മിസോറം സംസ്ഥാന ഗെയിംസ് 2019-ല്‍ ചൂടുപിടിച്ച വോളിബോള്‍ മത്സരം നടക്കുന്നതിനിടയില്‍ ഗെയിംസ് കാണാനെത്തിയ പ്രേക്ഷകരുടെ ശ്രദ്ധ പിടിച്ചു പറ്റിയ ഒരു രംഗം, ഇപ്പോള്‍ ഓണ്‍ലൈനില്‍ അനേകരെ പ്രചോദിപ്പിച്ച് വൈറലായി മാറിയിരിക്കുകയാണ്.

ഹാഫ് ടൈമില്‍ കുഞ്ഞിന് പാലു കൊടുക്കാനെത്തിയ വോളിബോള്‍ താരമായ മാതാവിന്റെ വാത്സല്യത്തിനാണ് സോഷ്യല്‍ മീഡിയ കയ്യടിക്കുന്നത്. തൂയ്കൂം മണ്ഡലത്തിന് വേണ്ടി കളിക്കാനെത്തിയ ലാല്‍വെന്റ്ലുവാംഗിയാണ് സോഷ്യല്‍ മീഡിയയില്‍ താരമായത്.

ഐസ്വാളില്‍ തിങ്കളാഴ്ച തുടങ്ങിയ ഗെയിംസിന്റെ ആദ്യ ദിനത്തില്‍ കളിക്കിടെ തന്റെ ഏഴു മാസം പ്രായമുള്ള കുഞ്ഞിനെയാണ് ഇവര്‍ മുലയൂട്ടിയത്. സെര്‍ച്ചിപ്പ് ജില്ലയെ പ്രതിനിധീകരിച്ച കളിക്കാനെത്തിയ യുവ മാതാവ് പാലുകൊടുക്കുന്ന ചിത്രം ആരോ പകര്‍ത്തി ഓണ്‍ലൈനില്‍ പോസ്റ്റ് ചെയ്യുകയായിരുന്നു. മണിക്കൂറുകള്‍ക്കകം ചിത്രം വൈറലായി മാറി. ചിത്രം ശ്രദ്ധയില്‍ പെട്ടതോടെ അനേകരാണ് അഭിനന്ദിച്ച് എത്തിയത്.

പൊതുവേദിയില്‍ പോലും സാധാരണ രീതിയില്‍ മുലയൂട്ടാനുള്ള മാതാവിന്റെ ധൈര്യത്തെ സാമൂഹ്യ മാധ്യമങ്ങളിലൂടെ അനേകരാണ് വാഴ്ത്തിയിരിക്കുന്നത്. ചിത്രം അനേകരിലൂടെ മിസോറം കായികമന്ത്രി റോബര്‍ട്ട് റോമാവിയ റോയ്ട്ടേയുടെ കണ്ണിലും പെട്ടു. തന്റെ അഭിനന്ദനം എന്ന നിലയില്‍ മാതാവിന് 10,000 രൂപ റോയ്ട്ടേ തൊട്ടു പിന്നാലെ തന്നെ പ്രഖ്യാപിക്കുകയും ചെയ്തു.

മാതാവ്, കായിക താരം എന്നിങ്ങനെയുള്ള ഇരട്ട ഉത്തരവാദിത്വങ്ങളോടുള്ള ലാല്‍വെന്റ്ലുവാംഗിയുടെ സമീപനത്തേയും സമര്‍പ്പണത്തേയും അനേകരാണ് പുകഴ്ത്തിയിരിക്കുന്നത്.

മാതൃസ്നേഹത്തിന്റെ യഥാര്‍ത്ഥ ഉദാഹരണമാണ് ലാല്‍വെന്റ്ലുവാംഗി എന്നും ഒരു സ്ത്രീ തന്റെ കായികജീവിതത്തെയും വ്യക്തിഗത ജീവിതത്തെയും ഒരു പോലെ പരിപാലിച്ചു കൊണ്ടു പോകുന്നത് എങ്ങിനെ എന്നതിന്റെ മികവുറ്റ ഉദാഹരണമാണ് ഇതെന്നുമാണ് പലരുടേയും അഭിപ്രായം.