അല്‍ നസ്‌റിന്റെ പോര്‍ച്ചുഗീസ് ഇതിഹാസം ക്രിസ്റ്റ്യാനോ റൊണാള്‍ഡോ പൂര്‍ത്തിയാക്കിയത് 1000 ക്ലബ് മത്സരങ്ങള്‍. ബുധനാഴ്ച രാത്രി എ.എഫ്.സി ചാമ്പ്യന്‍സ് ലീഗില്‍ അല്‍ ഫീഹക്കെതിരെയായിരുന്നു റൊണാള്‍ഡോയുടെ കരിയറിലെ 1000ാമത്തെ മത്സരം.

റൊണാള്‍ഡോയുടെ ഒറ്റ ഗോള്‍ ബലത്തിലാണ് അല്‍ നസ്ര്‍ ചാമ്പ്യന്‍സ് ലീഗ് ആദ്യ പാദത്തിലെ എവേ മത്സരം ജയിച്ച് കയറിയത്. റിയാദിലെ പ്രിന്‍സ് ഫൈസല്‍ ബിന്‍ ഫഹദ് സ്റ്റേഡിയത്തില്‍ നടന്ന മത്സരം ആദ്യ പകുതി ഗോള്‍ രഹിതമായിരുന്നു. കളിയിലൂടനീളം പന്തിന്‍മേലുള്ള നിയന്ത്രണം അല്‍ നസ്ര്‍ കയ്യടക്കി വെച്ചിരുന്നെങ്കിലും ഗോള്‍ കണ്ടെത്താനായിരുന്നില്ല.

81ാം മിനിറ്റില്‍ സൂപ്പര്‍ താരത്തിന്റെ ബൂട്ടില്‍ നിന്നാണ് വിജയഗോള്‍ പിറന്നത്. ക്രിസ്റ്റ്യാനോ ഈ വര്‍ഷം നേടുന്ന ആദ്യ ഗോള്‍ കൂടിയായിരുന്നു അത്. ഫീഹക്കെതിരെയുള്ള രണ്ടാം പാദ മത്സരം ഈ മാസം 21ന് അല്‍ നസ്‌റിന്റെ അല്‍ അവ്വല്‍ പാര്‍ക്ക് സ്റ്റേഡിയത്തില്‍ നടക്കും.

അഞ്ച് തവണ ബാലന്‍ ഡി ഓര്‍ ജേതാവായ ക്രിസ്റ്റ്യാനോ സ്‌പോര്‍ട്ടിംഗ് ലിസ്ബണ്‍, മാഞ്ചസ്റ്റര്‍ യുണൈറ്റഡ്, റയല്‍ മാഡ്രിഡ്, യുവന്റസ്, അല്‍ നസ്ര്‍ എന്നീ ക്ലബുകളിലൂടെയാണ് 1000 മത്സരങ്ങള്‍ പൂര്‍ത്തിയാക്കിയത്.അഞ്ച് ചാമ്പ്യന്‍സ് ലീഗുകളും മൂന്ന് വ്യത്യസ്ത രാജ്യങ്ങളിലായി ഏഴ് ലീഗ് കിരീടങ്ങളും ആറ് ആഭ്യന്തര കപ്പ് ട്രോഫികളും കരിയറില്‍ നേടി.

2002-ല്‍ അരങ്ങേറ്റം കുറിച്ച താരം ഇതുവരെ 700-ലധികം ഗോളുകളും 200-ലധികം അസിസ്റ്റുകളും കരസ്ഥമാക്കിയിട്ടുണ്ട്്. 450 ഗോളുകള്‍ നേടിയ റയല്‍ മാഡ്രിഡിന്റെ എക്കാലത്തെയും ടോപ് സ്‌കോറര്‍ കൂടിയാണ് റൊണാള്‍ഡോ.