സൗദി സൂപ്പര്‍ കപ്പില്‍ അല്‍ ഹിലാലിന് കിരീടം...
സൗദി സൂപ്പര്‍ കപ്പില്‍ അല്‍ ഹിലാലിന് കിരീടം. ഒന്നിനെതിരെ നാല് ഗോളിന് അല്‍ നസറിനെ തോല്‍പ്പിച്ചാണ് അല്‍ ഹിലാലിന്റെ നേട്ടം. സൂപ്പര്‍ താരം ക്രിസ്റ്റ്യാനോ റൊണാള്‍ഡോ അല്‍ നസറിന് വേണ്ടി ഗോള്‍ നേടിയെങ്കിലും ടീമിനെ കിരീട നേട്ടത്തിലേക്ക് നയിക്കാന്‍ അദ്ദേഹത്തിന് കഴിഞ്ഞില്ല
44ാം മിനിറ്റില്‍ അല്‍ നസറാണ് മത്സരത്തില്‍ ആദ്യം വലകുലുക്കിയത്. ക്രിസ്റ്റ്യാനോ റൊണോള്‍ഡോയുടെ വകയായിരുന്നു ഗോള്‍. ആദ്യ പകുതിയില്‍ ലീഡെടുത്തെങ്കിലും വമ്പന്‍ തിരിച്ചു വരവാണ് രണ്ടാം പകുതിയില്‍ അല്‍ ഹിലാല്‍ നടത്തിയത്.
സെര്‍ബിയന്‍ മിഡ്ഫീല്‍ഡര്‍ സെര്‍ജെജ് മിലിന്‍കോവിക് സാവിക് അല്‍ ഹിലാലിനായി 55ാം മിനിറ്റല്‍ സമനില പിടിച്ചു. സമനില നേടി പത്ത് മിനിറ്റ് പൂര്‍ത്തിയാവുന്നതിന് മുമ്പ് തന്നെ അല്‍ ഹിലാല്‍ ലീഡും നേടി.
സെര്‍ബിയന്‍ താരം അലക്‌സാണ്ടര്‍ മിത്രോവികിന്റെ വകയായിരുന്നു ഗോള്‍. ആറ് മിനിറ്റിന് ശേഷം മിത്രോവിക് തന്നെ ഒരിക്കല്‍ കൂടി വലകുലുക്കി. 72ാം മിനിറ്റില്‍ ബ്രസീലിന്റെ മാല്‍കോം ഫെലിപ്പെ നാലാം ഗോളും നേടി അല്‍ ഹിലാലിന്റെ പട്ടിക പൂര്‍ത്തിയാക്കി. സൗദി സൂപ്പര്‍ കപ്പില്‍ അഞ്ച് തവണ അല്‍ ഹിലാല്‍ മുത്തമിട്ടിട്ടുണ്ട്. രണ്ട് തവണയാണ് അല്‍ നസറിന് കിരീടം നേടാനായി സാധിച്ചത്.
"
https://www.facebook.com/Malayalivartha
