പ്രതികൂല കാലാവസ്ഥയില്‍ ലോകകപ്പ് ഫൈനലിന് ഇനി മണിക്കൂറുകള്‍ മാത്രം ശേഷിക്കേ സ്പാനിഷ് ടീമിന്റെ പരിശീലനം നിര്‍ത്തിവച്ചു. ശനിയാഴ്ച പ്രദേശത്ത് ശക്തമായ ഇടിമിന്നലും കൊടുങ്കാറ്റും ഉണ്ടായതിനെത്തുടര്‍ന്ന് പരിശീലനം തടസപ്പെട്ടതായി ടീം മാനേജ്‌മെന്റ് അറിയിച്ചു. തുടര്‍ന്ന് ഗ്രൗണ്ടിലെ പരിശീലനം ഒഴിവാക്കി കളിക്കാര്‍ ഇന്‍ഡോര്‍ സ്‌റ്റേഡിയത്തിലേക്ക് മാറി. ടീമിന് ഔട്ട്‌ഡോര്‍ ഗ്രൗണ്ടിലിറങ്ങാന്‍ സാധിക്കുമോയെന്ന കാര്യത്തില്‍ വ്യക്തതയില്ല.

അതേസമയം, ന്യൂ ജേഴ്‌സിയിലെ മോറിസ്ടൗണില്‍ നിശ്ചയിച്ചതിലും 45 മിനിട്ട് വൈകിയാണ് അര്‍ജന്റീന ടീമിന്റെ പരിശീലനം ആരംഭിച്ചതെന്നാണ് റിപ്പോര്‍ട്ട്. ന്യൂയോര്‍ക്കിലെ ന്യൂജഴ്‌സി സ്‌റ്റേഡിയത്തില്‍ ഞായറാഴ്ച അര്‍ദ്ധരാത്രിയാണ് ഫൈനല്‍. കൃത്യമായി പറഞ്ഞാല്‍ ഇന്ത്യന്‍ സമയം തിങ്കളാഴ്ച വെളുപ്പിന് 12.30 മുതല്‍. ചരിത്രത്തിലാദ്യമായി ഫൈനലിന്റെ ഹാഫ്‌ടൈമില്‍ ഫിഫ സംഘടിപ്പിക്കുന്ന പ്രത്യേക ആഘോഷ പരിപാടി ഉള്ളതിനാല്‍ 90 മിനിട്ട് നിശ്ചിതസമയം പൂര്‍ത്തിയാകാന്‍ തന്നെ വെളുപ്പിന് രണ്ടേമുക്കാലോളമാകും. അധികസമയമോ ഷൂട്ടൗട്ടോ വന്നാല്‍ പിന്നെയും മുക്കാല്‍ മണിക്കൂറോളം വേണ്ടിവരും വിധിയറിയാന്‍.

ഇതുവരെയും ഒരു മത്സരം പോലും തോല്‍ക്കാതെയാണ് അര്‍ജന്റീനയും സ്‌പെയ്‌നും ഫൈനലിലെത്തുന്നത്. ആദ്യ റൗണ്ടില്‍ ദുര്‍ബലരായ എതിരാളികളോട് മിന്നുന്ന വിജയങ്ങള്‍ നേടിയ മെസിയും സംഘവും പക്ഷേ നോക്കൗട്ടിലെ ആദ്യ മത്സരം ശരിക്കും വെള്ളംകുടിച്ചുതുടങ്ങി. കേപ്പ് വെര്‍ദേ, ഈജിപ്ത്, സ്വിറ്റ്‌സര്‍ലാന്‍ഡ്, ഇംഗ്‌ളണ്ട് എന്നിവരോടെല്ലാം അവസാനസമയത്തെ ആര്‍ജവവും മെസിയുടെ സാന്നിദ്ധ്യവും കൊണ്ടുമാത്രമാണ് അര്‍ജന്റീന ജയിച്ചത്. മറുവശത്ത് ആദ്യ കളിയില്‍ കേപ് വെര്‍ദേയോട് ഗോള്‍രഹിത സമനില വഴങ്ങിയ സ്‌പെയ്ന്‍ പിന്നീട് എല്ലാകളികളും നേടിയത് ആധികാരിക വിജയങ്ങള്‍. ക്വാര്‍ട്ടറില്‍ ബെല്‍ജിയത്തിന് എതിരെ മാത്രമാണ് ഒരു ഗോളെങ്കിലും വഴങ്ങിയത്.