കേരള ബ്ലാസ്റ്റേഴ്സ് ഇന്ന് ഈസ്റ്റ് ബംഗാളിനോട് പൊരുതും. കൊച്ചി ജവഹര്‍ലാല്‍ നെഹ്റു സ്റ്റേഡിയത്തില്‍ രാത്രി ഏഴരയ്ക്കാണ് പോരാട്ടം. സമനില മതി ബ്ലാസ്റ്റേഴ്സിന്. 19 കളിയില്‍ 30 പോയിന്റുമായി അഞ്ചാംസ്ഥാനത്താണ്. പ്ലേ ഓഫ് വാതിലുകള്‍ നേരത്തേ അടഞ്ഞ ഈസ്റ്റ് ബംഗാളാകട്ടെ 19 കളിയില്‍ 18 പോയിന്റുമായി 11-ാമതാണ്. സീസണിന്റെ തുടക്കം കസറിയ ബ്ലാസ്റ്റേഴ്സിന് രണ്ടാംഘട്ടത്തില്‍ അടിപതറി.

അവസാന ഏഴുകളിയില്‍ ഒന്നില്‍മാത്രമാണ് ജയിക്കാന്‍ കഴിഞ്ഞത്. പ്രധാന കളിക്കാര്‍ പരിക്കേറ്റ് പുറത്തായതാണ് മങ്ങലിന് കാരണമായത്. ഏറ്റവും ഒടുവില്‍ മുന്നേറ്റക്കാരനായി ഇമ്മാനുവല്‍ ജസ്റ്റിനാണ് മടങ്ങിയത്. ഈ സീസണില്‍ കളിക്കാനാകുമോ എന്നുറപ്പില്ലെന്ന് പരിശീലകന്‍ ഇവാന്‍ വുകോമനോവിച്ച് അറിയിച്ചു.അവസാനകളിയില്‍ ജംഷഡ്പുര്‍ എഫ്സിയോട് 1-1ന് സമനില വഴങ്ങിയാണ് ബ്ലാസ്റ്റേഴ്സിന്റെ വരവ്.

മുന്നിലെത്തിയിട്ടും ലീഡ് നിലനിര്‍ത്താനായില്ല. ഗ്രീക്ക് മുന്നേറ്റക്കാരന്‍ ദിമിത്രിയോസ് ഡയമന്റാകോസാണ് ടീമിലെ പ്രതീക്ഷ. ഗോള്‍വേട്ടക്കാരില്‍ 13 ഗോളുമായി ഒന്നാമനാണ് ഈ മുപ്പത്തൊന്നുകാരന്‍. പ്രതിരോധത്തിലെ പോരായ്മകളാണ് ടീമിന്റെ തലവേദന. ഇന്ന് മാറ്റങ്ങളുണ്ടാകില്ല.

എന്നാല്‍, അടുത്ത രണ്ടുകളിയിലും പ്രധാന താരങ്ങള്‍ക്ക് വിശ്രമം നല്‍കുമെന്ന് പരിശീലകന്‍ വ്യക്തമാക്കി. സ്വന്തംതട്ടകത്തിലെ അവസാന ലീഗ് മത്സരമാണിത്. പ്ലേ ഓഫിന് കൊച്ചി വേദിയാകുമോയെന്ന് ഉറപ്പില്ല. ആറിന് നോര്‍ത്ത് ഈസ്റ്റ് യുണൈറ്റഡുമായും 12ന് ഹൈദരാബാദ് എഫ്സിയുമായുമാണ് ശേഷിക്കുന്ന കളി.