ഇന്ത്യന്‍ സൂപ്പര്‍ ലീഗില്‍ ജംഷഡ്പൂര്‍ എഫ്‌സിക്കെതിരെയും വിജയിക്കാന്‍ സാധിക്കാതെ കേരള ബ്ലാസ്റ്റേഴ്‌സ്. സീസണിലെ 19ാം മത്സരത്തില്‍ ആതിഥേയര്‍ ബ്ലാസ്റ്റേഴ്‌സിനെ സമനിലയില്‍ തളയ്ക്കുകയായിരുന്നു. ഇരു ടീമുകളും ഓരോ ഗോള്‍ വീതം നേടി. 23ാം മിനിറ്റില്‍ ഗോള്‍ നേടി ദിമിത്രിയോസ് ഡയമെന്റകോസാണു ബ്ലാസ്റ്റേഴ്‌സിനെ മുന്നിലെത്തിച്ചത്.

ബോക്‌സിനു പുറത്തു നിന്ന് ഇമ്മാനുവല്‍ ജസ്റ്റിന്‍ പാസ് ചെയ്തു നല്‍കിയ പന്ത് ഗ്രീക്ക് താരം വലയിലെത്തിക്കുകയായിരുന്നു. 45ാം മിനിറ്റില്‍ യുവതാരം ജാവിയര്‍ സിവേരിയോ ജംഷഡ്പൂരിനായി സമനില ഗോള്‍ നേടി. 30 പോയിന്റുമായി നിലവില്‍ അഞ്ചാം സ്ഥാനത്താണ് ബ്ലാസ്റ്റേഴ്‌സ്.

പ്ലേ ഓഫ് ഉറപ്പിക്കാനായി മഞ്ഞപ്പടയ്ക്ക് ഇനിയും കാത്തിരിക്കണം. 19 മത്സരങ്ങളില്‍ നിന്ന് ഒന്‍പതു വിജയവും ഏഴു തോല്‍വിയുമാണു ബ്ലാസ്റ്റേഴ്‌സിനുള്ളത്. മൂന്നു മത്സരങ്ങള്‍ സമനിലയില്‍ കലാശിച്ചു.

ഏപ്രില്‍ മൂന്നിന് ഈസ്റ്റ് ബംഗാളിനെതിരെയാണ് ബ്ലാസ്റ്റേഴ്‌സിന്റെ അടുത്ത കളി. കൊച്ചി ജവഹര്‍ലാല്‍ നെഹ്‌റു സ്റ്റേഡിയത്തില്‍ വച്ചാണു മത്സരം നടക്കുക