ഗോകുലം കേരള എഫ്.സി തിങ്കളാഴ്ച ഷില്ലോങ് ലജോങ് എഫ്.സിയെ നേരിടും...
ഗോകുലം കേരള എഫ്.സി തിങ്കളാഴ്ച ഷില്ലോങ് ലജോങ് എഫ്.സിയെ നേരിടും. കോര്‍പറേഷന്‍ സ്‌റ്റേഡിയത്തില്‍ വൈകീട്ട് ഏഴിന് നടക്കുന്ന മത്സരം ഇരു ടീമുകള്‍ക്കും ഏറെ നിര്‍ണായകമാണ്.
രണ്ടാം സ്ഥാനത്തുള്ള റിയല്‍ കശ്മീരുമായി പോയന്റ് നിലയില്‍ ഒപ്പമെത്താന്‍ മലബാറിയന്‍സിന് വിജയം സഹായിക്കും. 20 പോയന്റുമായി നാലാം സ്ഥാനത്തുള്ള ഗോകുലം കൊല്‍ക്കത്തയില്‍ കഴിഞ്ഞ ദിവസം നടന്ന മത്സരത്തില്‍ ഇന്റര്‍ കാശിയെ രണ്ടിനെതിരെ നാലു ഗോളുകള്‍ക്ക് പരാജയപ്പെടുത്തിയ ആവേശത്തിലാണ്.
ക്യാപ്റ്റന്‍ അലക്‌സ് സാഞ്ചസും മലയാളി താരം അഭിജിത്തും നിക്കോളയും സ്പാനിഷ് പ്ലെയറായ ജോനാഥന്‍ വിയേരയും സെര്‍ബിയന്‍ താരം മാറ്റിജ ബബോവിച്ചും മികച്ച ഫോമിലുള്ളതാണ് ഗോകുലം പ്രതീക്ഷ.
ഈ സീസണില്‍ 13 ഗോളുകള്‍ നേടിയ ലീഗിലെ ടോപ് സ്‌കോററായ അലക്‌സ് സാഞ്ചസിന്റെ പ്രകടനം ശ്രദ്ധേയമാണ്. ടീമിന്റെ ആക്രമണശേഷി വര്‍ധിപ്പിക്കുന്നതിന്, ജോനാഥന്‍ വിയേര, ബാബോവിച്, നിക്കോള സ്‌റ്റോജനോവിച് തുടങ്ങിയ പുതിയ വിദേശ കളിക്കാരെ ഗോകുലം കൊണ്ടുവന്നിരുന്നു. ഹോം ഗ്രൗണ്ട് അഡ്വാന്റേജും നവീകരിച്ച സ്‌ക്വാഡും ഉള്ളതിനാല്‍, തങ്ങളുടെ ആരാധകര്‍ക്കു മുന്നില്‍ മറ്റൊരു നിര്‍ണായക വിജയം ഉറപ്പാക്കാനൊരുങ്ങി ഗോകുലം.
"
https://www.facebook.com/Malayalivartha
