സൂപ്പര്‍ താരം ലയണല്‍ മെസ്സി തിരിച്ചെത്തിയ മത്സരത്തില്‍ വെനസ്വേലയ്‌ക്കെതിരായ സൗഹൃദ മത്സരത്തില്‍ അര്‍ജന്റീനയ്ക്ക് ദയനീയ തോല്‍വി
സൂപ്പര്‍ താരം ലയണല്‍ മെസ്സി തിരിച്ചെത്തിയ മത്സരത്തില്‍ വെനസ്വേലയ്‌ക്കെതിരായ സൗഹൃദ മത്സരത്തില്‍ അര്‍ജന്റീനയ്ക്ക് ദയനീയ തോല്‍വി. ഒന്നിനെതിരേ മൂന്നു ഗോളുകള്‍ക്കാണ് വെനസ്വേല, അര്‍ജന്റീനയെ തകര്‍ത്തത്. മത്സരത്തില്‍ ഉടനീളം ആധിപത്യം വെനസ്വേലയ്ക്കായിരുന്നു.സലോമോന്‍ റോണ്‍ഡോണ്‍, ജോണ്‍ മുറില്ലോ, ജോസഫ് മാര്‍ട്ടിനസ് എന്നിവരാണ് വെനസ്വേലയ്ക്കായി സ്‌കോര്‍ ചെയ്തത്. അര്‍ജന്റീനയുടെ ആശ്വാസ ഗോള്‍ നേടിയത് ലോട്ടാറോ മാര്‍ട്ടിനസായിരുന്നു.
മത്സരം ആരംഭിച്ച് ആറാം മിനിറ്റില്‍ തന്നെ വെനസ്വേല മുന്നിലെത്തി. റൊസാല്‍സ് നല്‍കിയ പാസ് ന്യൂകാസില്‍ യുണൈറ്റഡ് താരം റോണ്‍ഡോണ്‍ വലയിലെത്തിച്ചു. ആദ്യ പകുതി അവസാനിക്കും മുന്‍പ് മുറില്ലോയിലൂടെ വെനസ്വേല ലീഡുയര്‍ത്തി. റൊസാല്‍സിന്റെ അസിസ്റ്റില്‍ നിന്നു തന്നെയായിരുന്നു രണ്ടാം ഗോളും. രണ്ടു ഗോളിന് പിന്നിലായതോടെ രണ്ടാം പകുതിയില്‍ മൂന്നു മാറ്റങ്ങളുമായാണ് അര്‍ജന്റീന കളത്തിലിറങ്ങിയത്.
59ാം മിനിറ്റില്‍ ലോട്ടാറോ മാര്‍ട്ടിനസിലൂടെ അര്‍ജന്റീന ഒരു ഗോള്‍ മടക്കിയെങ്കിലും 75ാം മിനിറ്റില്‍ വഴങ്ങിയ പെനാല്‍റ്റി സമനിലയെങ്കിലും നേടാമെന്നുള്ള അവരുടെ പ്രതീക്ഷയ്ക്ക് തിരിച്ചടിയായി.
https://www.facebook.com/Malayalivartha
