ഇന്ത്യന്‍ സൂപ്പര്‍ ലീഗ് ഫുട്ബോളില്‍ ഹൈദരാബാദ് എഫ്.സിക്കെതിരേ 3-1 ന്റെ തകര്‍പ്പന്‍ ജയവുമായി കേരളാ ബ്ലാസ്റ്റേഴ്സ്. ഗച്ചിബൗളി സ്റ്റേഡിയത്തില്‍ നടന്ന മത്സരത്തില്‍ ബ്ലാസ്റ്റേഴ്സിനായി മുഹമ്മദ് അയ്മന്‍, ദെയ്സുകെ സകായി, നിഹാല്‍ സുധീഷ് എന്നിവര്‍ ഗോളടിച്ചു. ജോയ വിക്ടറാണ് ഹൈദരാബാദിനായി ഗോളടിച്ചത്.

ബ്ലാസ്റ്റേഴ്സിന്റെ ലീഗ് സീസണിലെ അവസാന ലീഗ് മത്സരമായിരുന്നു അത്. 22 കളികളില്‍ നിന്ന് 33 പോയിന്റ് നേടിയ ബ്ലാസ്റ്റേഴ്സ് അഞ്ചാം സ്ഥാനത്തു തുടര്‍ന്നു. 22 കളികളില്‍നിന്ന് എട്ട് പോയിന്റ് മാത്രം നേടിയ ഹൈദരാബാദ് ഏറ്റവും പിന്നില്‍ 12-ാമതാണ്.

ഒരു ജയം മാത്രമാണ് അവര്‍ക്കു കുറിക്കാനായത്. ഡിസംബറില്‍ മോഹന്‍ ബഗാന്‍ സൂപ്പര്‍ ജയന്റ്സിനെ തോല്‍പ്പിച്ച ശേഷമുള്ള ബ്ലാസ്റ്റേഴ്സിന്റെ ആദ്യ എവേ ജയമാണിത്. മത്സരത്തിന്റെ 34-ാം മിനിറ്റില്‍ വലതു വിങ്ങില്‍നിന്ന് സൗരവ് നല്‍കിയ ഒരു ക്രോസ് ഹെഡറിലൂടെ മുഹമ്മദ് ഐമന്‍ വലയിലാക്കി.

51-ാം മിനിറ്റില്‍ ഡെയ്സുകെയിലൂടെ ബ്ലാസ്റ്റേഴ്സ് ലീഡ് ഇരട്ടിയാക്കി. സൗരവിന്റെ അസിസ്റ്റില്‍ നിന്നായിരുന്നു രണ്ടാം ഗോളും. പകരക്കാരനായെത്തിയ നിഹാല്‍ മൂന്നാം ഗോളുമടിച്ചു. ഐമന്റെ അസിസ്റ്റില്‍ നിന്നായിരുന്നു ഈ ഗോള്‍.