വെസ്റ്റ്ഹാം യുനൈറ്റഡിനെ വീഴ്ത്തി മാഞ്ചസ്റ്റര്‍ സിറ്റി ഇംഗ്ലീഷ് പ്രീമിയര്‍ ലീഗ് തലപ്പത്ത്. ലണ്ടന്‍ സ്‌റ്റേഡിയത്തില്‍ നടന്ന മത്സരത്തില്‍ ഒന്നിനെതിരെ മൂന്നു ഗോളുകള്‍ക്കാണ് സിറ്റിയുടെ കുതിപ്പ്.

തുടര്‍ച്ചയായ രണ്ടാം മത്സരത്തിലാണ് ഹാലന്‍ഡ് ഹാട്രിക് നേടുന്നത്. കഴിഞ്ഞ മത്സരത്തില്‍ ഇപ്‌സ്വിചിനെതിരെയും താരം ഹാട്രിക് നേടിയിരുന്നു. മൂന്നു മത്സരങ്ങളില്‍ നിന്ന് താരത്തിന്റെ ഗോള്‍ നേട്ടം ഏഴായി മാറി.

സിറ്റിക്കായി 11ാം തവണയാണ് താരം ഹാട്രിക് തികക്കുന്നത്. തുടര്‍ച്ചയായ മൂന്നാം ജയത്തോടെ ഒമ്പത് പോയന്റുമായി പെപ് ഗ്വാര്‍ഡിയോളയും സംഘവും പോയന്റ് പട്ടികയില്‍ ഒന്നാമതെത്തി. മൂന്നു മത്സരങ്ങളില്‍നിന്ന് ഏഴു പോയന്റ് വീതമുള്ള െ്രെബറ്റണും ആഴ്‌സണലുമാണ് രണ്ടും മൂന്നൂം സ്ഥാനങ്ങളിലെത്തി.

കളിയിലുടനീളം സിറ്റിയുടെ ആധിപത്യമായിരുന്നു. കിക്കോഫ് ഫിസില്‍ മുഴങ്ങി പത്താം മിനിറ്റില്‍തന്നെ ഹാലന്‍ഡ് സിറ്റിയെ മുന്നിലെത്തിച്ചു. ബെര്‍ണാഡോ സില്‍വ നല്‍കിയ പാസ് സ്വീകരിച്ച ഹാലന്‍ഡ് പന്ത് വലയിലാക്കി.

എന്നാല്‍, 19ാം മിനിറ്റില്‍ സെല്‍ഫ് ഗോളിലൂടെ വെസ്റ്റ്ഹാം ഒപ്പമെത്തി. ബോക്‌സിന്റെ വലതുപാര്‍ശ്വത്തില്‍നിന്ന് ജറോഡ് ബോവന്‍സ് തൊടുത്ത ക്രോസ് റൂബന്‍ ഡയസിന്റെ കാലില്‍ തട്ടി പോസ്റ്റില്‍ കയറി. 30ാം മിനിറ്റില്‍ ഹാലന്‍ഡിന്റെ ഗോളിലൂടെ സിറ്റി വീണ്ടും മുന്നിലെത്തുകയായിരുന്നു.