ഇംഗ്ലീഷ് പ്രീമിയര് ലീഗില് ല്യൂട്ടന് ടൗണിനെ എതിരില്ലാത്ത രണ്ട് ഗോളിന് വീഴ്ത്തി വീണ്ടും ഒന്നാം സ്ഥാനത്തേക്ക് കയറി ആഴ്സണല്...
ഇംഗ്ലീഷ് പ്രീമിയര് ലീഗില് ല്യൂട്ടന് ടൗണിനെ എതിരില്ലാത്ത രണ്ട് ഗോളിന് വീഴ്ത്തി വീണ്ടും ഒന്നാം സ്ഥാനത്തേക്ക് കയറി ആഴ്സണല്. സ്വന്തം തട്ടകമായ എമിറേറ്റ്സ് സ്റ്റേഡിയത്തില് നടന്ന പോരാട്ടത്തില് മാര്ട്ടിന് ഒഡേഗാര്ഡിന്റെ ഗോളും ജപ്പാന്കാരന് ഡെയ്കി ഹാഷിയോകയുടെ ഓണ്ഗോളുമാണ് ഗണ്ണേഴ്സിന് നിര്ണായക ജയം നേടിക്കൊടുത്തത്.
കഴിഞ്ഞ മത്സരത്തില് നിന്ന് അഞ്ച് മാറ്റങ്ങളുമായാണ് മൈക്കല് ആര്ടേറ്റ ടീമിനെ ഇറക്കിയത്. പ്രധാന ഗോള്വേട്ടക്കാരന് ബുകായോ സാക പരിക്ക് കാരണം പുറത്തിരുന്നപ്പോള് ഡെക്ലാന് റൈസ്, ഗബ്രീയേല് ജീസസ്, ജോര്ജീഞ്ഞോ തുടങ്ങിയവര്ക്ക് വിശ്രമം നല്കുകയായിരുന്നു.
മത്സരത്തിന്റെ തുടക്കത്തില് തന്നെ എതിര്പോസ്റ്റിന് മുന്നിലെ കൂട്ടപ്പൊരിച്ചിലില് ആഴ്സണല് നിരവധി അവസരങ്ങള് തുറന്നെടുത്തെങ്കിലും ല്യൂട്ടന് ഗോള്കീപ്പറും പ്രതിരോധ താരങ്ങളും ചേര്ന്ന് വിഫലമാക്കി.
എന്നാല്, 24ാം മിനിറ്റില് ആഴ്സണല് ലക്ഷ്യം കണ്ടു. വലതുവിങ്ങില്നിന്ന് കായ് ഹാവെര്ട്സ് നല്കിയ മനോഹര പാസ് പിഴവില്ലാതെ മാര്ട്ടിന് ഒഡേഗാര്ഡ് വലയിലേക്ക് തട്ടിയിടുകയായിരുന്നു.
ഒന്നാം പകുതി അവസാനിക്കാനിരിക്കെ ആഴ്സണലിന്റെ ലീഡ് ഇരട്ടിച്ചു. ഇടതുവിങ്ങില്നിന്ന് സ്മിത്ത് റോവ് റീസ് നെല്സനെ ലക്ഷ്യമാക്കി നല്കിയ ക്രോസ് എതിര് പ്രതിരോധ താരം ഡെയ്കി ഹാഷിയോകയുടെ കാലില് തട്ടി സ്വന്തം വലയില് കയറുകയായിരുന്നു. രണ്ടാം പകുതിയില് ഗോള് നേടാനുള്ള നിരവധി അവസരങ്ങള് ആഴ്സണല് തുറന്നെടുത്തെങ്കിലും ല്യൂട്ടന് പ്രതിരോധം ഉറച്ചുനിന്നതോടെ ശ്രമങ്ങളെല്ലാം പരാജയപ്പെടുകയായിരുന്നു.
"
https://www.facebook.com/Malayalivartha
