉജ്വല ഹെഡറിലൂടെ മുഹമ്മദ് സഫ്നാദ് കേരളത്തിനായി ഗോള് മടക്കി (1–1). ഇരുപകുതികളിലും മികച്ച അവസരങ്ങള് ലഭിച്ചിട്ടും ബംഗാള് ഗോള്കീപ്പറുടെ ഉജ്വല സേവുകളും ഒപ്പം നിര്ഭാഗ്യവുമാണു കേരളത്തിനു തിരിച്ചടിയായത്.
അഞ്ചാം മിനിറ്റില് തന്നെ ബംഗാളിന് അവസരം ലഭിച്ചു. വലതു കോര്ണറില് നിന്ന് ഫര്ദിന് അലി മൊല്ല എടുത്ത കിക്ക് നബി ഹുസൈന് ഹെഡറിന് ശ്രമിച്ചെങ്കിലും പുറത്തേക്ക് പോയി. 10 ാം മിനിറ്റില് കേരളത്തിന് ആദ്യ അവസരം ലഭിച്ചു. ബോക്സിന് പുറത്തുനിന്ന് നിജോ ഗില്ബേര്ട്ട് നല്കിയ പാസ് സ്െ്രെടക്കര് വിഘ്നേഷിന് സ്വീകരിക്കാന് സാധിച്ചില്ല. 19 ാം മിനിറ്റില് ഷികിലിനെ ബോക്സിന് പുറത്തുനിന്ന് വീഴ്ത്തിയതിന് ലഭിച്ച ഫ്രീകിക്ക് ക്യാപ്റ്റന് ജിജോ ജോസഫ് ലക്ഷ്യത്തിലെത്തിച്ചെങ്കിലും ബംഗാള് ഗോള്കീപ്പര് പിടിച്ചെടുത്തു.
97 ാം മിനിറ്റില് ബംഗാള് ലീഡ് എടുത്തു. കേരളാ പ്രതിരോധ താരം സഹീഫ് വരുത്തിയ പിഴവില് നിന്ന് പകരക്കാരനായി എത്തിയ സുപ്രിയ പണ്ഡിറ്റിനു ലഭിച്ച പന്ത് ബോക്സിലേക്ക് ക്രോസ് ചെയ്തു. ബോക്സിന് അകത്ത്നിന്ന ദിലിപ് ഒര്വാന് കേരളാ കീപ്പര് മിഥുനെ കാഴ്ചക്കാരനാക്കി ഹെഡറിലൂടെ ഗോളാക്കി മാറ്റി.
114 ാം മിനിറ്റില് ക്യാപ്റ്റന് ജിജോ ജോസഫിന് അവസരം ലഭിച്ചു. പോസ്റ്റ് ലക്ഷ്യമാക്കി ജിജോ ഒരു വോളി അടിച്ചെങ്കിലും ഗോളായി മാറിയില്ല. 117 ാം മിനിറ്റില് കേരളം സമനില പിടിച്ചു. വലതു വിങ്ങില് നിന്ന് നൗഫല് നല്കിയ ക്രോസില് പകരക്കാരനായി എത്തിയ മുഹമ്മദ് സഫ്നാദിന്റെ ഉഗ്രന് ഹെഡറിലൂടെയായിരുന്നു ആ ഗോള് പിറന്നത്.
സമനില ഗോള് പിറന്നതോടെ സ്റ്റേഡിയവും ആവേശത്തിരയിലായി. കാല്ലക്ഷത്തോളം കാണികളെത്തിയ സ്റ്റേഡിയത്തെ സാക്ഷിയാക്കിയാണ് കേരളത്തിന്റെ ചുണക്കുട്ടികള് ഒരു കിക്ക് പോലും പാഴാക്കാതെ ട്രോഫിയുടെ ചരിത്രത്തില് കേരളത്തിന്റെ ഏഴാം പെരുന്നാള് ദിനത്തിലേക്ക് വിജയക്കൊടി പാറിച്ചെത്തിയത്.
"
https://www.facebook.com/Malayalivartha