സൗദി കിംഗ്സ് കപ്പ് ഫൈനലില്‍ ക്രിസ്റ്റ്യാനോ റൊണാള്‍ഡോയുടെ അല്‍ നസറിനെ തോല്‍പ്പിച്ച് അല്‍ ഹിലാലിന് കിരീടം. പെനാല്‍റ്റി ഷൂട്ടൗട്ടിലൂടെയാണ് അല്‍ ഹിലാലിന്റെ കിരീട നേട്ടം.

കളിയുടെ 90 മിനുട്ടും ഇരു ടീമുകളും ഓരോ ഗോള്‍ അടിച്ചു മത്സരം സമനിലയില്‍ നിന്നു. പിന്നിടുള്ള എക്സ്ട്രാടൈമിലും ഇതിന് മാറ്റമുണ്ടായില്ല. ഇതോടെയാണ് ഫൈനല്‍ പോരാട്ടം പെനാല്‍റ്റി ഷൂട്ടൗട്ടിലേക്ക് നീങ്ങിയത്. 5-4 എന്ന സ്‌കോറിനാണ് പെനാല്‍റ്റിയില്‍ അല്‍ ഹിലാലിന്റെ ജയം. ലീഗ് കപ്പ് നേടിയതിന് പിന്നാലെ അല്‍ ഹിലാലിന്റെ മറ്റൊരു കിരീട നേട്ടമാണിത്.

നേരത്തെ ഏഴാം മിനുറ്റില്‍ അലക്‌സാണ്ടര്‍ മിട്രോവിച്ച് അല്‍ ഹിലാലിനെ മുന്നിലെത്തിച്ചപ്പോള്‍ ഐമന്‍ യഹ്യയിലൂടെ 88-ാം മിനുറ്റിലാണ് അല്‍ നസര്‍ സമനില പിടിച്ചത്. ഇതോടെയാണ് കലാശപ്പോര് ഷൂട്ടൗട്ടിലേക്ക് നീങ്ങിയത്. ഗോളി ബോണോയുടെ മികവിലാണ് അല്‍ ഹിലാല്‍ വിജയത്തേരിലേറിയത്. സൂപ്പര്‍ താരം ക്രിസ്റ്റ്യാനോ റൊണാള്‍ഡോയ്ക്ക് അല്‍ നസറിനായി കിംഗ്സ് കപ്പ് ഫൈനലിന്റെ രണ്ട് പാദങ്ങളിലും ഗോളുകള്‍ കണ്ടെത്താനായില്ല.

റൊണാള്‍ഡോയുടെ ഒരു ബൈസിക്കിള്‍ കിക്ക് പോസ്റ്റില്‍ തട്ടി തെറിക്കുന്നതും മത്സരത്തില്‍ കാണാനായി. കിരീടം നഷ്ടപ്പെട്ടതോടെ ഏറെ വൈകാരികമായാണ് റൊണാള്‍ഡോ സ്റ്റേഡിയം വിട്ടത്.