ഐഎസ്എല്ലില്‍ ബംഗളൂരു എഫ്‌സിയോട് തോല്‍വി വഴങ്ങി കേരള ബ്ലാസ്റ്റേഴ്‌സ്. എതിരില്ലാത്ത ഒരു ഗോളിനായിരുന്നു മഞ്ഞപ്പടയുടെ തോല്‍വി. 89-ാം മിനിറ്റില്‍ സാവി ഹെര്‍ണാണ്ടസാണ് ബംഗളൂരുവിന് വേണ്ടി വിജയഗോള്‍ നേടിയത്.

തോല്‍വിയോടെ ബ്ലാസ്റ്റേഴ്‌സ് അഞ്ചാം സ്ഥാനത്തേക്ക് വീണു. 17 മത്സരങ്ങള്‍ പൂര്‍ത്തിയാക്കിയ ബ്ലാസ്റ്റേഴ്സിന് 29 പോയിന്റാണുള്ളത്. 18 മത്സരങ്ങള്‍ പൂര്‍ത്തിയാക്കിയ ബംഗളൂരു എഫ്സി 21 പോയിന്റുമായി ആറാമത്. ബംഗളൂരുവിന്റെ ഹോം ഗ്രൗണ്ടായ ശ്രീ കാണ്ഠീരവ സ്റ്റേഡിയത്തിലായിരുന്നു മത്സരം.

തുടക്കം മുതല്‍ ബംഗളൂരു ആണ് മത്സരത്തില്‍ ആധിപത്യം കാണിച്ചത്. ബ്ലാസ്റ്റേഴ്‌സിന്റെ ഗോള്‍പോസ്റ്റിലേക്ക് 9 ഷോട്ടുകള്‍ ബംഗളൂരു തൊടുത്തപ്പോള്‍ അതില്‍ രണ്ടെണ്ണം ലക്ഷ്യത്തിലെത്തി.

മത്സരം സമനിലയിലേക്ക് നീങ്ങുമെന്ന് ഉറപ്പിച്ചിരിക്കെയാണ് ബംഗളൂരു എഫ്സിയുടെ വിജയഗോള്‍ പിറന്നത്. മത്സരം അവസാനിക്കാനായി മിനിറ്റുകള്‍ മാത്രമുള്ളപ്പോള്‍ ഹെര്‍ണാണ്ടസ് പന്ത് ഗോള്‍വര കടത്തുകയായിരുന്നു. തുടക്കത്തില്‍ ഗംഭീര പ്രകടനം കാഴ്ചവെച്ച ബ്ലാസ്റ്റേഴ്‌സ് പിന്നീട് തുടര്‍ പരാജയത്തിലേക്ക് വീഴുകയായിരുന്നു.