ഇരട്ട ഗോളും അസിസ്റ്റും ഉള്‍പ്പെടെ ലയണല്‍ മെസ്സി കളം നിറഞ്ഞ മത്സരത്തില്‍ ഇന്റര്‍ മയാമിക്ക് ജയം. നാഷ് വില്ലയെ (31) ഒന്നിനെതിരെ മൂന്ന് ഗോളിനാണ് തകര്‍ത്തത്. സ്പാനിഷ് മിഡ്ഫീല്‍ സെര്‍ജിയോ ബുസ്‌കറ്റ്‌സും ഗോള്‍ നേടുകയും ചെയ്തു.
കളിയുടെ രണ്ടാമത്തെ മിനിറ്റില്‍ തന്നെ മയാമി ഡിഫന്‍ഡര്‍ ഫ്രാങ്കോ നെഗ്രിയുടെ ഓണ്‍ഗോളിലൂടെ നാഷ് വില്ലയാണ് ആദ്യം ലീഡെടുക്കുന്നത്. എന്നാല്‍ 11ാം മിനിറ്റില്‍ മെസ്സിയുടെ ഗോളിലൂടെ മയാമി ഒപ്പമെത്തി.


മെസ്സിയുടെ ഷോട്ട് ആദ്യ ഗോള്‍ കീപ്പര്‍ തട്ടിത്തെറിപ്പിച്ചെങ്കിലും ലൂയി സുവാരസ് വീണ്ടും അത് മെസ്സിയില്‍ തന്നെ എത്തിച്ചു. പിഴവുകളില്ലാതെ രണ്ടാമത്തെ ശ്രമം വലയിലെത്തി. 39ാം മിനിറ്റില്‍ മെസ്സിയെടുത്ത കോര്‍ണര്‍ കിക്ക് സെര്‍ജിയോ ബുസ്‌കറ്റ്‌സ് ഗോളാക്കി മാറ്റിയതോടെ മയാമി ലീഡെടുത്തു. ഒരു ഗോളിന്റെ ലീഡുമായി ആരംഭിച്ച രണ്ടാപകുതിയുടെ അവസാനം 81ാം മിനിറ്റില്‍ മയാമി അനുകൂലമായി പെനാല്‍റ്റി ലഭിച്ചു.

കിക്കെടുത്ത മെസ്സി മയാമിയുടെ ലീഡ് ഇരട്ടിയാക്കി.എം.എല്‍.എസ് പുതിയ സീസണില്‍ ഒന്‍പത് ഗോള്‍ നേടി മെസ്സി ലീഗ് ടോപ്പറായി. കഴിഞ്ഞ സീസണില്‍ എറ്റവും പിറകില്‍ 14ാം സ്ഥാനക്കാരായി ഫിനിഷ് ചെയ്ത ഇന്റര്‍മയാമി പുതിയ സീസണില്‍ എം.എല്‍.എസ് ഈസ്‌റ്റേണ്‍ കോണ്‍ഫ്രന്‍സില്‍ 10 കളില്‍ 18 പോയിന്റുമായി ഒന്നാം സ്ഥാനത്ത് നില്‍ക്കുകയാണ്.